ބައި އިލެކްޝަންގައި ވާދަކުރާ ސޮޑާ އަކީ އަވަށްޓެރި ދެ ގައުމަކުން ބޮއިކޮޓްކޮށްފައިވާ މީހެއް: އަސްލަމް
އައްޑޫ ހިތަދޫ އުތުރު ދާއިރާގެ ބައި އިލެކްޝަނާ ގުޅިގެން ބޭއްވި ޖަލްސާގައި ވާހަކަދައްކަވަމުން، އެމްޑީޕީގެ ކެނޑިޑޭޓް އަބްދުﷲ ސޯދިގަކީ ފައިސާއަށް ނުވިކޭނެ އިޚުލާސްތެރި ބޭފުޅެއް ކަމަށް ކުރީގެ މަޖިލިސް ރައީސް މުހައްމަދު އަސްލަމް ވިދާޅުވި.
ރައްޔިތުންގެ މަޖިލީހުގެ ކުރީގެ ރައީސް އަސްލަމް، އެމްޑީޕީގެ "ސޯބެ ޖަލްސާ"ގައި ވާހަކަދައްކަވަނީ | އެމްޑީޕީ
އައްޑޫ ހިތަދޫ އުތުރު ދާއިރާގެ ބައި އިލެކްޝަންގައި ވާދަކުރައްވާ ޕީއެންސީގެ ކެނޑިޑޭޓް އަހުމަދު ސައީދު (ސޮޑާ) އަކީ އަވަށްޓެރި ދެ ގައުމަކުން ބޮއިކޮޓްކޮށްފައިވާ މީހެއް ކަމަށް ރައްޔިތުންގެ މަޖިލީހުގެ ކުރީގެ ރައީސް މުހައްމަދު އަސްލަމް ވިދާޅުވެއްޖެ އެވެ.
ބުރާސްފަތި ދުވަހުގެ ރޭ އެމްޑީޕީ އިން ބޭއްވި ޖަލްސާގައި އަސްލަމް ވިދާޅުވީ ގައުމަކަށް މީހަކު ނާރުވާނީ ބޮޑު ސަބަބެއް އޮތުމުން ކަމަށެވެ. ނަމަވެސް ސޮޑާ ބޮއިކޮޓް ކުރި ދެ ގައުމަކީ ކޮބައިކަމެއް އަސްލަމް ހާމަ އެއް ނުކުރައްވަ އެވެ. އަދި އޭނާ ބޮއިކޮޓް ކުރި ސަބަބު އެނގިވަޑައި ނުގަންނަވާ ކަމަށް އަސްލަމް ވަނީ ވިދާޅުވެފަ އެވެ.
އެ ޖަލްސާގައި ވާހަކަދައްކަވަމުން އެމްޑީޕީ އިން އެ ދާއިރާ އަށް ވާދަކުރާ ކެނޑިޑޭޓް ކުރީގެ މޭޔަރު އަބްދުﷲ ސޯދިގު (ސޯބެ) އަށް އަސްލަމް ވަނީ ވަރަށް ބޮޑަށް ތައުރީފްކުރައްވާފަ އެވެ. އަދި އެމްޑީޕީގައި ތިބީ އެ ޕާޓީ އަށް ވެރިކަން ގެއްލުމުން، އައްޑޫގައި ތަންތަނުގައި ހުޅުޖަހައި ހަމަނުޖެހުން ހިންގައި، ޓެރަރިސްޓުންތަކެއް ކަމަށް ބުނެ ސަރުކާރުގެ އިސްވެރިން ދައްކާފައިވާ ވާހަކަތަކަށް އަސްލަމް ވަނީ ރޭ ރައްދު ދެއްވާފަ އެވެ. އޭނާ ވިދާޅުވީ 7 ފެބްރުއަރީގެ މައްސަލައިގައި ދައުވާ ކުރި މީހުންގެ ތެރޭގައި އަހުމަދު ސައީދު ހިމެނޭ ކަމަށާއި އެހެންކަމުން ޓެރަރިސްޓެއްގެ ގޮތުގައި މީހަކު ބަލާ ނަމަ ބެލެވޭނެ މީހަކީ އެއީ ކަމަށް އަސްލަމް ވިދާޅުވި އެވެ.
އެމްޑީޕީ އިން ހޯދި ހައްގުތައް ބީވެގެންދާ އިރު ބޭނުންވަނީ ސޯބެ ފަދަ ޔަޤީންކަން އޮތް މެމްބަރުން ކަމަށް އަސްލަމް ވިދާޅުވި އެވެ. ސޯބެ އަކީ އެމްޑީޕީ އަށް ލިބިފައިވާ ވަރުގަދަ ތަނބެއް ކަމަށް ވެސް އޭނާ ވިދާޅުވި އެވެ. ސޯބެ އަކީ ފައިސާ އަށް ވިކޭނެ ބޭފުޅެއް ނޫން ކަމަށާއި އެއީ އިޚުލާސްތެރި އެއް ކަމަށް ވެސް އޭނާ ވިދާޅުވި އެވެ.
"މިއީ މެމްބަރުގެ ހުންނަން ޖެހޭ ކޮލިޓީ. މެމްބަރުގެ ހުންނަން ޖެހޭ ސިފަ." އަސްލަމް ވިދާޅުވި އެވެ.
މުލިއާގެއިން ބަހާ ފައިސާގެ ފަހަތުން ދުވާ މީހަކަށް ރައްޔިތުންނަށްޓަކާ ކޮށްދެވޭނެ ކަމެއް ނުއޮންނާނެ ކަމަށް ވެސް އަސްލަމް ވަނީ ވިދާޅުވެފަ އެވެ.
