މޫސުމަށް އަންނަ ބަދަލުތަކާއި ގުޅޭ ގޮތުން ވަކާލާތު ކުރުމުގައި ދިވެހިރާއްޖެ އޮތީ ވަރަށް ކުރީގައި، ނަމަވެސް އެކަން ކޮށްގެން ފައިސާއެއް ނުލިބޭ: އަސްލަމް
3 އޮކްޓޯބަރު 2026 | ހޮނިހިރު 05:53ކާބަން ކްރެޑިޓް މެދުވެރިކޮށް ރާއްޖެއަށް މާލީ މަންފާ ހޯދޭނީ އެކަމަށް ކަނޑައެޅިފައިވާ ޚާއްސަ އުސޫލުތަކުގެ ތެރެއިން މަޝްރޫއުތައް ތަރުތީބުކޮށްގެން ކަމަށް ކުރީގެ މިނިސްޓަރު މުހައްމަދު އަސްލަމް ވިދާޅުވެއްޖެ. މިފަދަ އެހީތައް ރަށްރަށަށް ހޯދައިދިނުމުގައި އަތޮޅު ކައުންސިލްތަކުގެ ދައުރު މުހިންމުކަން ފާހަގަކުރައްވަމުން، އޭނާ ވިދާޅުވީ ކާބަން ކްރެޑިޓަކީ ތިމާވެށީގެ މަޝްރޫއުތަކަށް ބޭނުންވާ އިންވެސްޓްމަންޓް ހޯދުމަށް ބޭނުންކުރެވިދާނެ ވަސީލަތެއް ކަމަށް
ކުރީގެ ހައުސިންގ މިނިސްޓަރު މުހައްމަދު އަސްލަމް | އެމްޑީޕީ
މޫސުމަށް އަންނަ ބަދަލުތަކާއި ގުޅޭ ގޮތުން ވަކާލާތު ކުރުމުގައި ދިވެހިރާއްޖެ އޮތީ ވަރަށް ކުރީގައި ކަމަށާއި، ނަމަވެސް އެކަމަކީ ފައިސާއެއް ލިބޭ ކަމެއް ނޫން ކަމަށް ކުރީގެ ހައުސިންގ މިނިސްޓަރު މުހައްމަދު އަސްލަމް ވިދާޅުވެއްޖެ އެވެ.
އެމްޑީޕީގެ ކޮންގްރެސް ތެރެއިން "ރަށްވެހި ތަރައްގީ" ގެ ނަމުގައި ބޭއްވި އިންވެސްޓްމަންޓް ފޯރަމްގެ ޕެނަލް ޑިސްކަޝަންގައި ވާހަކަދައްކަވަމުން އަސްލަމް ވިދާޅުވީ ފައިސާއަކީ ގައުމެއް ވަލްނަރަބުލް ވުމަކުން ލިބޭ އެއްޗެއް ނޫން ކަމަށާއި ފައިސާ ލިބެނީ ވަކި ތަރުތީބަކުން ކަންތައް ކުރީމަ ކަމަށެވެ.
އެގޮތުން، ރާއްޖޭގައި ކަރބަން ކްރެޑިޓްއަކީ ތަރުތީބު ވެގެން ހިނގާ އެއްޗެއްކަން ދަންނަ ތިބީ މަދުބައެއް ކަމަށް އަސްލަމް ވިދާޅުވި އެވެ. އަދި ސަރުކާރުގެ ތެރޭގައި ވެސް މިކަން ދަންނަ ތިބީ ދެތިން މިނިސްޓަރުން ކަމަށާއި ނަމަވެސް އެބޭފުޅުންނަށް އެ އެނގޭ އެއްޗެއް އެހެން މީހުންނަށް ނޭނގޭ ކަމަށެވެ.
ކަރބަން ކްރެޑިޓަކީ ސޯލަރ ޕެނެލްތަކެއް ބެހެއްޓިއަސް ނުލިބޭ ކްރެޑިޓެއް. ވަކި ގޮތަކަށް ޕްރޮޖެކްޓް އޮންނަން ޖެހޭނެ ތަރުތީބު ކުރެވިފައި. އޭތި އެހެން ނުކޮށް ދެން އެހެން ގޮތަކަށް ކަންތައް ކުރީމަ ވަނީ ކިހިނެއްތޯ. ކަން ނިންމާފައި އަދި އެމީހުން އެސެސް ކުރަމުން ދާނެ، ވެރިފަތް ކުރާނެ، ވެލިޑޭޓް ކުރާނެ، މިހުރިހާ ކަމެއް ކުރާނެމުހައްމަދު އަސްލަމް
އަތޮޅު ކައުންސިލްތައް އަނބުރާ އަންނަން ޖެހޭކަން ފާހަގަކުރައްވާ އަސްލަމް ވިދާޅުވީ، މިފަދަ އެހީތައް ރަށްރަށަށް ފޯރުކޮށްދޭ ތަނަކީ އެއީ ކަމަށެވެ. އަދި ރަށްރަށް ވަކިވަކިން މިފަދަ ކަންކަން ކުރަން އުޅުނީމަ އުނދަގޫތަކާ ކުރިމަތިލާން ޖެހޭ ކަމަށް އަސްލަމް ވިދާޅުވި އެވެ.
ކާބަން ކްރެޑިޓަކީ މަޝްރޫއަކުން ކުރިމަގުގައި ތިމާވެއްޓަށް ކުރާނެ ފައިދާތައް، މުސްތަގުބަލުގައި ލިބޭނެ އާމްދަނީއަކަށް ބަދަލުކޮށްގެން އެ މަޝްރޫއަކަށް ބޭނުންވާ ފައިސާ ހޯދުމަށް ބޭނުންކުރެވިދާނެ ވަސީލަތެކެވެ. މިސާލަކަށް، އިރުގެ ހަކަތަ ނުވަތަ ސޯލާ ފާމެއް ގާއިމުކުރުމަށް ނުވަތަ ކަނޑޫފަލެއް އާލާކުރުމުގެ މަޝްރޫއަކަށް އެއް މިލިއަން ޑޮލަރު ބޭނުންވާ ކަމުގައި ބަލާނަމަ، މިފަދަ މަޝްރޫއަކުން ކުރިމަގުގައި ކާބަން ކްރެޑިޓް އުފެއްދޭނެ ކަމަށް ބަލައި، އިންވެސްޓަރަކު ނުވަތަ ކުންފުންޏަކުން އެ މަޝްރޫއަށް ބޭނުންވާ ފައިސާގެ އެއްބައި ކުރިއާލާ ފޯރުކޮށްދީފާނެ އެވެ.
އެ މަޝްރޫއުގެ މަސައްކަތް ފަށައި، ކްރެޑިޓްތައް ވިއްކައިގެން ލިބޭ ފައިސާ ބޭނުންކޮށްގެން އިންވެސްޓަރުންނަށް ފައިސާ އަނބުރާ ދެއްކުމާއި، ފައިދާ ބެހުމާއި، ނުވަތަ މަޝްރޫއު ހިންގުމުގެ ޚަރަދުތައް ހަމަޖެއްސޭނެ އެވެ. ކުރު ގޮތަކަށް ބުނާ ނަމަ، މިއީ ކުރިމަގުގައި އަގުހުރި ކާބަން ކްރެޑިޓްތަކެއް އުފެދޭނެ ކަމުގެ އުންމީދުގައި، އެ މަޝްރޫއަކަށް މީހަކު ފައިސާ ފޯރުކޮށްދިނުމެވެ.
