ފްރާންސް ޓީމުގައި "ފްރާންސްގެ މީހަކު ނެތް" ކަމަށް، ސްޕެއިންގެ ކުރީގެ ބޮޑު ވަޒީރު ރަޖޯއީ ވިދާޅުވި މައްސަލަ ހޫނުވެއްޖެ

ފްރާންސް ޤައުމީ ޓީމުގައި "ފްރާންސްގެ މީހަކު ނެތް" ކަމަށް ވިދާޅުވެ ސްޕެއިންގެ ކުރީގެ ބޮޑު ވަޒީރު މަރިއާނޯ ރަޖޯއީ ދެއްކެވި ވާހަކައިގެ މައްސަލަ ވަރަށް ބޮޑަށް ހޫނުވެއްޖެ އެވެ. 

ރަޖޯއީ މި ވާހަކަ ދެއްކެވީ "އެލް ޑެބޭޓް" ނޫހުގައި އޭނާ ލިޔުއްވާފައިވާ ކޮލަމެއްގައި އެވެ. ކޮންޒަވޭޓިވް ލީޑަރު ރަޖޯއީ އަކީ 2011 ވަނަ އަހަރުން ފެށިގެން 2018 ވަނަ އަހަރަށް ސްޕެއިންގެ ބޮޑު ވަޒީރުކަން ކުރެއްވި ބޭފުޅާ އެވެ. 

"ހޯއީ އީގޯ އަލް ދެސްކީތޭ" ނުވަތަ "މިއަދަކީ ބަދަލު ހިފުމުގެ ދުވަސް" މި ސުރުޚީގެ ދަށުން ރަޖޯއީ ލިޔުއްވި ކޮލަމުގައި، ކުއާޓާ ފައިނަލުގައި ބެލްޖިއަމް އަތުން ސްޕެއިން 2-1 އިން މޮޅުވި މެޗަށް އަލި އަޅުވާލާފައިވެ އެވެ. އަދި އަންގާރަ ދުވަހުގެ ރޭ ފްރާންސްއާ ދެކޮޅަށް ކުޅޭ ސެމީ ފައިނަލް މެޗާ ބެހޭ ގޮތުން ވާހަކަ ދައްކަވަމުން އޭނާ ވިދާޅުވީ، ފްރާންސް އަކީ ދެ ފަހަރު ދުނިޔޭގެ ޗެމްޕިއަންކަން ހޯދާފައިވާ އަދި މި މުބާރާތުގެ ހުރިހާ މެޗަކުން މޮޅުވެފައިވާ ވަރުގަދަ ޓީމެއް ކަމަށެވެ. ނަމަވެސް އެއީ "ފްރާންސް މީހުން ނެތް" ވަރުގަދަ ސްކޮޑެއް ކަމަށް އޭނާ ލިޔުއްވާފައިވެ އެވެ.

ރަޖޯއީގެ މި ބަހުގެ ހަމަލާ އަކީ ފްރާންސް ޓީމުގައި ހިމެނޭ ގިނަ ކުޅުންތެރިންނަކީ ހިޖުރަ ކޮށްފައިވާ އާއިލާ ތަކަށް ނިސްބަތްވާ، ނުވަތަ ފްރާންސްގެ ކުރީގެ އިސްތިއުމާރީ ދައުލަތް ތަކަށް ނިސްބަތްވާ ކުޅުންތެރިން ކަމަށް ވުމެވެ. ނަމަވެސް ތަފާސް ހިސާބު ތަކަށް ބަލާއިރު، ކޯޗު ޑިޑިއޭ ޑެޝޯމްޕްސް ނެގި 26 ކުޅުންތެރިންގެ ތެރެއިން ފްރާންސް އިން ބޭރުގައި އުފަންވެފައި ވަނީ އެންމެ ތިން ކުޅުންތެރިންނެވެ. އެއީ ލަންޑަން އަށް އުފަން މައިކަލް އޮލައިސޭ އާއި، އިޓަލީގެ ޕާމާ އަށް އުފަން މާކަސް ތުރަމްގެ އިތުރުން ކޮންގޯ އަށް އުފަން ބްރައިސް ސަމްބާ އެވެ.

މި ވާހަކަތަކާ ގުޅިގެން ސްޕެއިންގެ ވެރިކަން ކުރާ ޕީއެސްއޯއީ ޕާޓީގެ މެންބަރު ޚޯސޭ ސެޕޭޑާ ވިދާޅުވީ، ރަޖޯއީގެ ވާހަކަ ތަކަކީ ނަސްލީ ތަފާތު ކުރުމާއި، ބިދޭސީންނަށް ނަފުރަތު ކުރުން އެކުލެވޭ "ލަދުވެތި" ވާހަކަ ތަކެއް ކަމަށެވެ. ފްރާންސްގެ ސަރުކާރުން ވެސް ވަނީ މިކަމާ ހިތްހަމަ ނުޖެހުން ފާޅުކޮށްފައި އެވެ. ފްރާންސްގެ މިނިސްޓަރު އޮރޯރް ބާގޭ އެކްސްގައި ކުރެއްވި ޕޯސްޓެއްގައި ވިދާޅުވީ، ތަކުރާރު ވަމުންދާ ނަސްލީ ތަފާތު ކުރުންތައް ބަލައި ނުގަނެވޭނެ ކަމަށާއި، ކުޅިވަރަކީ ހަމައެކަނި ހުނަރަށް ބަލައި ވަޒަންކުރާ ދާއިރާ އަކަށް ވާން ޖެހޭ ކަމަށެވެ.

މީގެ އިތުރުން ފްރާންސްގެ ކޮމިއުނިސްޓް ޕާޓީގެ ސެކްރެޓަރީ ފަބިއަން ރޫސެލް ވަނީ ރަޖޯއީގެ މި އަމަލު ކުށްވެރި ކުރުމަށް ގޮވާލާފައި އެވެ. އޭނާ މިކަން އަޅާ ކިޔާފައި ވަނީ ފްރާންސްގެ ތަރި ކީލިއަން އެމްބާޕޭއާ ބެހޭ ގޮތުން ޕެރަގުއޭގެ ސިޔާސީ ބޭފުޅަކު ދެއްކެވި ވާހަކަތަކާ އެވެ.

އެ މައްސަލާގައި ފްރާންސްގެ ޕްރޮސެކިއުޓަރުން މިހާރު ވަނީ ތަހުގީގެއް ވެސް ފަށާފައި އެވެ. ރޫސެލް ވިދާޅުވީ، ފްރާންސްގެ މޮޅު ޓީމުގެ އަޒުމް ގުޑުވާލުމަށްޓަކައި ބައެއް ފަރާތް ތަކުން ނަސްލީ ތަފާތު ކުރުމުގެ ހުތުރު އަމަލުތައް ހިންގަމުންދާ ކަމަށެވެ.