ފްރާންސްއާ ދެކޮޅަށް ސްޕެއިން ނިކުންނަނީ ހުރިހާ ޙާލަތަކަށް ތައްޔާރު ވެގެން: ފުއެންޓޭ
14 ޖުލައި 2026 | އަންގާރަ 04:57ސެމީ ފައިނަލްގެ މެޗު ކާމިޔާބު ކުރުމަށް ސްޕެއިން އިން އެ ޓީމުގެ ހުރިހާ ހުނަރެއް ބޭނުން ކޮށްގެން، އިދިކޮޅު ޓީމުގެ ސިފަތައް ހުއްޓުވަން މަސައްކަތް ކުރަން ޖެހޭ ކަމަށް ފުއެންޓޭ ބުނި. އެކަން ފާހަގަކޮށް ފުއެންޓޭ ބުނީ، އާންމު ގޮތެއްގައި ފުޓުބޯޅައިގައި މޮޅުވާނީ ކުޅުމުގެ ހަމަހަމަކަން އެންމެ ރަނގަޅަށް ހިފަހައްޓާ ޓީމެއް ކަމަށް.
ފީފާ ވޯލްޑް ކަޕްގެ ސެމީ ފައިނަލްގައި ފްރާންސްއާ ދެކޮޅަށް ކުޅޭ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ސްޕެއިންގެ ކޯޗު ފުއެންޓޭ ވާހަކަ ދައްކަނީ. | ގެޓީ އިމޭޖަސް
ފީފާ ވޯލްޑް ކަޕްގެ ސެމީ ފައިނަލްގައި ފްރާންސްއާ ދެކޮޅަށް ނިކުންނަނީ ހުރިހާ ޙާލަތަކަށް ތައްޔާރު ވެގެން ކަމަށް، ސްޕެއިންގެ ކޯޗު ލުއިސް ޑި ލާ ފުއެންޓޭ ބުނެފި އެވެ.
ފުއެންޓޭ މިހެން ބުނެފައި ވަނީ އަންގާރަ ދުވަހުގެ ރޭ ދަންވަރު ފްރާންސްއާ ދެކޮޅަށް ކުޅޭ މެޗުގެ ކުރިން އޮތް ނޫސްވެެރިންގެ ބައްދަލުވުމުގައި ވާހަކަ ދައްކަމުންނެވެ. ފުއެންޓޭ ބުނީ އެ މެޗުގައި ވެސް ސްޕެއިން އިން މަސައްކަތް ކުރާނީ ބޯޅަ ހިފަހައްޓައިގެން ކުޅެ، ފްރާންސް އަށް ނުރައްކާ ކުރަން ކަމަށެވެ.
އެންމެ ފަހުން ފްރާންސް އާއި ސްޕެއިން ބައްދަލު ކުރި ސެމީ ފައިނަލްގެ ދެ މެޗު ވެސް ކާމިޔާބު ކޮށްފައި ވަނީ ސްޕެއިން އިންނެވެ. އެހެންވެ ފްރާންސްގެ ކޯޗު ޑިޑިއޭ ޑެޝޯމްޕްސް ވެސް ބުނެފައި ވަނީ، އެ މެޗަށް ނިކުންނައިރު ފޭވަރިޓުންނަކީ ސްޕެއިން ކަމަށެވެ. ނަމަވެސް، ފުއެންޓޭ ބުނީ އެއީ މުޅިން ޤަބޫލު ކުރާ ވާހަކައެއް ނޫން ކަމަށާއި، ސްޕެއިން އޮތީ ފްރާންސް ސިއްސުވާލަން ތައްޔާރަށް ކަަމަށެވެ.
ފްރާންސް ޓީމާ ގުޅޭ ގޮތުން ވާހަކަ ދައްކަމުން ފުއެންޓޭ ބުނީ، މެޗުގެ ކުރިން ފްރާންސްގެ ޓީމު ވަރަށް ރަނގަޅަށް ދިރާސާ ކޮށްފައިވާ ކަމަށެވެ. އަދި ދެ ޓީމަކީ ވެސް، އެއް ޓީމު އަނެއް ޓީމު ވަރަށް ރަނގަޅަށް އިނގޭ ދެ ޓީމު ކަމަށް އޭނާ ބުންޏެވެ. ފްރާންސްގައި ވަރުގަދަ ކުޅުންތެރިން ތިބި ފަދައިން، ސްޕެއިންގައި ވެސް ހުނަރުވެރި ކުޅުންތެރިން ތިބި ކަމަށް އޭނާ ބުންޏެވެ.
އެހެންކަމުން، ސެމީ ފައިނަލްގެ މެޗު ކާމިޔާބު ކުރުމަށް ސްޕެއިން އިން އެ ޓީމުގެ ހުރިހާ ހުނަރެއް ބޭނުން ކޮށްގެން، އިދިކޮޅު ޓީމުގެ ސިފަތައް ހުއްޓުވަން މަސައްކަތް ކުރަން ޖެހޭ ކަމަށް ފުއެންޓޭ ބުންޏެވެ. އެކަން ފާހަގަކޮށް ފުއެންޓޭ ބުނީ، އާންމު ގޮތެއްގައި ފުޓުބޯޅައިގައި މޮޅުވާނީ ކުޅުމުގެ ހަމަހަމަކަން އެންމެ ރަނގަޅަށް ހިފަހައްޓާ ޓީމެއް ކަމަށެވެ.
އެންމެ ފަހުން ޔުއެފާ ނޭޝަންސް ލީގުގެ ސެމީ ފައިނަލްގައި މިދިޔަ އަހަރު ފްރާންސްއާ ދެކޮޅަށް ކުޅެ މޮޅުވި މެޗަށް އިޝާރާތްކޮށް ފުއެންޓޭ ބުނީ، އެ މެޗާއި މިފަހަރުގެ މެޗަކީ ތަފާތު ދެ މެޗު ކަމަށެވެ. ސްޕެއިން އިން މަސައްކަތް ކުރާނީ ނޭޝަންސް ލީގުގެ މެޗުގައި ހެދުނު ގޯސްތައް ތަކުރާރު ވިޔަ ނުދިނުމަށް ކަމަށް ފުއެންޓޭ ވަނީ ބުނެފައި އެވެ. އޭނާ ބުނީ މާޒީ އަށް ވުރެ ފްރާންސް ޓީމު މިހާރު މާ ބޮޑަށް ވެސް ވަރުގަދަ ކަމަށެވެ.
ފުއެންޓޭ ބުނީ ސެމީ ފައިނަލް އަށް ސްޕެއިން ތައްޔާރުވީ އެންމެ ފުރިހަމަ އަށް ކަމަށާއި، މެޗަށް ނިކުންނާނީ ފުރިހަމަ އިތުބާރާ އެކު ކަަމަށެވެ. އަންގާރަ ދުވަހުގެ ރޭ ފްރާންސް އާއި ސްޕެއިން ބައްދަލު ކުރާ މެޗު ފަށާނީ ދަންވަރު 12 ޖަހާއިރު އެވެ.
