ތިލަމާލެ ބްރިޖަކީ ހަމައެކަނި ޑރ. މުއިއްޒުގެ މަސައްކަތުން ނިންމާ މަޝްރޫއެއްކަމަށް ދައްކަން ހަގީގަތް އޮޅުވާލުމަކީ ރަނގަޅު ގޮތެއް ނޫން: އަސްލަމް
15 އޯގަސްޓު 2026 | ހޮނިހިރު 14:12ތިލަމާލެ ބްރިޖުގެ މަސައްކަތް މި ސަރުކާރުން ފެށީ ސުމަކުން ކަމަށް ރައީސް ޑރ. މުއިއްޒު ވިދާޅުވި ވާހަކަފުޅަށް، ކުރީގެ ހައުސިންގ މިނިސްޓަރު މުހައްމަދު އަސްލަމް ރައްދު ދެއްވައިފި. އަސްލަމް ވިދާޅުވީ ކުރީ ސަރުކާރުން ބްރިޖުގެ ގިނަ މަސައްކަތްތަކެއް ނިންމާފައިވާ ކަމަށާއި ރައްޔިތުންނަށް ހަގީގަތް އޮޅޭގޮތަށް ވާހަކަދެއްކުމަކީ ރަނގަޅު ގޮތެއް ނޫން ކަމަށް
ކުރީގެ ޕްލޭނިން މިނިސްޓަރު މުހައްމަދު އަސްލަމް
މި ސަރުކާރުން ތިލަމާލެ ބުރިޖު މަޝްރޫއުގެ އަމަލީ މަސައްކަތް ފެށީ ގާތްގަނޑަކަށް ސުމަކުންކަމަށް ރައީސް ޑރ. މުހައްމަދު މުއިއްޒު ވިދާޅުވެފައިވާއިރު، އެއީ ހަމައެކަނި އެމަނިކުފާނު ކުރެއްވި މަސައްކަތްޕުޅެއް ކަމަށް ދެއްކެވުމަށް މަސައްކަތް ކުރެއްވުމަކީ ރަނގަޅު ގޮތެއް ނޫންކަމަށް އެމްޑީޕީ ސަރުކާރުގެ ހައުސިންގ މިނިސްޓަރު މުހައްމަދު އަސްލަމް ވިދާޅުވެއްޖެ އެވެ.
ދަ ޕަލްސް ޕޮޑްކާސްޓުގައި ވާހަކަފުޅު ދައްކަވަމުން ރައީސް މުއިއްޒު ވިދާޅުވީ، ކުރީގެ ރައީސް އިބްރާހީމް މުހައްމަދު ސޯލިހުގެ ސަރުކާރުގައި އިންޑިއާގެ އެފްކޮންސްއާ ހަވާލުކޮށްގެން ފެށި ތިލަމާލެ ބުރިޖުގެ މަސައްކަތް މި ސަރުކާރުން ހަވާލުވީއިރު، މާލެ އާއި ވިލިމާލެއާ ދޭތެރޭ އެކަނި ވެސް އެއްވެސް މަސައްކަތެއް ކޮށްފައި ނެތް ކަމަށާއި، އެއީ ގާތްގަނޑަކަށް މި ސަރުކާރުން ސުމަކުން ފެށި މަޝްރޫއެއް ކަމަށެވެ.
މިކަމާ ގުޅޭގޮތުން ރާއްޖެއެމްވީއާ ވާހަކަދައްކަވަމުން ކުރީގެ ހައުސިންގ މިނިސްޓަރު މުހައްމަދު އަސްލަމް ވިދާޅުވީ، އެއީ މި ސަރުކާރުން ސުމަކުން ފެށި މަޝްރޫއެއްކަމަށް ވިދާޅު ނުވެވޭނެ ކަމަށެވެ. އަސްލަމް ވިދާޅުވީ، ތަނބުތައް ޖެހުމަށްޓަކައި ޖަހަންޖެހޭ ދަގަނޑު ކޭސިންގތައް ވެސް ބައެއް ހިސާބުތަކުގައި ޖަހާފައި ހުންނާނެ ކަމަށެވެ.
އަސްލަމް ވިދާޅުވީ، މި ބުރިޖަކީ ޕްރިކާސްޓްކޮށް، ބައިތައް ހަދައިގެން ގެނެސް ގުޅުވަންޖެހޭ އެއްޗަކަށްވާއިރު، އެތަކެތި ކާސްޓުކުރުމަށް ސެޓަޕް ހަދައި ބޮޑުބައި ނިންމާފައި އޭރު ގުޅީފަޅުގައި ވެސް ހުންނާނެ ކަމަށެވެ. އަދި އެ ބައިތައް އިންސްޓޯލްކުރީ މި ސަރުކާރުން ކަމަށް އަސްލަމް ވިދާޅުވި އެވެ.
އަސްލަމް ވިދާޅުވީ، މިއީ ދައުލަތެއް ކަމަށާއި، އެއް ސަރުކާރަކުން ނިމުނިއިރު ހުރި ކަންކަން ދެން އަންނަ ސަރުކާރަކުން ނިންމައިދިނުމަކީ އެކަން އޮންނަ ގޮތް ކަމަށެވެ. ވީއިރު، ރައްޔިތުންނަށް ހަގީގަތް އޮޅޭގޮތަށް މިއީ ހަމައެކަނި ރައީސް މުއިއްޒު ކޮށްދެއްވި ކަމެއްކަމަށް ދެއްކެވުމަށް މަސައްކަތް ކުރެއްވުމަކީ ރަނގަޅު ގޮތެއް ނޫން ކަމަށް އަސްލަމް ވިދާޅުވި އެވެ.
އެއީ މި ސަރުކާރުން ސުމަކުން ފެށި މަޝްރޫއެކޭ ނުދެންނެވޭނެ، ތަނބުތައް ޖެހުމަށްޓަކައި ޖަހަންޖެހޭ ދަގަނޑު ކޭސިންގތައް ވެސް ޖަހާފައި ހުންނާނެ ބައެއް ހިސާބުތަކުގައި، މި ބްރިޖަކީ ޕްރިކާސްޓްކޮށް، ބައިތައް ހަދައިގެން ގެނެސް ގުޅުވަންޖެހޭ އެއްޗަކަށްވާއިރު، އެ ތަކެތި ކާސްޓުކުރުމަށް ސެޓަޕް ހަދައި ބޮޑުބައި ނިންމާފައި އޭރު ގުޅީފަޅުގައި ވެސް ހުންނާނެ. އެ ބައިތައް އިންސްޓޯލްކުރީ މި ސަރުކާރުން. މިއީ ދައުލަތެއް، ދައުލަތަކުން ކުރަންޖެހޭ ކަމެއް އެއީ އެއް ސަރުކާރަކުން ނިމުނިއިރު ހުރި ކަންކަން ނިންމައިދިނުން، ނަމަވެސް މިއީ ހަމައެކަނި ރައީސް ޑރ. މުހައްމަދު މުއިއްޒު ކޮށްދިން ކަމެއްކަމަށް ދެއްކުން އެއީ ރަނގަޅު ގޮތެއް ނޫން ކަންނޭނގެ، ރައްޔިތުންގެ ޚާދިމުންގެ ގޮތުގައި އައިސް ތިބޭ ބައެއް ވެރިންނަކީމުހައްމަދު އަސްލަމް
ތިލަމާލެ ބުރިޖަކީ ރާއްޖޭގެ ތާރީޚުގައި ހިންގާ އެންމެ ބޮޑު އެއް އިންފްރާސްޓްރަކްޗަރ މަޝްރޫއުގެ ތެރޭގައި ހިމެނޭ މަޝްރޫއެކެވެ. މި މަޝްރޫއުގެ ދަށުން މާލެ، ވިލިމާލެ، ގުޅީފަޅު އަދި ތިލަފުށި ގުޅުވައިދޭނެ އެވެ.
އިންޑިއާގެ އެފްކޮންސް ކުންފުންޏާ ހަވާލުކޮށްގެން، އެ ގައުމުގެ ލޯނު އަދި ހިލޭ އެހީގެ ދަށުން ކުރިއަށްދާ މި މަޝްރޫއުގެ ސްޕީޑާމެދު ހިތްހަމަޖެހިވަޑައިނުގަންނަވާ ކަމަށް ރައީސް މުއިއްޒު ވެސް ވަނީ މި ފަހުން ވިދާޅުވެފަ އެވެ. އަދި ރައީސް ވިދާޅުވެފައި ވަނީ އެކަމާ ގުޅިގެން ސަރުކާރަށް ކުރެވޭނެ ކަމެއް ނެތް ކަމަށެވެ.
އެހެންނަމަވެސް މިފަހަރުގެ ޕޮޑްކާސްޓުގައި ރައީސް ވިދާޅުވީ، މިހާރު މަޝްރޫއު އެ ދަނީ ވަރަށް ބާރަށް ކަމަށާއި، ބުރިޖުގެ މަސައްކަތް މިހާރު ކުރިއަށްދާ ސްޕީޑުގައި ގެންދެވިއްޖެ ނަމަ، މާ ލަސްތަކެއް ނުވެ ނިމޭނެ ކަމަށެވެ.
ތިލަމާލެ ބުރިޖުގެ ތަނބެއް ނުފެނިގެން ހަޖޫޖެހިއިރު، ބުރިޖުގެ މުހިއްމު އަދި ބައިވަރު އެތައް މަސައްކަތެއް ނިމިދިޔަ ސަރުކާރުގައި އެތަނުގައި ކުރިއަށްދިޔަކަން މި ސަރުކާރުން ޖަޕާނަށް ކަނޑައަޅުއްވާފައި ހުންނަވާ ސަފީރު، އަދި ނިމިދިޔަ ސަރުކާރުގެ ޒުވާނުންނާބެހޭ ވަޒީރު އަހުމަދު މަހްލޫފު ވެސް މީގެ ކުރިން ވިދާޅުވެފައިވާއިރު، އެ ވީޑިއޯތައް ވެސް މިހާރު ސޯޝަލް މީޑިއާގައި ދަނީ ދައުރުވަމުންނެވެ.
