އީރާނުގެ އަސްކަރީ ގާބިލިއްޔަތު އިއާދަކުރަމުންދާ ހަލުވި މިނުގެ ސަބަބުން އިސްރާއީލަށް ސިހުން: ޖެރޫސަލަމް ޕޯސްޓް

އީރާނުގެ އަސްކަރީ ގާބިލިއްޔަތު އަލުން އިއާދަކުރަމުންދާ ހަލުވި މިނުގެ ސަބަބުން އިސްރާއީލަށް ސިހުން ލިބިފައިވާ ކަމަށް މީޑިއާ ރިޕޯޓްތައް ބުނެފި އެވެ. ހަނގުރާމައިގެ ކުރީކޮޅު އެމެރިކާ އާއި އިސްރާއީލުން ދިން ވަރުގަދަ ހަމަލާތަކަށްފަހު، އީރާނުގެ އަސްކަރީ ގާބިލިއްޔަތު އާދަޔާ ހިލާފު ހަލުވި މިނެއްގައި ކުރިއަރަމުންދާތީ އިސްރާއީލުގެ ދިފާއީ އިސް އޮފިޝަލުން ތިއްބެވީ ހައިރާންކަމެއްގެ ތެރޭގައި ކަމަށް "ޖެރޫސަލަމް ޕޯސްޓް" ނޫހުން ވަނީ ރިޕޯޓްކޮށްފަ އެވެ.

މި ހަފުތާގެ ކުރީކޮޅު، އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) ގެ ޗީފް ކޮމާންޑަރުގެ ސީނިއާ އެޑްވައިޒަރަކު ވިދާޅުވީ، އީރާނުން ބެލިސްޓިކް މިސައިލާއި ޑްރޯން އުފައްދާ މިންވަރު، އެ ތަކެތި ބޭނުންކުރާ މިންވަރަށް ވުރެ އިތުރު ކަމަށެވެ. ބްރިގޭޑިއާ ޖެނެރަލް މުހައްމަދު ރިޒާ ނަގްދީ "ޕްރެސް ޓީވީ" އަށް ދެއްވި އިންޓަވިއުއެއްގައި ވިދާޅުވީ، މި ހަނގުރާމަ އެތައް އަހަރަކަށް ދެމިގެން ދިޔަ ނަމަވެސް، ދުޝްމަނުންނަށް އަމާޒުކޮށް އީރާނުން ފޮނުވާލާ ބެލިސްޓިކް މިސައިލްތަކުގެ ވާރޭ ހުއްޓުމެއް ނެތި ވެހެމުންދާނެ ކަމަށެވެ.

ބުރާސްފަތި ދުވަހު ޝާއިއުކުރި ރިޕޯޓެއްގައި ޖެރޫސަލަމް ޕޯސްޓުން ބުނެފައިވަނީ، އީރާނުގެ ހަތިޔާރު އުފެއްދުން އިތުރުވެފައިވާ ކަމަށް އެ ގައުމުގެ އިސް އޮފިޝަލުން ވިދާޅުވާ ވާހަކަތަކަކީ ތެދު ހަގީގަތެއްކަން މިނިވަން މަސްދަރުތަކުން މިހާރު ކަށަވަރު ކުރެވިފައިވާ ކަމަށެވެ.

ފެބްރުއަރީ މަހުގެ ފަހުކޮޅުން ފެށިގެން އޭޕްރީލް މަހުގެ ކުރީކޮޅާ ހަމައަށް ހިނގި ހަނގުރާމައިގެ އެންމެ ނުރައްކާތެރި މަރުހަލާގައި، އެމެރިކާ އާއި އިސްރާއީލުގެ ފައުޖުތަކުން އީރާނަށް 30،000 އެއްހާ ފަހަރު ހަމަލާދީފައިވާ ކަމަށް އެ ނޫހުގައި ބުނެފައިވެ އެވެ. އަދި މި ހަމަލާތަކުގައި އީރާނުގެ މިސައިލް އުފައްދާ މަރުކަޒުތަކާއި އަސްކަރީ ސިނާއީ 2،600 އަށް ވުރެ ގިނަ ތަންތަނަށް އަމާޒުކޮށް ހަމަލާދީފައިވާތީ، އީރާނުގެ ދިފާއީ ސިނާއަތް އެތައް އަހަރެއް ފަހަތަށް ޖައްސުވާލި ކަމަށް އިސްރާއީލު ޑިފެންސް ފޯސް (އައި.ޑީ.އެފް) އިން މީގެ ކުރިން ދިޔައީ ބުނަމުންނެވެ.

އިސްރާއީލުގެ އޮފިޝަލުން ވިދާޅުވާ ގޮތުގައި، އެމެރިކާ އާއި އިސްރާއީލުގެ ވައިގެ ހަމަލާތަކުގައި ގެއްލުން ލިބުނު ބިމުގެ އަޑީގައިވާ މިސައިލް ސައިޓްތަކަށް އީރާނުން އެހާ އަވަހަށް އަލުން ވަދެފައިވާކަން ފާހަގަކުރެވޭ ކަމަށެވެ. އަދި އޭގެ އިތުރުން، އެ ގައުމުގެ ހަތިޔާރުގެ ގުދަންތައް އަލުން ބިނާކުރުމަށް އީރާނުން އާދަޔާ ހިލާފު އާ އުސޫލުތަކެއް ހޯދާފައިވާ ކަމަށްވެސް އޮފިޝަލުން ވިދާޅުވެ އެވެ.

ތެހެރާނުން މަހަކު 100 އާއި 300 އާ ދެމެދުގެ އަދަދަކަށް މިސައިލް އުފައްދަމުން ގެންދާނަމަ، 2028 ވަނަ އަހަރު އަންނަންވާއިރަށް އެއީ އިސްރާއީލަށް ހުއްޓުވަން އުނދަގޫ ބޮޑު ނުރައްކަލަކަށް ވެދާނެ ކަމަށް އެ ނޫހުން ލަފާކުރެ އެވެ.

މި ހާލަތުގެ ސަބަބުން، އީރާނަށް ދެން ހަމަލާއެއް ދޭންޖެހޭނެތޯ ނުވަތަ ނޫންތޯ ނިންމުމުގައި އިސްރާއީލުގެ މުޅި ސްޓްރެޓެޖީއަށް ބޮޑެތި ބަދަލުތަކެއް އައުން އެކަށީގެންވާ ކަމަށްވެސް އެ ނޫހުން އިތުރަށް ފާހަގަކޮށްފައިވެ އެވެ.

މިކަމާ ގުޅޭގޮތުން ޖެރޫސަލަމް ޕޯސްޓުން ސުވާލު ކުރުމުން އިސްރާއީލު އަސްކަރިއްޔާގެ ތަރުޖަމާނަކު ވިދާޅުވީ، މި މައްސަލައިގެ ނާޒުކުކަމުން، އީރާނުގެ އަސްކަރީ ގާބިލިއްޔަތު އިއާދަވަމުންދާ މިންވަރާ ބެހޭ ސީދާ ތަފްސީލީ ވަޒަންކުރުންތަކެއް ހާމަކުރެވެން ނެތް ކަމަށެވެ. އެއީ އެފަދަ ތަފްސީލުތައް ހާމަކުރުމުން އައި.ޑީ.އެފް އަށް މައުލޫމާތު ލިބޭ މަސްދަރުތަކާއި ބޭނުންކުރާ އުސޫލުތައް ފަޅާއަރައިފާނެތީ ކަމަށް އޭނާ ވިދާޅުވި އެވެ.

"އައި.ޑީ.އެފް އިން ދާނީ ކަންކަން ކުރިއަށްދާ ގޮތް މޮނިޓަރކޮށް، އެކަންކަމަށް ތައްޔާރުވަމުން،" ތަރުޖަމާނު ވިދާޅުވި އެވެ.

ޖޫން މަހުން ފެށިގެން އިސްރާއީލުން އީރާނާ ދެކޮޅަށް އަސްކަރީ ފިޔަވަޅެއް އަޅާފައި ނުވި ނަމަވެސް، ހުރްމުޒް ކަނޑުއޮޅީގެ މައްސަލައިގައި ވޮޝިންޓަނާއި ތެހެރާނާ ދެމެދު އުފެދިފައިވާ ނުތަނަވަސްކަން އަދިވެސް ދަނީ ކުރިއަށެވެ.

ދުނިޔޭގެ ތެލާއި ގުދުރަތީ ގޭހުގެ ވިޔަފާރީގެ ފަސްބައިކުޅަ އެއްބައި ހިއްސާކުރާ މި މުހިންމު ކަނޑުއޮޅިން ދަތުރުކުރާ އުޅަނދުތަކަށް ހަމަލާދޭ ކަމުގެ ރިޕޯޓްތަކާއެކު، އެ ސަރަހައްދުން ދަތުރުކުރާ އުޅަނދުތަކުގެ އަދަދު ދުވާލަކު އަށް އުޅަނދަށް މަދުވެފައިވާ ކަމަށް ރޮއިޓާސް އިން ބުނެ އެވެ. ހަނގުރާމަ ފެށުމުގެ ކުރިން އެ ސަރަހައްދުން ދުވާލަކު 130 އާއި 140 އާ ދެމެދުގެ އަދަދަކަށް އުޅަނދު ދަތުރުކުރެ އެވެ.

އެމެރިކާގެ ރައީސް ޑޮނަލްޑް ޓްރަމްޕް ބުދަ ދުވަހު ވިދާޅުވީ، އެ ކަނޑުއޮޅީގެ "ފުރިހަމަ ކޮންޓްރޯލް" އޮތީ އެމެރިކާ އަތުގައި ކަމަށެވެ. ނަމަވެސް ޖެހިގެން އައި ދުވަހު ތެހެރާނުން ވަނީ އެ ވާހަކަ ދޮގުކޮށްފަ އެވެ. އީރާނުން ބުނީ އެ ކަނޑުއޮޅި އޮތީ "އީރާނުގެ ކޮންޓްރޯލާއި ބެލެހެއްޓުމުގެ ދަށުގައި" ކަމަށާއި، އެމެރިކާގެ އަމަލުތައް ބަދަލުކުރަންދެން އެ ސަރަހައްދު ބަންދުކޮށްފައި އޮންނާނެ ކަމަށެވެ.