ޑެޝޯމްޕްސްގެ ސުވާލެއް: "މިއީ ސެމީ ފައިނަލް މެޗެއް އިންސާފު ކުރެވޭ ފެންވަރުގެ ރެފްރީއެއްތަ؟"

ފީފާ ވޯލްޑް ކަޕްގެ ސެމީ ފައިނަލްގައި ސްޕެއިން އަތުން ބަލިވެ ފްރާންސް މުބާާރާތުން ކެޓިއިރު، އެ ޓީމުގެ ކޯޗު ޑިޑިއޭ ޑެޝޯމްޕްސްގެ ނުރުހުން މެޗުގެ ރެފްރީ އަށް އަމާޒުކޮށްފި އެވެ. 

ސްޕެއިންއާ ދެކޮޅަށް ކުޅުނު ސެމީ ފައިނަލް މެޗުން ފްރާންސް ބަލިވެފައި ވަނީ 2-0 އިންނެވެ. މެޗުގައި ސްޕެއިން އިން ވަނީ ފްރާންސް ހުއްޓުވުމުގައި ކާމިޔާބު ހޯދައިފަ އެވެ. މުބާރާތުގައި މިހާތަނަށް ކުޅުނު ހަތް މެޗުގެ ތެރެއިން، ސްޕެއިންގެ ކޮޅަށް ވަދެފައި ވަނީ އެންމެ ލަނޑެކެވެ. ސްޕެއިންގެ ޑިފެންސް ފޫ އަޅުވާލުމުގެ ޤާބިލު ކަމެއް ފްރާންސް އަކަށް ވެސް ނެތެވެ. 

މެޗުގައި ސްޕެއިން އިން ޖެހި ފުރަތަމަ ލަނޑަކީ އެ ޓީމަށް ލިބުނު ޕެނަލްޓީ ކާމިޔާބު ކޮށްގެން ޖެހި ލަނޑެކެވެ. އެއީ ފްރާންސްގެ އޭރިޔާ ތެރެއިން ސްޕެއިންގެ ލަމީން ޔަމާލް އަށް، އެ ޓީމުގެ ލޫކަސް ޑީނިއޭ ކުރި ފައުލަކާ ގުޅިގެން ދިން ޕެނަލްޓީ އެކެވެ. ނަމަވެސް، އެ ޕެނަލްޓީ އަކީ ޔަމާލްގެ އަތުގައި ބޯޅަ ނެތް ވަގުތެއްގައި ހިނގި ކަމަށް ދިން ޕެނަލްޓީ އަކަށް ވާތީ، އެކަމާ ސުވާލުތަކެއް އުފެދުނެވެ. 

މެޗަށް ފަހު ވާހަކަ ދައްކަމުން ޑެޝޯމްޕްސް ބުނެފައި ވަނީ، މެޗުގެ ރެފްރީގެ ނިންމުންތަކާ މެދު އޭނާ ހިތްހަމަނުޖެހޭ ކަމަށެވެ. އޭނާ ބުނީ ބަލިވުމުން ޝަކުވާ ކުރާ މީހެއްގެ ގޮތުގައި ފެންނަން ބޭނުން ނުވާ ކަމަށެވެ. އެހެން ނަމަވެސް، އެ މެޗުގައި އިންސާފު ކުރި ރެފްރީ އަކީ ވޯލްޑް ކަޕްގެ ސެމީ ފައިނަލް ފަދަ މުހިންމު މެޗެއްގައި އިންސާފު ކުރުމުގެ ފެންވަރު ހުރި މީހެއްތޯ ސުވާލު އުފެދޭ ކަމަށް އޭނާ ވަނީ ބުނެފައި އެެވެ. 

މީގެ އިތުރުން ޑެޝޯމްޕްސް ބުނީ އޭނާގެ ހިތްހަމަނުޖެހުންް އޮތީ، ފުރަތަމަ ހާފުގައި ދިން ޕެނަލްޓީ އަށް އެކަނި ނޫން ކަމަށެވެ. އޭނާ ފާހަގަ ކުރި ގޮތުގައި މެޗުގެ ތެރޭގައި ރެފްރީގެ ފަރާތުން ފެނިގެން ދިޔަ ގިނަ ކަންތައް ތަކެއް އެއްވެގެން، މުޅި މެޗުގެ އިންސާފުވެރިކަމާ މެދު ސުވާލު އުފެދޭ ކަމަށެވެ. ސްޕެއިން އާއި ފްރާންސް ބައްދަލު ކުރި މެޗުގެ ރެފްރީ އަކީ އެލް ސަލްވާޑޯ އަށް ނިސްބަތްވާ އިވާން ބާޓަން އެވެ. 

ސްޕެއިން އަތުން ބަލިވެ ފްރާންސް މުބާރާތުން ކެޓިއިރު، ފްރާންސް އަކީ މިފަހަރުގެ މުބާާރާތް ކާމިޔާބު ކުރާނެ ކަމަށް އެންމެ ބޮޑަށް ބެލެވުނު ޓީމެވެެ. 2018 ވަނަ އަހަރު ފްރާންސް އިން ވޯލްޑް ކަޕް ކާމިޔާބު ކުރިއިރު، 2022 ވަނަ އަހަރުގެ ފައިނަލްގައި ވަނީ އާޖެންޓީނާ އަތުން ބަލިވެފައި އެވެ.  އަދި މިއަހަރުގެ ސެމީ ފައިނަލް އިން ބަލިވެ ކެޓިއިރު، މިއީ ގިނަ ބަޔަކަށް ހައިރާންކަން ލިބުނު ކަމެކެވެ.