ފައިނަލް އަށް ދިޔުމަށް ބޭނުންވާ ކުޅުމެއް ނުދެއްކުނު، ބަލިވީ ޓީމުގެ ރޭވުންތެރި ކަމެއް ނެތުމުން: އެމްބާޕޭ

ފީފާ ވޯލްޑް ކަޕްގެ ފައިނަލް އަށް ދިޔުމަށް ކުރަން ޖެހޭ ކަންކަން ނުކުރެވުނު ކަމަށާއި، މެޗުން ބަލިވީ ޓީމުގެ ރޭވުންތެރި ކަމެއް ނެތުމުން ކަމަށް ފްރާންސްގެ ކެޕްޓަން ކީލިއަން އެމްބާޕޭ ބުނެފި އެވެ.

މުބާރާތުގެ ސެމީ ފައިނަލްގައި ސްޕެއިން އަތުން ބަލިވެ ކެޓި މެޗަށް ފަހު ނޫސްވެރިންނާ ވާހަކަ ދައްކަމުން އެމްބާޕޭ ބުނީ، ސްޕެއިން ފަދަ ވަރުގަދަ ޓީމަކާ ދެކޮޅަށް ކުޅުނުއިރު ފްރާންސްގެ މެދު ތެރޭގައި ކުޅުންތެރިން މަދުވުމަކީ ބަލިވާން ދިމާވި މައިގަނޑު އެއް ސަބަބު ކަމަށެވެ. 

ސްޕެއިންގެ ރޮޑްރީ އާއި، ފަބިއަން ރުއީޒް އަދި ޑެނީ އޮލްމޯ މެދު ތެރެއިން ކުޅެމުން ދިޔައިރު، ފްރާންސްގެ އައުރެލިއަން ޗުއަމެނީ އާއި އެޑްރިއަން ރާބިއޮޓް އަށް އެ ކުޅުންތެރިން ހުއްޓުވުމަށް ބޮޑެތި ގޮންޖެހުން ތަކެއް ކުރިމަތިވި ކަމަަށް އެމްބާޕޭ ވަނީ ބުނެފައި އެވެ. 

އެމްބާޕޭ ބުނީ ގޮތުގައި މެދު ތެރޭގައި ސްޕެއިންގެ ތިން ކުޅުންތެރިން ތިބިއިރު، ފްރާންސްގެ ތިބީ ދެ ކުޅުންތެރިން ކަަމަށެވެ. އަދި އެކަމުގެ ސަބަބުން ރޮޑްރީ އާއި ރުއީޒް އަށް ބޯޅަ ހިފަހައްޓައިގެން ކުޅެން ބޭނުންވާ ވަރަށް ވަގުތު އަދި ޖާގަ ލިބުނު ކަމަށް އެމްބާޕޭ ބުންޏެވެ. މީގެ އިތުރުން ޕްްރެސް ކުރުމުގައި މުވާސަލާތީ މައްސަލަ ތަކެއް ހުރިކަން ފާހަގަކޮށް އެމްބާޕޭ ބުނީ، "މޭން ޓު މޭން" ނުވަތަ، ކުޅުންތެރިޔަކަށް ކުޅުންތެރިޔަކު ފާރަވެރިވާ އުސޫލުން ޕްރެސް ކުރި ނަމަ، ސްޕެއިންގެ ކުޅުންތެރިންނަށް އުނދަގޫ ކުރެވުނީސް ކަމަށެވެ. 

ފްރާންސްގެ ކުޅުމާ ގުޅޭ ގޮތުން ވާހަކަ ދައްކަމުން އެމްބާޕޭ ބުނީ، ފްރާންސްގެ ރޭވުމަކީ ސްޕެއިންގެ ކުޅުންތެރިންނަށް ރިދަމް ނުލިބޭނެހެން މަތިން ޕްރެސް ކުރުން ކަމަށާއި، ނަމަވެސް އެކަން ކާާމިޔާބު ނުކުރެވުނީ ފްރާންސްގެ ކުޅުންތެރިންގެ ފަރާތުން ފެނުނު ޓެކްނިކަލް ގޯސްތަކުގެ ސަބަބުން ކަމަށެވެ. 

މުބާރާތުގައި މޮޅު ކުޅުމެއް ދައްކައި، ރަން ބޫޓަށް ވާދަ ކުރަމުން އަންނަ އެމްބާޕޭ އިތުރަށް ބުނީ ވޯލްޑް ކަޕެއްގެ ސެމީ ފައިނަލްގައި ކުރަން ޖެހޭ ކަންކަން އެންމެ ފުރިހަމަ އަށް ނުކުރެވުނު ކަމަށާއި، އެކަން ނުކުރެވޭ ނަމަ މެޗުން މޮޅު ނުވާނެ ކަމަށެވެ. އަދި ސްޕެއިން މޮޅުވީ އެމީހުންގެ އާންމު ވައްޓަފާޅި ހިފަހައްޓައި، މެޗު ކޮންޓްރޯލް ކޮށްގެން ކަމަަށް ވެސް އެމްބާޕޭ ބުންޏެވެ. އެއާ އެކު އެމްބާޕޭ ބުނީ ފްރާންސްގެ ހުވަފެން ކަމަށްވާ، ވޯލްޑް ކަޕްގެ ފައިނަލަށް ދިޔުމަށް ބޭނުންވާ ކުޅުން ނުދެއްކުނު ކަމަށެވެ. 

މުބާރާތުގެ ސެމީ ފައިނަލް އިން ބަލިވުމާ އެކު، ފްރާންސް އަށް ދެން ވާދަ ކުރަން ޖެހޭނީ މުބާާރާތުގެ ތިން ވަނަ ހޮވާާ މެޗުގައި އެވެ. އެއީ ފްރާންސް އަށް އިރުޝާދު ދެމުން އަންނަ ޑިޑިއޭ ޑެޝޯމްޕްސްގެ އިރުޝާދުގެ ދަށުން އެ ޓީމު ކުޅޭ ފަހު މެޗަށް ވާނެ އެވެ.