16 އަހަރަށް ފަހު ސްޕެއިން ވޯލްޑް ކަޕްގެ ފައިނަލް އަށް
މެޗުން މޮޅުވެ ސްޕެއިން އިން މިފަހަރުގެ ވޯލްޑް ކަޕްގެ ފައިނަލްގެ ޖާގަ ހޯދިއިރު، އެންމެ ފަހުން އެ ޓީމުން ވޯލްޑް ކަޕްގެ ފައިނަލްގައި ކުޅެފައި ވަނީ 2010 ވަނަ އަހަރު. އެ ފަހަރުގެ ފައިނަލްގައި ސްޕެއިން އިން ވަނީ ނެދަލެންޑްސް ބަލިކޮށް މުބާރާތް ކާމިޔާބު ކޮށްފައި.
މެޗުން މޮޅުވުމުން ސްޕެއިންގެ ކުޅުންތެރިން އުފާ ފާޅު ކުރަނީ. | ރޮއިޓާސް
ފީފާ ވޯލްޑް ކަޕްގެ ސެމީ ފައިނަލްގައި ފްރާންސް ބަލިކޮށް، ސްޕެއިން އިން މުބާރާތުގެ ފަައިނަލްގެ ފުރަތަމަ ޖާގަ ހޯދައިފި އެވެ.
ހޯމަ ދުވަހުގެ ރޭ ދަންވަރު ކުޅުނު މެޗު ސްޕެއިން އިން ކާމިޔާބު ކުރީ 2-0 އިންނެވެ. މެޗުގެ ފުރަތަމަ ހާފުގައި ސްޕެއިން އިން އެއް ލަނޑު ޖެހިއިރު، އަނެއް ލަނޑު އެ ޓީމުން ޖެހީ ދެ ވަނަ ހާފުގައި އެވެ.
މެޗުގެ ފުރަތަމަ ހާފުގެ 22 ވަނަ މިނެޓުގައި ސްޕެއިން އިން ވަނީ ލަނޑު ޖަހައި ލީޑު ނަގައިފަ އެވެ. އެ ޓީމަށް ލިބުނު ޕެނަލްޓީ ކާމިޔާބުކޮށް އެ ލަނޑު ޖަހައިދިނީ މިކޭލް އޮޔާޒަބާލް އެވެ. އެއީ ފްރާންސްގެ އޭރިޔާ ތެރެއިން ސްޕެއިންގެ ޒުވާން ކުޅުންތެރިޔާ ލަމީން ޔަމާލް އަށް ކުރި ފައުލަކާ ގުޅިގެން ދިން ޕެނަލްޓީ އެކެވެ.
އޭގެ ފަހުން މެޗުގެ ދެ ވަނަ ހާފު ފަށައިގެން 13 ވަނަ މިނެޓުގައި ސްޕެއިންގެ ދެ ވަނަ ލަނޑު ޖަހައި ލީޑު ފުޅާ ކޮށްދިނީ ޕެޑްރޯ ޕޯރޯ އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ ޑެނީ އޮލްމޯ އެވެ. މެޗުގައި އިތުރު ލަނޑު ޖަހާނެ ފުރުސަތު ވެސް ސްޕެއިން އިން ވަނީ ހޯދައިފަ އެވެ.
މެޗުން މޮޅުވެ ސްޕެއިން އިން މިފަހަރުގެ ވޯލްޑް ކަޕްގެ ފައިނަލްގެ ޖާގަ ހޯދިއިރު، އެންމެ ފަހުން އެ ޓީމުން ވޯލްޑް ކަޕްގެ ފައިނަލްގައި ކުޅެފައި ވަނީ 2010 ވަނަ އަހަރު އެވެ. އެ ފަހަރުގެ ފައިނަލްގައި ސްޕެއިން އިން ވަނީ ނެދަލެންޑްސް ބަލިކޮށް މުބާރާތް ކާމިޔާބު ކޮށްފައި އެވެ.
މިފަހަރުގެ ފައިނަލްގައި ސްޕެއިންއާ ދެކޮޅަށް ނިކުންނާނީ ބުދަ ދުވަހުގެ ރޭ ދަންވަރު އާޖެންޓީނާ އާއި އިންގްލެންޑު ކުޅޭ މެޗުން މޮޅުވާ ޓީމެކެވެ.
