ފެންނާނީ ޝައުޤުވެރި ސެމީ ފައިނަލެއް، ފޭވަރިޓުންނަކީ ސްޕެއިން: ޑެޝޯމްޕްސް

ފީފާ ވޯލްޑް ކަޕްގެ ސެމީ ފައިނަލްގައި ސްޕެއިންއާ ދެކޮޅަށް ކުޅޭ މެޗު ތަފާތު ވާނެ ކަމަށާއި، އެ މެޗަށް ނިކުންނައިރު ފޭވަރިޓުންނަކީ ސްޕެއިން ކަމަށް ފްރާންސްގެ ކޯޗު ޑިޑިއޭ ޑެޝޯމްޕްސް ބުނެފި އެވެ.

ޑެޝޯމްޕްސް މިހެން ބުނެފައި ވަނީ އަންގާރަ ދުވަހުގެ ރޭ ދަންވަރު ކުޅޭ ސެމީ ފައިނަލް މެޗުގެ ކުރިން އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުންނެވެ. ޑެޝޯމްޕްސް ބުނީ ފްރާންސް ޓީމު އޮތީ އެހެން ލެވެލެއްގައި ކަމަށާއި، އަމާޒަކީ މުބާރާތުގެ ފައިނަލް އަށް ދިޔުން ކަމަށެވެ. 

މީގެ ކުރިން 2024 ވަނަ އަހަރުގެ ޔޫރޯ މުބާރާތުގެ ސެމީ ފައިނަލް އާއި، 2025 ވަނަ އަހަރުގރ ޔުއެފާ ނޭޝަންސް ލީގުގެ ސެމީ ފައިނަލްގައި ސްޕެއިން އަތުން ފްރާންސް ބަލިވި ނަމަވެސް، ޑެޝޯމްޕްސް ބުނީ މާޒީގެ ނަތީޖާ އަށް އެއްވެސް ވަރަކަށް ބަލަން ބޭނުން ނުވާ ކަމަށެވެ. އެންމެ ފަހުން ކުޅުނު ނޭޝަންސް ލީގުގެ ސެމީ ފައިނަލް އިން ފްރާންސް ބަލިވި މެޗުގައި ޖުމުލަ ނުވަ ލަނޑު ފެނުނުއިރު، ޑެޝޯމްޕްސް ބުނީ މިހާރު ފްރާންސް އޮތީ ކުރިއަށްވުރެ ވަރުގަދަކޮށް ކަމަށެވެ. 

މިފަހަރުގެ ސެމީ ފައިނަލް އިން މޮޅުވެ ފްރާންސް ފައިނަލް އަށް ގޮސްފި ނަމަ، އެ ޤައުމު ވަނީ ޖެހި ޖެހިގެން ތިން ވަނަ ފައިނަލްގައި ކުޅޭ ތިން ވަނަ ޓީމަށެވެ. މީގެ ކުރިން މި ޝަރަފު ހޯދާފައި ވަނީ 1982 އިން 1990 އަށް ވެސްޓް ޖާމަނީ އާއި، 1994 އިން 2002 އަށް ބްރެޒިލް އެވެ. ޑެޝޯމްޕްސް ވަނީ 1998 ވަނަ އަހަރު ކެޕްޓަނެއްގެ ގޮތުގައި ފްރާންސް އަށް ވޯލްޑް ކަޕް ހޯދައިދީފައި އެވެ. އަދި 2018 ވަނަ އަހަރު ކޯޗެއްގެ ގޮތުގައި ވެސް އޭނާ ވަނީ ފްރާންސް އަށް ވޯލްޑް ކަޕް ކާމިޔާބު ކޮށްދީފައި އެވެ. 

ސެމީ ފައިނަލް އަށް ނިކުންނައިރު، ޑެޝޯމްޕްސް ބުނީ ފޭވަރިޓުންނަކީ ސްޕެއިން ކަމަށެވެ. އެގޮތުން މުބާރާތުގައި މިހާތަނަށް ސްޕެއިން އިން ކުޅެފައިވާ ހަ މެޗުގެ ތެރެއިން، އެ ޓީމު ކޮޅަށް ވަދެފައި ވަނީ އެންމެ ލަނޑެއް ކަމަށް ޑެޝޯމްޕްސް ވަނީ ފާހަގަ ކޮށްފައި އެވެ. ނަމަވެސް، ދެ ޓީމުގެ އެޓޭކަށް ބަލާއިރު، މިއީ ބަލާ ހިތްވާ ކަހަލަ މެޗަކަށް ވާނެ ކަމަށް އޭނާ ބުންޏެވެ. އެއާ އެކު ޑެޝޯމްޕްސް ބުނީ އޭނާ އާއި، ސްޕެއިންގެ ކޯޗު ލުއިސް ޑެ ލާ ފުއެންޓޭ އަކީ ވެސް ޑިފެންސް ކުރަން ދަންނަ ދެ ކޯޗުން ކަމަށެވެ.

މިފަހަރުގެ ވޯލްޑް ކަޕަށް ފަހު ފްރާންސް ޓީމުން ވަކިވާން ނިންމާފައިވާ ޑެޝޯމްޕްސް އަށް، ސެމީ ފައިނަލް މެޗަކީ ވަރަށް ޚާއްސަ މެޗަކަށް ވާނެ އެވެ. ސްޕެއިން އާއި ފްރާންސް ބައްދަލު ކުރާ ސެމީ ފައިނަލް މެޗު ފަށާނީ އަންގާރަ ދުވަހުގެ ރޭ ދަންވަރު ރާއްޖެ ގަޑިން 12 ޖަހާއިރު އެވެ.