މުއިއްޒޫ. "ރޯމާ ދުވާލު ތިޔަ ގޮވަނީ ލޮލަށް ބޮލަށް"
27 އޯގަސްޓު 2026 | ބުރާސްފަތި 13:13ތިލަމާލެ ބްރިޖުގެ މަޝްރޫއަކީ ރައީސް ޑރ. މުއިއްޒުގެ އަމިއްލަ މަސައްކަތްޕުޅެއްގެ ގޮތުގައި ދެއްކެވުމަށް ދައުލަތުގެ މީޑިއާގައި ދެއްކެވި ވާހަކަފުޅުތަކަށް އާންމުންގެ ބޮޑެތި ފާޑުކިޔުންތަކެއް ވަނީ އަމާޒުވެފައި. ކުރީ ސަރުކާރުން ފެށި މި މަޝްރޫއާ ގުޅޭގޮތުން ހަގީގަތާ ޚިލާފު ވާހަކަދައްކަވާ ކަމަށް ބުނެ، އިންޑިއާއާ މެދު ގެންގުޅުއްވި ސިޔާސަތު ބަދަލުވުމާއި ސިނަމާލެ ބްރިޖުގެ މަސައްކަތުގައި ހުރި އުނިކަންކަން މި ލިޔުމުގައި ފާހަގަކޮށްފައިވޭ
ރައީސް ޑރ. މުއިއްޒު | ރައީސް އޮފީސް
މަގުމަތިން ދިމާވި މީހަކު ބުންޏެވެ. "މިއީ ދެން ތަންކޮޅެއް ބޮޑުވަރެކެވެ. މީނާ ހަމަ ބާވައޭ ވެސް ހިތަށް އަރަ އެވެ".
ވީ ކީއްހޭ އަހާލީމާ ދެން ވެސް ދަމާލީ އޭނާގެ ފަތިވަރެވެ. "އާނ.. ފަހެ ރޯމާ ދުވާލު އެ ގޮވަނީ މީހުންގެ ލޮލަށް ބޮލަށް ވިއްޔާ އެވެ. މީނާ ހިތުން އެހެން މީހުންނަކީ ދެން އެއްވެސް ވަރަކަށް ތަންދޮރު ވެސް ދަންނަ ބައެއް ނޫނެވެ"
ތަފްސީލު ކޮށްދޭން އެދުމުން ބުނީ "ރޭގަ އެޔޮށް ދެއްކި ވާހަކައެއް އަޑު އަހާލަ ބަލާށޭ އެވެ. ދައުލަތުގެ ޓީވީގައި ބަޔަކު ލައްވާ ސުވާލު ކުރުވައިގެން އެހެރަ ހަދާލި ދޮގުތަކާއި ކަނޑާލި ފޮންޏެއް ނިކަން ބަލާލަ ބަލާށެވެ". އެ މީހާ ބުންޏެވެ.
އެ ބުނާ ޓީވީ ޝޯވއެއްގައި ދެއްކެވި ވާހަކަ ބަލާލަން މަޖުބޫރުވެގެން ބަލާލާ ހިތްވީ ދެނެވެ.
އޭނާ އެބުނީ ތެދެކެވެ. އޭގައި މުއިއްޒު ދެއްކެވި މައިގަނޑު އެއް ވާހަކައަކީ ތިލަމާލެ ބްރިޖަކީ މުއިއްޒުގެ އެއްޗެއްކަމަށް ދައްކަން ދެއްކެވި ވާހަކަ އެވެ. ކުރީ ސަރުކާރުން ނަމެއްގައި ފެށިއަސް އެއީ ސީދާ މުއިއްޒުގެ މަސައްކަތް ކަމަށް ރައްޔިތުންނަށް ވިސްނައިދޭން ކުރެއްވި މަސައްކަތެވެ. ގޭގައި ހުންނެވިއިރު ކުޑަދޮރުން އެތަނުގެ މަސައްކަތް ދިޔަގޮތް ފެނިވަޑައިގެންނެވި ވާހަކައާއި ތަނބެއް ޖަހަން އުޅުނު ބަޔަކާއި ކެރޭނެއް ގެންގުޅުނު ވާހަކަ ފަދަ ލައްކަ މޮޅު ވާހަކަ ދައްކަވައިފި އެވެ. އިންޑިއާގެ ބޮޑުވަޒީރާ ބައްދަލު ކުރައްވާ އެކަން އަވަސް ކުރުމަށް ދެގައުމުން ކޮމެޓީއެއް ނެންގެވި ވާހަކައާއި ވެރިކަމުގެ ކުރީކޮޅުން ފެށިގެން އަމަލީގޮތުން އެ މަސައްކަތް ކުރައްވަން ފެށްޓެވި ވާހަކަ އެވެ. ކުރީގެ ބްރިޖުގެ ކަންކަން ވެސް 24 ގަޑިއިރު ބެއްލެވި ގޮތަށް ޚާއްސަ އިސްކަމެއް ދެއްވި ވާހަކަ އެ ދެއްކެވީ ހާދަ މޮޅަށެވެ. މި ރާއްޖޭގައި ނޫޅޭ މީހަކަށް އަދި މި މަންޒަރުތައް ލޮލަށް ނުފެންނަ މީހަކަށް ކިޔައިދިންނަމަ ބޭއިޚްތިޔާރުގައި ހާދަ މޮޅޭ، ތިޔަވަރެއް ހަމަ ނެތޭ ބުނާހާ މިންވަރަށެވެ.
ނޫނޭވާ މޮޅެވެ. މޫނަށް ރުލެއް ވެސް އަރުވާ ނުލައި ޒާތަކަށް ހިނިފުޅުވަޑުވައިގެން ހުންނަވައިގެން ތިޔަ ދެއްކެވި ވާހަކައެއްތާ އެވެ.
މުއިއްޒޫ އެވެ. އަހަރެން ހުރީ ދެން ތިޔަ ކަހަލަ ތާކުންތާކު ނުޖެހޭ ވާހަކަތަކާމެދު އެއްޗެއް ނުބުނެ ވޭތޯ އެވެ. އެކަމަކު ދުލުގައި ހިފާ ތިޔަ ދަމަނީ މާބޮޑަށް ވިއްޔާ އެވެ.
މުއިއްޒޫ އެވެ. ތިލަމާލެ ބްރިޖުގެ ވާހަކަ ރަނގަޅުވާނީ އިތުރަށް ނުދެއްކިއްޔާ އެވެ. މީހުން ބުނެ އުޅެ އެވެ. ކޮނުނު ވަރަކަށް ގިނަވާނީ ފަހެވެ. އަމިއްލަ ފޮށާ ނުބޭލެނީސް ބައެއް ވާހަކަ ދެއްކުން ހުއްޓާލުމަށް ވެސް އިހުތިބީން ހަނދާން ކޮށްދީ އުޅެ އެވެ.
މުއިއްޒޫ އެވެ. އެ ބްރިޖުގެ މަސައްކަތް އޭރު ދިޔަވަރުގެ ވާހަކަ އަހަރެން ދައްކާކަށް ނެތީމެވެ. އެ ވާހަކަ އެންމެ ރަނގަޅަށް އަހަން ބޭނުމިއްޔާ ދެން ވެސް އެންމެ ރަނގަޅުވާނީ ޖަޕާނަށް ފޮނުވާފައި އެ ހުންނެވި ކަލޭގެ ގެނެސް އަހާލިއްޔާ އެވެ. ވަރަށް ތަފްސީލުކޮށް އެ ވާހަކަ އަދިވެސް ކިޔައިދީފާނެ އެވެ. މިހާރު ހުންނެވި ކޮޅުން މިވަގުތު ރާގު ބަދަލުވެގެން އެހެން ގޮތަކަށް ކިޔައިދިނަސް އެ ވީޑިއޯއެއް ފުހެ ނުލެވޭނެ އެވެ. އަމުދުން ތިޔަ ބްރިޖަކީ މަނިކުފާނާ ވާވެސް އެއްޗެއް ނޫންކަން ނުދަންނާނެ މީހަކު މި އުޑުބަޅުކުރި ހިސާބަކު ނޫޅޭނެ އެވެ.
މުއިއްޒޫ އެވެ. ތިޔަ ބުނާ މޯދީއެއް ކައިރީ ބުނެގެން އަވަސްކުރަން މަސައްކަތް ކުރި ވާހަކަ ބުނީމާ ވެސް މަ ގާތައް އަންނަނީކީ އަމަށަކު ހިންޏެއް ނޫނެވެ.
މުއިއްޒޫ އެވެ. ވެރިކަމުގެ މާމުއި ހަނދުގެ ދުވަސްކޮޅު ޗައިނާއަށް ކުރި ދަތުރާއި އެ ދަތުރުން ލިބުނު ފެހި ސިގްނަލާއެކު އައިސް މޯދީއަށް ވަށިވަށިންދިން ހަނދާން ނެތުނީތޯ އެވެ. ބުލީ ނުކުރުމަށާއި ބެކްޔާޑުގެ ވާހަކައިން ހެއްދެވި ނުހެއްދެވިއަށް ގޮވިކަން ހަނދާން ތިޔަ ނެތުނީ މާ އަވަހަށް ވިއްޔާ އެވެ. އޭރު ރަތްމަހަކަށް ނުގޮވާ ވަރަށް އެއްޗެހި ގޮވާފައި އިންޑިޔާއާ ވައިވެސް ނޭޅި ދުރުގައި ހުންނަން ހޭކި ބޮޑާ ނޭނގޭ މީހަކު އުޅޭނެ ހެނެއް ހިއެއް ނުވެ އެވެ. މަޖާ ވަނީ އޭރު މޯދީ ހުރިކޮޅަށް މޫނު ވެސް އަނބުރާ ނުލާނެ ފަދައަކަށް ހުންނެވި މީހަކު ތިޔަ ބުނާ ވާހަކަ އޭރު ދެއްކީމޭ ބުނީމާ ދެން ހަމަ ހިނި އާދެވެނީ އެވެ. ދެންވާނެ ގޮތެއް ނެތުނީމާ މޯދީ އުނގަށް އެރުނުއިރު ތިޔަ ބްރިޖުގެ މަސައްކަތް ގޮއްސަ އޮތްވަރު ނޭނގޭ މީހަކު މި ރާއްޖެއަކު ނޫޅޭނެ އެވެ.
މުއިއްޒޫ އެވެ. އެ ބްރިޖަކީ އިސްކަމެއް ދީގެން ސީދާ އަމިއްލަ ބެއްލެވުމުގެ ދަށުން ކުރިއަށް ގެންދިޔަ އަމިއްލަ އެއްޗެކޭ ބުނަން ދެން ތިޔަ ދެއްކީ ވެސް އާދައިގެ ހުއްޖަތެއް ނޫނެވެ. ކުރީގެ ބްރިޖު ބެއްލެވި ގޮތަށް ރެއާ ދުވާލު ބެއްލެވި ވާހަކަ އެވެ.
މުއިއްޒޫ އެވެ. އެ ބްރިޖްގެ މަސައްކަތް ބެއްލެވި ގޮތް ވެސް އެނގުނީމާ ވެސް އަންނަނީ ހިންޏެވެ. އެ ބްރިޖުގެ ކުރެހުމުގައި އޮތް ދެ ލޭނެއް ބްރިޖު ނިމުނުއިރު ނެތީމަ އެވެ. އެ ލޭންތަކަށާ އެއްކޮށް ރައްޔިތުންގެ ފައިސާއިން ޚަރަދުކުރި އިރު އެ ލޭނުތައް ގެއްލުނީމާ ވާ އުނދަގުލާއި ދަތި އެނގޭނީ އެ ބްރިޖުން ދަތުރުކުރާ މީހުންނަށެވެ. އެކަމަކު ފޮނިވެލާފައި އަމިއްލަ ކަމެއްގެ ގޮތުގައި ރެއާ ދުވާލު އޮފީހުގައާއި ގޭގައި ވެސް އެ ނޫން ކަމަކަށް ނުބަލަމޭ ބުނީމާ މީހުން ވަރަށް ލައުނަތް ދޭނެވެ. ނަމަނަމަ ދެން ވެސް އިތުރަށް އެ ވާހަކަ ނުދައްކައްޗެވެ. ޔާމީނަށް އަޑު އިވިއްޖިއްޔާ އަނެއްކާ އަރުވާލާނެ ވަރެއް ވެސް ނޭނގެ އެވެ.
މުއިއްޒޫ އެވެ. މަ ދެން މިނިންމާލަނީ އެވެ. އިހުބަހަކާ ފަހު ބަހަކަށް ވެސް ބުނާނަމެވެ. ކިތަންމެ ވަރަކަށް ބަދަލު ކުރަން އުޅުނަސް ހަގީގަތެއް ބަދަލެއް ނުވާނެ އެވެ. ރޭގަނޑަކަށް ދުވާލެއް ނުހެދޭނެ އެވެ. އަދި މީހަކު އެއްޗެއް ކިޔަސް އެންމެންނެއް އެ އަޑެއް ވެސް ނާހާނެ އެވެ. ރޯމާ ދުވާލު މީހުންގެ ލޮލަށް ބޮލަށް ގޮވީމާ ކުދިކިޔާ މީހުން ވާނީ އިތުރެވެ. މަވާ ސަލާމެވެ.
