ފްރާންސްއާ ގުޅޭ ގޮތުން ރަޖޯއި ދެއްކި ވާހަކަތަކާ ގުޅިގެން، ސްޕެއިންގެ ބޮޑު ވަޒީރު ސަންޗޭޒް ކޯފާވެއްޖެ

ފްރާންސްގެ ޓީމާ ގުޅޭ ގޮތުން ސްޕެއިންގެ ކުރީގެ ބޮޑު ވަޒީރު މަރިއާނޯ ރަޖޯއީ ދެއްކެވި ވާހަކަތަކާ ގުޅިގެން، ސްޕެއިންގެ މިހާރުގެ ބޮޑު ވަޒީރު ޕެޑްރޯ ސަންޗޭޒް ކޯފާ ވެއްޖެ އެވެ.

ފީފާ ވޯލްޑް ކަޕްގެ ސެމީ ފައިނަލްގައި ސްޕެއިން އާއި ފްރާންސް ބައްދަލު ކުރާ މެޗުގެ ކުރިން ރަޖޯއީ ވިދާޅުވެފައި ވަނީ، ފްރާންސް އަކީ ވަރުގަދަ ޓީމެއް ކަަމަށެވެ. ނަމަވެސް، ފްރާންސްގެ ޓީމުގައި "ފްރާންސް މީހަކު ނެތް" ކަމަށް އޭނާ ވަނީ ވިދާޅުވެފައި އެވެ. 

އެކަމާ ގުޅޭ ގޮތުން ސްޕެއިންގެ މިހާރުގެ ބޮޑު ވަޒީރު ސަންޗޭޒް އެކްސްގައި ކުރެއްވި ޕޯސްޓެއްގައި ވަނީ ރަޖޯއީގެ ވާހަކަތައް ވަރަށް ބޮޑަށް ކުށްވެރި ކޮށްފައި އެވެ. އަދި އެއީ އެހެން ޤައުމު ތަކުގެ މީހުންނާ ދެކޮޅު ވާހަކަ ތަކެއް ކަމަށް ވެސް ސަންޗޭޒް ވިދާޅުވެފައިވެ އެވެ. 

ސޯޝަލިސްޓް ލީޑަރު ސަންޗޭސް ވިދާޅުވީ، މިހާރު ވެސް ބައެއް މީހުން ޤައުމަކަށް ނިސްބަތްވުން ވަޒަން ކުރަނީ ނަމުން ކަމަށާއި، އުފަން ތަނާއި، އަދި ހަށިގަނޑުގެ ކުލައިން އެކަން ނުކުރެވޭ ކަމަށެވެ. ހަމަ އެހެންމެ، އަނެއް ބައި މީހުން އެކަން ވަޒަން ކުރަނީ ޤައުމަކާ ގުޅިފައިވާ ގޮތުންނާއި، އެ ޤައުމަށް އެހީތެރިވުމުގެ ނިޔަތުގެ މައްޗަށް ކަމަށް ވެސް ވިދާޅުވެފައިވ އެވެ. 

މީގެ އިތުރުން ރަޖޯއީއާ މެދު ވަރަށް ބޮޑަށް ކޯފާވެ ވަޑައިގެން ސަންޗޭޒް ވިދާޅުވެފައި ވަނީ، ސްޕެއިން ނިސްބަތް ވަނީ އެ ޤައުމަށް ލޯބި ކުރާ އަދި އެ ޤައުމަށްޓަކައި މަސައްކަތް ކުރާ މީހުންނަށް އެކަނި ކަމަށެވެ. އަދި އެއީ އެހެން ޤައުމު ތަކުގެ މީހުންނާ ދެކޮޅު ވާހަކަ ދައްކައި، އެ ޤައުމުތައް ފަޟީހަތް ކުރުމުގެ ވާހަކަ ދައްކާ މީހުންގެ ޤައުމެއް ނޫން ކަމަށް ވެސް އޭނާ ވިދާޅުވެފައިވެ އެވެ. 

ރަޖޯއީގެ ވާހަކަތަކާ ގުޅިގެން ސްޕެއިންގެ ބޮޑު ވަޒީރު ސަންޗޭޒް ނުރުހުން ފާޅު ކޮށްފައިވާއިރު، ފްރާންސްގެ ސިޔާސީ ލީޑަރުން ވެސް އަންނަނީ ރަޖޯއީގެ ވާހަކަ ތަކަށް ވަރަށް ބޮޑަށް ފާޑު ކިޔަމުންނެވެ. ފްރާންސްގެ ސޯޝަލިސްޓް ޕާޓީގެ ލީޑަރު އޮލިވިއާ ފޯރް އެކްސްގައި ވިދާޅުވީ، ފްރާންސްގައި ހަށިގަނޑުގެ ކުލައެއް ނުވަތަ ދީނެއް ނެތް ކަމަށެވެ.

މީގެ އިތުުރުން ފްރާންސްގެ އިންޓީރިއާ މިނިސްޓަރު ލޯރެންޓް ނޫނެޒް އެ ޤައުމުގެ ޓީވީ އަކަށް ވިދާޅުވީ، ސްޕެއިންގެ ކުރީގެ ބޮޑު ވަޒީރު ރަޖޯއީގެ ވާހަކަ ތަކަކީ އެއްވެސް ވަރަކަށް ބަލައި ގަނެވޭނެ ވާހަކަ ތަކެއް ނޫން ކަަމަށެވެ.