އިންޑިއާއިން އަޅާ ބްރިޖެއްގައި ކޮލިޓީ ނުހުންނާނެ ކަމަށް ކުރިން ވިދާޅުވި ނަމަވެސް ތިލަމާލެ ބްރިޖުގެ ކޮލިޓީ ރަނގަޅު ވާނެ ކަމަށް ރައީސް މުއިއްޒު ވިދާޅުވެއްޖެ
27 އޯގަސްޓު 2026 | ބުރާސްފަތި 02:54ތިލަމާލެ ބްރިޖުގެ މަޝްރޫއު ކާމިޔާބުކަމާއެކު ނިންމުމަށް އިންޑިއާ ސަރުކާރާއެކު މަސައްކަތް ކުރައްވަމުންދާ ކަމަށާއި، މި މަޝްރޫއުގެ ފެންވަރު ރަނގަޅުވާނެ ކަމުގެ ޔަގީންކަން ރައީސް މުއިއްޒު ދެއްވައިފި. މި މަސައްކަތް ގާތުން ބެއްލެވުމަށް ހައި ލެވަލް ކޮމިޓީއެއް އެކުލަވާލައްވާފައިވާއިރު، ސިނަމާލެ ބްރިޖުގެ ކޮލިޓީ ކޮންޓްރޯލް ބެލެހެއްޓި ކުންފުނިން މި ބްރިޖުގެ މަސައްކަތް ވެސް ސުޕަވައިޒް ކުރަމުންދާކަން ރައީސް ފާހަގަކުރެއްވި
ނޭޝަން ޗެޓް ޕްރޮގްރާމުގައި ރައީސް މުއިއްޒު ވާހަކަފުޅު ދައްކަވަނީ | ރައީސް އޮފީސް
އިންޑިއާއިން އަޅާ ބްރިޖެއްގައި ކޮލިޓީ ނުހުންނާނެ ކަމަށް ވެރިކަމަށް ވަޑައިގަތުމުގެ ކުރިން ވިދާޅުވި ނަމަވެސް، ތިލަމާލެ ބްރިޖުގެ ކޮލިޓީ ރަނގަޅު ވާނެ ކަމަށް އަދުގެ ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ދައުލަތުގެ މީޑިއާއިން ގެނެސްދޭ ނޭޝަން ޗެޓް ޕްރޮގްރާމްގައި ވާހަކަފުޅު ދައްކަވަމުން ރައީސް މުއިއްޒު ވިދާޅުވީ އިންޑިއާގެ ބޮޑުވަޒީރު ނަރަންދުރަ މޯދީ އާއެކު ބޭއްވެވި ފުަރަތަމަ ބައްދަލުވުމުގައި، ތިލަމާލެ ބްރިޖުގެ މަޝްރޫއު ކާމިޔާބު ކަމާއެކު ނިންމާލަން ބޭނުންފުޅުވާ ކަމަށް އެމަނިކުފާނު އިސްނަންގަވައިގެން ވިދާޅުވި ކަމަށެވެ. އަދި އެއަށްފަހު ބްރިޖުގެ މަޝްރޫއު ގާތުން ބެއްލެވުމަށްޓަކައި ހައި ލެވަލް ކޮމިޓީއެއް އެކުލަވާލެއްވި ކަމަށެވެ.
ސިނަމާލެ ބްރިޖު އެޅިއިއިރުގައި ވެސް އެންމެ ބޮޑު އިސްކަމެއް ދެއްވައިގެން އެމަނިކާފާނު އަމަލީ ގޮތުން މަަސައްކަތް ކުރެއްވިކަން ފާހަގަކުރައްވައި، ރައީސް މުއިއްޒު ވިދާޅުވީ، ތިލަމާލެ ބްރިޖު މަޝްރޫއު ވެސް އެގޮތަށް ކުރިއަށްގެންދަން އެދިވަޑައިގެންނެވި ކަމަށެވެ. އަދި ބޮޑުވަޒީރު މޯދީ އާއެކު ދެއްކެވި ވާހަކަފުޅަށް ފަހު، އިންޑިއާ ސަރުކާރުގެ ފަރާތުން ވެސް މި މަޝްރޫއަށް އިސްކަމެއް ލިބުނު ކަމަށް ވިދާޅުވި އެވެ.
ރައީސް މުއިއްޒު ވަނީ މާ ލަސްތަކެއް ނުވެ މާލެއާއި ވިލިމާލެއާ ދެމެދު ދަތުރުކުރެވެން ފެށޭނެ ކަމަށް އުއްމީދު ކުރައްވާ ކަމަށް ވިދާޅުވެފަ އެވެ.
މީގެ ޓެކްނިކާލިޓީތަކަށް ދެން ދާން ޖެހޭނީ އަޅުގަނޑަށް މައުލޫމާތު ލިބޭ ގޮތުގައި ގުޅީފަޅާއި ހަމައަަށް ބްރިޖު ގުޅިގެން މުޅި ބުރިޖުގައި ތާރު އެޅުމާއި މިކަންކަން ވެސް ދާން އޮތީ ސައިޓު ހުރީ ގުޅީފަޅުގައި، އެހެންވީމަ ވިލިނގިލި އާއި މާލެއާ ދެތެރޭ އަނެއްހެން ގުޅިގެން ދިޔަޔަސް ބޭނުން ކުރަން ފެށޭ ހިސާބަކަށް އަދި ނުއެއް ދޭ، މިއާއެކީގައި ގޮސް ތިލަފުއްޓާއި ހަމައަށް ގޮސް ކަންނެ މި ބްރިޖު ގުޅިގެން ބޭނުން ކުރަން ފެށޭނީ، އަޅުގަނޑަކަށް މުޅި ތަފްސީލެއް އެންމެ ފަހުގެ އަޕްޑޭޓެއް ލިބިފައެއް ނެތްރައީސް މުއިއްޒު
ތިލަމާލެ ބްރިޖުގެ ކޮލިޓީ ވެސް ބަލަހައްޓަނީ ސިނަމާލެ ބްރިޖު އެޅިއިރު ބެލެހެއްޓި ކުންފުނިންކަން ފާހަގަކުރައްވާ، ރައީސް މުއިއްޒު ވިދާޅުވީ މި ބްރިޖުގެ ވެސް ކޮލިޓީ ރަނގަޅު ވާނެ ކަަމަށެވެ.
ތިލަމާލެ ބްރިޖުގެ މަޝްރޫއަކީ ރައީސް އިބްރާހީމް މުހައްމަދު ސޯލިހުގެ ސަރުކާރުން ފަށާފައިވާ މަޝްރޫއެކެވެ. މި މަޝްރޫއުގެ މަސައްކަތް ހަވާލުކޮށްފައި ވަނީ އިންޑިއާގެ އެފްކޮންސް އިންފްރާސްޓްރަކްޗަރ ކުންފުންޏާ އެވެ. މި މަޝްރޫއަށް އޭރުގެ އިދިކޮޅު ފަރާތްތަކުން، އަދި އަދުގެ ސަރުކާރުގެ އިސްވެރިން ވަރަށް ބޮޑަށް ފާޑު ވިދާޅުވެފައިވެ އެވެ.
