އީރާނާ ދެކޮޅަށް ކަނޑުގެ ބްލޮކޭޑް މުއްދަތެއް ނެތި ދެމެހެއްޓޭނެ: ހެގްސެތު

އީރާނާ ދެކޮޅަށް ފަށާފައިވާ ކަނޑުގެ ބްލޮކޭޑް ނުވަތަ އީރާނުގެ ބަނދަރުތައް ބަންދުކުރުން، ވަކި މުއްދަތެއް ނެތް ގޮތަށް ދެމެހެއްޓުމުގެ ގާބިލުކަން އެމެރިކާގެ އަސްކަރިއްޔާގައި އެބަހުރި ކަމަށް އެ ގައުމުގެ ޑިފެންސް ސެކްރެޓަރީ ޕީޓް ހެގްސެތު ބުރާސްފަތި ދުވަހު ވިދާޅުވެއްޖެ އެވެ. އަދި ބޭނުންވާ ހާލަތްތަކުގައި އެ ސަރަހައްދަށް ފޮނުވާފައިވާ މަނަވަރުތައް ބަދަލުކުރަމުން ގެންދެވޭނެ ކަމަށްވެސް އޭނާ ވިދާޅުވި އެވެ.

ހެގްސެތުގެ މި ވާހަކަތަކުން ދޭހަވަނީ، މިދިޔަ ފެބްރުއަރީ މަހު ފެށުނު ހަނގުރާމަ ހުއްޓާލުމަށް މިހާތަނަށް ކުރި މަޝްވަރާތައް ނާކާމިޔާބުވެފައިވާތީ، އީރާނަށް އިގްތިސާދީ ގޮތުން ފިއްތުންތައް ކުރިމަތިކުރުވުމަށް އެމެރިކާގެ އަސްކަރިއްޔާއަށް ބޭނުންވާހާ ދުވަހަކު މި ބްލޮކޭޑް ކުރިއަށް ގެންދެވިދާނެ ކަމުގެ ލަފާ އޭނާ ރައީސް ޑޮނަލްޑް ޓްރަމްޕަށް އަރުވަމުންދާ ކަމެވެ.

ނޫސްވެރިންނާ ވާހަކަދައްކަވަމުން ހެގްސެތު ވިދާޅުވީ، މަނަވަރުތައް ބަދަލުކުރަމުން ގެންދާ އުސޫލުން، ވަކި މުއްދަތެއް ނެތް ގޮތަށް އެމެރިކާގެ ކަނޑުގެ ސިފައިންނަށް މި ބްލޮކޭޑް ދެމެހެއްޓޭނެ ކަމަށެވެ. އޭނާ މިހެން ވިދާޅުވީ މީގެ ކުރިން މެދުއިރުމައްޗަށް ފޮނުވި އެމެރިކާގެ ގައިޑެޑް މިސައިލް ޑިސްޓްރޯޔަރެއް ކަމަށްވާ "ޔޫއެސްއެސް ގްރިޑްލީ" ގެ ފަޅުވެރިންނާ ޕެނަމާގައި ބައްދަލުކުރެއްވުމަށްފަހު އެވެ.

ހުރްމުޒް ކަނޑުއޮޅީގެ ފުރިހަމަ ކޮންޓްރޯލް އޮތީ އެމެރިކާގެ އަތްދަށުގައި ކަމަށް ރައީސް ޑޮނަލްޑް ޓްރަމްޕް ބުދަ ދުވަހު ވަނީ ވިދާޅުވެފަ އެވެ.

ޓްރަމްޕްގެ "ޓްރުތް ސޯޝަލް" ޕްލެޓްފޯމްގައި ކުރެއްވި ޕޯސްޓެއްގައި ވިދާޅުވީ، ހުރްމުޒް ކަނޑުއޮޅީގެ ފުރިހަމަ ބާރު އެމެރިކާއަށް އެބައޮތް ކަމަށާއި، އެ ކޮންޓްރޯލް އެގޮތުގައި ދަމަހައްޓާނެ ކަމަށް ގަބޫލުކުރައްވާ ކަމަށެވެ. އަދި އެމެރިކާގެ ކަނޑުގެ ބްލޮކޭޑަކީ "ދަގަނޑު ފާރެއް" ފަދަ ވަރުގަދަ އެއްޗެއް ކަމަށް އެންމެންވެސް ބުނަމުންދާ ކަމަށާއި، އެކަމާ ދެކޮޅަށް އީރާނަށް ކުރެވޭނެ އެއްވެސް ކަމެއް ނެތް ކަމަށްވެސް ޓްރަމްޕް ވިދާޅުވި އެވެ.

ފެބްރުއަރީ 28 ވަނަ ދުވަހު އެމެރިކާ އާއި އިސްރާއީލުން އީރާނަށް ދޭން ފެށި ހަމަލާތަކާއެކު ހަނގުރާމަ ފެށުމުން، ދުނިޔޭގެ ތެލާއި ގުދުރަތީ ގޭހުގެ ފަސްބައިކުޅަ އެއްބައި އުފުލާ މައި މަގު ކަމަށްވާ ހުރްމުޒް ކަނޑުއޮޅި އީރާނުން ވަނީ ބަންދުކޮށްފަ އެވެ.

މީގެ ރައްދުގައި އެމެރިކާއިން ވަނީ އީރާނުގެ ބަނދަރުތަކަށާއި މުދާ އުފުލާ އުޅަނދުތަކަށް އަމާޒުކޮށް ކަނޑުގެ ބްލޮކޭޑެއް ގާއިމުކޮށްފަ އެވެ. ނަމަވެސް އީރާނުގެ ބަނދަރުތައް ނޫން އެހެން ތަންތަނަށް ދަތުރުކުރާ އުޅަނދުތަކަށް މިނިވަންކަމާއެކު ދަތުރުކުރުމުގެ ފުރުސަތު އޮންނާނެ ކަމަށް އެމެރިކާއިން ބުނެ އެވެ. ހަނގުރާމަ ފެށުނު ފަހުން ވޮޝިންޓަނުން ވަނީ މެދުއިރުމައްޗަށް އެތައް ހާސް ސިފައިންނެއް ފޮނުވާފަ އެވެ. މީގެ ތެރޭގައި ހަނގުރާމަވެރި 20 އަށްވުރެ ގިނަ މަނަވަރު ހިމެނެ އެވެ.

މި ބްލޮކޭޑްގެ ދަށުން އަޅާފައިވާ ފިޔަވަޅުތަކަށް ފުރިހަމައަށް އަމަލުކުރާކަން ކަށަވަރުކުރުމަށްޓަކައި، އޮގަސްޓް މަހުގެ 12 ވަނަ ދުވަހުގެ ނިޔަލަށް އެމެރިކާގެ އަސްކަރީ ބާރުތަކުން ވަނީ ވިޔަފާރިކުރާ 59 އުޅަނދެއްގެ މިސްރާބު ބަދަލުކޮށްލާފަ އެވެ. މީގެ އިތުރުން، 3 އުޅަނދެއްގެ ދަތުރު ހުއްޓުވައި، 2 އުޅަނދަކަށް ސިފައިން އަރައި ބަލައި ފާސްކޮށްފައިވެ އެވެ.

މި ހަފުތާގެ ކުރީކޮޅު، އެމެރިކާގެ އަސްކަރިއްޔާގެ އިންޒާރުތަކަށް ނުކިޔަމަންތެރިވި ޕެނަމާގެ ދިދަ ޖަހާފައިވާ އުޅަނދެއްގެ އިންޖީނު ރޫމަށް، އެމެރިކާގެ ކަނޑުގެ ސިފައިންގެ ހެލިކޮޕްޓަރަކުން ދެ "ހެލްފަޔަރ" މިސައިލް ފޮނުވާލާފައިވާ ކަމަށް އެމެރިކާގެ އަސްކަރިއްޔާއިން ވަނީ ހާމަކޮށްފަ އެވެ.