މަޝްރޫއުތަކުގެ ހިންގުން ސުމެއްގައި، އެކަމަކު ފެންނަނީ ކޮންމެ ކަމެއްގައި ކްރެޑިޓްނަގަން އުޅޭތަން!

ތިލަމާލެ ބްރިޖުގެ މަޝްރޫއާ ގުޅޭގޮތުން މި ސަރުކާރުން ދައްކަމުންދާ ވާހަކަތަކަށް ބަލާއިރު ފެންނަނީ ދައުލަތްތައް ހިނގާ އާންމު އުސޫލު ޤަބޫލުނުކޮށް، ސަރުކާރުން ކަންކަމުގެ ހަގީގަތް އޮޅުވާލުމަށް މަސައްކަތް ކުރަމުންދާ މަންޒަރެވެ. މިއީ ދިވެހި ރައްޔިތުންގެ ނަމުގައި، ދައުލަތުގެ މުއައްސަސާތަކާއި ބައިނަލްއަގުވާމީ ބައިވެރިން މެދުވެރިކޮށް ފަންޑު ހޯދައި، އަމަލީ މަސައްކަތް ފަށައިގެން ކުރިއަށްގެންދާ ސަރުކާރުގެ އުމްރާނީ ތަރައްގީގެ މަޝްރޫއެކެވެ.

މިދިޔަ ސަރުކާރުން ފެށި މި މަޝްރޫއު ނިންމުމަށް މި ސަރުކާރުން އެތައް ޑެޑްލައިނެއް ދެމުންގޮސް، މިހާރު ރައީސް ވިދާޅުވަނީ މިއީ މި ސަރުކާރުގައި ސުމަކުން ފަށަން ޖެހުނު މަޝްރޫއެއް ކަމަށެވެ. ނަމަވެސް އެއީ ހަގީގަތެއް ނޫންކަން ރެކޯޑުތަކުން ވެސް އެހުރީ ފެންނާށެވެ.

ސަރުކާރާއި ދައުލަތް ހިނގާ ގޮތަކީ، އެއް ސަރުކާރަކުން ކުރާ ކަންކަން ދެން އޮންނަ ސަރުކާރަކަށް ވާރުތަވެގެން ދިއުމެވެ. އެއީ އެ ސަރުކާރެއްގެ އަރަންޏާއި ދަރަނި ވެސް ހިމެނޭ ގޮތަށެވެ. ހިނގަހިނގާހުރި މަޝްރޫއާއި ނިމި، ރިބަންކަނޑަން ވެފައި ހުރި މަޝްރޫއުތަކާއި، މުޅިން އަލަން ފަށަން ޖެހިފައި ހުރި މަޝްރޫއުތައް ވެސް ހިމެނޭ ގޮތަށެވެ.

އެއް ސަރުކާރަކުން މަޝްރޫއެއް ފަރުމާކޮށްފާނެ އެވެ. އަނެއް ސަރުކާރަކުން އެކަމަށް ބޭނުންވާ ފައިސާ ހޯދަފާނެ އެވެ. އަދި އެހެން ސަރުކާރަކުން އަމަލީ މަސައްކަތް ފަށައި، އަނެއް ސަރުކާރަކުން އެ މަސައްކަތް ހަލުވިކޮށްފާނެ އެވެ. އަދި ބައެއް ފަހަރު، އެ މަޝްރޫއެއް ނިމި ރަސްމީކޮށް ރިބަން ކަނޑާއިރު ހުންނަވަނީ މުޅިން އެހެން ސަރުކާރެއްގެ ވެރިއަކަށް ވެސް ވެދާނެ އެވެ. މިއީ ސަރުކާރުތައް ހިނގާ އާންމު އުސޫލެވެ.

އާދެވޭ ކޮންމެ ސަރުކާރަކަށް، ކުރީ ސަރުކާރުން ވާރުތަވި މަޝްރޫއެއްގެ ފެންނަން ހުރި ބޮޑެތި މަރުހަލާތައް ނިމެންދެން އެއީ ނެތް މަޝްރޫއެއް ކަމަށް ކަނޑައެޅަންވެއްޖެނަމަ، ހައްތަހާވެސް މި ޤައުމުގައި ތިބޭނީ މަޝްރޫއުތަކުގެ ބާނީންނެވެ.

ތިލަމާލެ ބްރިޖު މަޝްރޫއަށް ބަލާއިރު ވެސް، ސަރުކާރު ބަދަލުވި ނަމަވެސް ދައުލަތް ދެމިއޮތެވެ. މަޝްރޫއު ވެސް އޮތެވެ. އެ މަޝްރޫއުގެ ފަހަތުގައި އޮތް ބައިނަލްއަގުވާމީ ބައިވެރިވުން ވެސް ދެމިއޮތެވެ. އަދި މަސައްކަތް ވެސް ކުރިއަށް ދިޔަ އެވެ. ބަދަލުވީ ހަމައެކަނި އެ މަޝްރޫއުގެ ދެން އޮތް މަރުހަލާތައް ބެލެހެއްޓުމާ ހަވާލުވި ސަރުކާރެވެ.

ރައީސް މުއިއްޒުގެ ސަރުކާރުގައި ތިލަމާލެ ބްރިޖުގެ މަސައްކަތް ނިމިއްޖެނަމަ އެކަމުގެ ކްރެޑިޓް އެމަނިކުފާނު ނެންގެވުމަކީ މައްސަލައެއް ނޫނެވެ. މާލެ އާއި ވިލިމާލެ ގުޅުވައިދޭ ބައި ނިމުމަކާ ގާތްވެފައިވާނަމަ، އަދި ވިލިމާލެ އާއި ގުޅީފަޅު ގުޅުވައިދޭ މަސައްކަތް ބާރަށް ކުރިއަށް ގެންގޮސް، ތިލަފުއްޓާ ހަމައަށް ކުރާ މަސައްކަތް ހަލުވިވެފައިވާނަމަ، އެއީ މި ސަރުކާރަށް ފާހަގަކުރެވިދާނެ ކާމިޔާބީތަކެކެވެ.

ނަމަވެސް، ހައްގު ކްރެޑިޓް ހޯދުމަށްޓަކައި ތާރީޚު އޮޅުވާލާކަށް ނުޖެހެ އެވެ. މިއީ ހަމައެކަނި ރައީސް މުއިއްޒު އައްވަލަށް ފެއްޓެވި އަދި ހުރިހާ މަސައްކަތެއް ކުރެއްވި މަޝްރޫއެއްކަމަށް ހައްދަވައި، ސިޔާސީ ކްރެޑިޓް ހޯއްދެވުމަށް ވެސް ތާރީޚު އޮޅުވާލައްވައިގެން ނުވާނެ އެވެ.

ރައީސް މުއިއްޒު މަގާމާ ހަވާލުވެވަޑައިގަތުމުގެ ކުރިން، ބްރިޖުގެ އޮނިގަނޑުގެ ބޮޑެތި ބައިތައް އުފައްދައި، ކާސްޓިން ފެސިލިޓީތައް ގާއިމުކޮށް، ދަގަނޑު ހޮޅި ނުވަތަ ސްޓީލް ކޭސިންގްތައް ޖެހުމަށްޓަކައި ކުރަންޖެހޭ މަސައްކަތްތައް ކުރެވިފައި ހުރިކަން ރެކޯޑުތަކުން ފެންނަން ހުރިއިރު، އެ މަޝްރޫއަކީ އެމަނިކުފާނުގެ ސަރުކާރުން އަލުން ފެށި މަސައްކަތެއްގެ ގޮތުގައި ސިފަކުރެއްވުމަކީ، އެންމެ ރަނގަޅަށް ބުނާނަމަ، ހަގީގަތުގެ އެއްބައި ފޮރުއްވުމެވެ. އާންމުންނަށް ހަގީގަތް އޮޅުވާލައި، މަގުފުރެއްދުމެވެ.