އެމެރިކާއާއި އީރާނުގެ މަޝްވަރާތައް މަރުތަޅުއެޅިފައި - އެންމެ ފަހުގެ ތަފުސީލު
13 އޯގަސްޓު 2026 | ބުރާސްފަތި 16:39ހުރްމުޒް ކަނޑުއޮޅީގެ ފުރިހަމަ ކޮންޓްރޯލް އެމެރިކާއަށް އޮތް ކަމަށް ރައީސް ޓްރަމްޕް ވިދާޅުވި ނަމަވެސް، އީރާނުން ވަނީ އެކަން ދޮގުކޮށް އެ ސަރަހައްދު ބަންދުކޮށްފައި. މި މައްސަލައިގައި އީރާނުން އޮމާނާއެކު މަޝްވަރާ ކުރަމުންދާއިރު، ކަނޑުއޮޅި އަލުން ހުޅުވުމަށް އީރާނުން ވަނީ ދަތިކުރުމުގެ ފިޔަވަޅުތައް އުވާލުމާއި ގެއްލުމުގެ ބަދަލު ދިނުން ފަދަ ހަރުކަށި ޝަރުތުތަކެއް ކުރިމަތިކޮށްފައި
މެދުއިރުމަތީގެ ވައިގެ ސަރަހައްދުގައި، އެމެރިކާގެ އެއާ ފޯސްގެ ކޭ.ސީ-135 އާރު ސްޓްރެޓޯޓޭންކަރަކުން އެފް-16 މަރުކާގެ ހަނގުރާމަމަތީ ބޯޓުތަކަށް ވައިގެ ތެރޭގައި ތެޔޮ އަޅަނީ | ސެންޓްކޮމް
ދެ ގައުމުގެ ދެމެދުގައި ސުލްހައިގެ އެއްބަސްވުމަކަށް އައުމަށް ކުރަމުންދާ މަޝްވަރާތައް ކާމިޔާބުވާގޮތް ނުވެފައިވާއިރު، ހުރްމުޒް ކަނޑުއޮޅީގެ ކޮންޓްރޯލް އޮތީ އެމެރިކާގެ އަތްދަށުގައި ކަމަށް ބުނެ އެ ގައުމުން ކުރަމުންދާ ދައުވާތައް އީރާނުން ދޮގުކޮށްފި އެވެ.
ދުނިޔޭގެ ތެލާއި ގޭހުގެ މުހިންމު މަގު ކަމަށްވާ ހުރްމުޒް ކަނޑުއޮޅީގެ "ފުރިހަމަ ކޮންޓްރޯލް" އެމެރިކާއަށް އެބައޮތް ކަމަށް އެމެރިކާގެ ރައީސް ޑޮނަލްޑް ޓްރަމްޕް ބުދަ ދުވަހު ތަކުރާރުކުރެއްވި އެވެ. ނަމަވެސް އީރާނުން ވަނީ ރުޅިވެރިކަމާއެކު އެކަން ދޮގުކޮށްފަ އެވެ. އީރާނުން ބުނަމުންދަނީ އެމެރިކާގެ އުދުވާނުތައް ހުއްޓާލައި، ލިބުނު ގެއްލުމުގެ ބަދަލު ދީ، އަދި އަޅާފައިވާ ދަތިކުރުމުގެ ފިޔަވަޅުތައް އުވާލުމަށް ކުރާ ޝަރުތުތައް ފުރިހަމަނުވަނީސް އެ ކަނޑުއޮޅި އަލުން ނުހުޅުވާނެ ކަމަށެވެ.
"ހުރްމުޒް ކަނޑުއޮޅީގެ ބްލޮކޭޑް ނުވަތަ ބަންދުކޮށްފައި އޮތް އޮތުން މިހާރު ނެތް ކަމަށް ބުނެ އެމެރިކާގެ އޮފިޝަލުން ކުރަމުންދާ ދައުވާތަކާއި އެކްސްގައި ކުރަމުންދާ ޕޯސްޓްތަކުން ހަގީގަތެއް ބަދަލެއް ނުވާނެ،" އީރާނުގެ ޕާޝިއަން ގަލްފް ސްޓްރެއިޓް އޮތޯރިޓީ (ޕީޖީއެސްއޭ) އިން ބުދަ ދުވަހު އެކްސްގައި ކުރި ޕޯސްޓެއްގައި ބުނެފައިވެ އެވެ.
އެ އިދާރާއިން އިތުރަށް ބުނެފައިވަނީ ހުރްމުޒް ކަނޑުއޮޅި އަދިވެސް އޮތީ ބަންދުކޮށްފައި ކަމަށާއި، އީރާނުން ހުށަހަޅާފައިވާ ޝަރުތުތައް ގަބޫލުކުރުމުން ނޫނީ އެތަން އަލުން ނުހުޅުވާނެ ކަމަށެވެ.
ދުނިޔޭގައި އާންމު ހާލަތު އޮންނައިރު ބޭނުންކުރާ ތެލާއި ގޭހުގެ ފަސްބައިކުޅަ އެއްބައި އުފުލާ މި މުހިންމު ކަނޑުއޮޅީގެ އެންމެ ފަހުގެ ހާލަތާއި، މިހާރު ކުރިއަށްދާ މަޝްވަރާތަކާ ގުޅޭގޮތުން މިހާތަނަށް އެނގިފައިވާ މައުލޫމާތުތަކަކީ މިއީއެވެ.
އެމެރިކާއާއި އީރާނުގެ ކުރިމަތިލުމުގެ އެންމެ ފަހުގެ ތަފުސީލަކީ ކޮބައި؟
އީރާނާއި އޮމާންގެ ސަރަހައްދީ ކަނޑުގެ ތެރެއިންލާފައި އޮންނަ މި ހަނި ކަނޑުއޮޅިން، އީރާނުގެ ހާއްސަ ހުއްދައެއް ނެތް އެއްވެސް އުޅަނދަކަށް ދަތުރުނުކުރެވޭނެހެން އީރާނުގެ އަސްކަރިއްޔާއިން މިހާރު ވަނީ ހުރަސްއަޅާފަ އެވެ.
ކަނޑުއޮޅީގެ ކޮންޓްރޯލް އެމެރިކާއަށް އޮތް ކަމަށް ޓްރަމްޕް ވިދާޅުވި ނަމަވެސް، އީރާނުން އެ ސަރަހައްދު ބަންދުކުރުމާ ގުޅިގެން އެ މަގުން ދަތުރުކުރާ އުޅަނދުތަކުގެ އަދަދު ވަނީ ފާއިތުވި އެއް ހަފުތާގެ ތެރޭގައި އެންމެ ދަށްވި މިންވަރަށް ދަށަށް ގޮސްފަ އެވެ.
މީގެއިތުރުން، އެމެރިކާއިން ދަނީ ކަނޑުއޮޅީގެ އެތެރެއާއި ބޭރުގައިވާ އީރާނުގެ ބަނދަރުތައް ބަންދުކޮށް ކަނޑުގެ މަގުން ހުރަސްއަޅަމުންނެވެ. މިދިޔަ އަންގާރަ ދުވަހު އެމެރިކާގެ އަސްކަރިއްޔާއިން ވަނީ އޮމާން ކަނޑުން ދަތުރުކުރި ޕެނަމާގެ ދިދަ ޖެހި އުޅަނދަކަށް ހަމަލާދީފަ އެވެ. އެމެރިކާއިން ތުހުމަތުކުރާ ގޮތުގައި އެ އުޅަނދަކީ އީރާނުގެ ބަނދަރަކަށް ދަތުރުކުރި އުޅަނދެކެވެ. އަދި އެ އުޅަނދަށް ދިން އިންޒާރުތަކަށް އިޖާބަދީފައި ނުވާ ކަމަށްވެސް އެމެރިކާއިން ބުނެ އެވެ.
އީރާނުގެ ފޮރިން މިނިސްޓަރު އައްބާސް އަރާގްޗީ ބުރާސްފަތި ދުވަހު ވިދާޅުވީ، އިންޓެލިޖެންސް މައުލޫމާތު ނުބައިވުމުގެ ސަބަބުން އެމެރިކާއިން ގޯސް ހިސާބުތަކެއް ޖަހާތާ މިހާރު ވަރަށް ދުވަސްވެއްޖެ ކަމަށެވެ. އޭގެ ތެރޭގައި ފެބްރުއަރީ 28 ވަނަ ދުވަހު އިސްރާއީލާ ގުޅިގެން ތެހެރާނަށް ހަމަލާދީ އީރާނާ ދެކޮޅަށް ހަނގުރާމަ ފެށުން އޭނާ ފާހަގަކުރެއްވި އެވެ.
އެކްސްގައި ކުރެއްވި ޕޯސްޓެއްގައި އަރާގްޗީ ވިދާޅުވީ ހުރްމުޒް ކަނޑުއޮޅީގައި އެމެރިކާއިން ހިންގަމުންދާ އަމަލުތަކަކީ އެއަށްވުރެ މާ ބޮޑު ގޯހެއް ކަމަށެވެ. "ދޮގު ހަބަރަށްވުރެ ނުރައްކާތެރީ އޮޅުވާލާފައިވާ އިންޓެލިޖެންސް މައުލޫމާތު،" އޭނާ ވިދާޅުވި އެވެ.
އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އާ ގުޅިފައިވާ ބަސީޖް ޖަމާއަތުގެ ކޮމާންޑަރު ހުއްޖަތުލްއިސްލާމް ހުސައިން ތާއިބު ވެސް ވަނީ ކަނޑުއޮޅި އޮތީ އީރާނުގެ ބާރުގެ ދަށުގައި ކަމަށް ވިދާޅުވެފަ އެވެ.
އީރާނުގެ ފާސް ނިއުސް އެޖެންސީން ރިޕޯޓްކޮށްފައިވާ ގޮތުގައި ތާއިބު ބުރާސްފަތި ދުވަހު ވިދާޅުވީ، ހުރްމުޒް ކަނޑުއޮޅި ބަލަހައްޓައި ކޮންޓްރޯލް ކުރަނީ އިސްލާމީ ޖުމްހޫރިއްޔާއިން ކަމަށާއި، އީރާނުން ދަނީ ފުރިހަމަ ސަލާމަތީ ރައްކާތެރިކަމާއެކު ކުރިއަށް ކަމަށެވެ. އަދި އެމެރިކާއަށް މިހާރު ފެންނަމުންދަނީ އިސްލާމީ އިންގިލާބުގެ ބާރު ކަމަށްވެސް އޭނާ ވިދާޅުވި އެވެ.
އީރާނާއި އޮމާންގެ މަޝްވަރާތަކާ ގުޅޭގޮތުން އެނގެނީ ކޮން އެއްޗެއް؟
އީރާނުން ބުނާ ގޮތުގައި ކަނޑުއޮޅީގެ މައްސަލާގައި އެމެރިކާއާއެކު ސީދާ މަޝްވަރާއެއް ނުކުރެ އެވެ. އޭގެ ބަދަލުގައި މަޝްވަރާ ކުރަމުންދަނީ އޮމާނާއެކުގަ އެވެ. އީރާނުން ހުށަހަޅާފައިވަނީ ކުރިމަގުގައި އެ ކަނޑުއޮޅި ބެލެހެއްޓުމުގައި އޮމާނުން ބައިވެރިވުމަށެވެ.
ޖޫން 17 ވަނަ ދުވަހު އީރާނާއި އެމެރިކާއާ ދެމެދު ސޮއިކުރި ފަހުމުނާމާގެ ދަށުން، 60 ދުވަހުގެ މުއްދަތަށް ކަނޑުއޮޅި ހުޅުވާފައި ބޭއްވުމަށް އީރާނުން އެއްބަސްވި އެވެ. ނަމަވެސް ކަނޑުއޮޅީގެ ކޮންޓްރޯލާއި އުޅަނދުތައް ދަތުރުކުރަންވީ މަގުތަކާ މެދު މާ ގިނަ ދުވަސްތަކެއް ނުވެ ދެބަސްވުންތައް އުފެދުނެވެ. އީރާނުން ކަނޑައަޅާފައިވާ މަގުން ދަތުރުނުކުރާ ކަމަށް ބުނެ ބައެއް އުޅަނދުތަކަށް އީރާނުން ހަމަލާދިނުމާ ގުޅިގެން، އެމެރިކާއާއެކު އޮތް ދެކޮޅުވެރިކަން އަލުން ވަނީ އިތުރުވެފަ އެވެ.
މީގެއިތުރުން، ކަނޑުއޮޅިން ދަތުރުކުރާ އުޅަނދުތަކުން ފީ ނެގުމާ މެދުވެސް އީރާނާއި އެމެރިކާއާ ދެމެދު ހިޔާލުތަފާތުވުންތައް އުފެދުނެވެ. ނަތީޖާއެއްގެ ގޮތުން، އެމެރިކާއިން އީރާނާ ދެކޮޅަށް ހަނގުރާމަ ފެށުމުގެ ކުރިން ހުރިހާ އުޅަނދުތަކަކަށް ހުޅުވާލެވިފައި އޮތް މި ކަނޑުއޮޅި، މިހާރު ވެފައިވަނީ ސުލްހައިގެ މަޝްވަރާތައް ކުރިއަށް ނުގެންދެވި ހުއްޓިފައިވާ އެންމެ ބޮޑު ހުރަހަށެވެ.
މިހާރު އީރާނާއި އޮމާނާ ދެމެދު ކުރިއަށްދާ މަޝްވަރާތަކުގެ ބޭނުމަކީ މި މައްސަލަތަކަށް ހައްލެއް ހޯދުމެވެ.
އަންގާރަ ދުވަހު ގަތަރުން ބުނެފައިވަނީ ހުރްމުޒް ކަނޑުއޮޅިއާ ގުޅޭގޮތުން އީރާނާއި އޮމާނާ ދެމެދު ކުރިއަށްދާ މަޝްވަރާތައް މިހާރު އޮތީ ވަރަށް "ކުރިއަރާފައިވާ މަރުހަލާއެއްގައި" ކަމަށެވެ.
"މެދުވެރިއެއްގެ ހައިސިއްޔަތުން އަޅުގަނޑުމެން ބޭނުންވަނީ ވީހާވެސް އަވަހަކަށް ހުރްމުޒް ކަނޑުއޮޅި އަލުން ހުޅުވުން،" ގަތަރުގެ ފޮރިން މިނިސްޓްރީގެ ތަރުޖަމާނު މާޖިދު އަލް އަންސާރީ ނޫސްވެރިންގެ ބައްދަލުވުމެއްގައި ވިދާޅުވި އެވެ.
މަޝްވަރާގައި ބައިވެރިވާ ފަރާތްތަކުން މަސައްކަތް ކުރަމުންދަނީ އީރާނާއި އޮމާންގެ ސަލާމަތީ ކަންބޮޑުވުންތަކަށް ހައްލެއް ހޯދައިދީ، ވިޔަފާރި އުޅަނދުތަކަށް އަލުން ދަތުރުކުރެވޭނެ ގޮތެއް ހޯދުމަށެވެ.
އީރާނުގެ ފޮރިން މިނިސްޓްރީގެ ތަރުޖަމާނު ވިދާޅުވީ އޮމާނާއެކު ކުރާ މަޝްވަރާތައް ބިނާވެފައިވަނީ، ދެ ގައުމުގެ ސިޔާދަތީ ހައްގުތަކާއި ގައުމީ ސަލާމަތަށް ރިއާޔަތްކޮށް، އުޅަނދުތަކަށް ރައްކާތެރިކަމާއެކު ވަދެ ނިކުމެވޭނެ މަގުތަކެއް ކަނޑައެޅުމުގެ މައްޗަށް ކަމަށެވެ.
މިދިޔަ ހަފުތާގައި އީރާނުން ބުނެފައިވަނީ މި މަގުތަކުގެ ކޯޑިނޭޓްސްތަކާ މެދު އޮމާނާއެކު އެއްބަސްވުމަކަށް އާދެވިފައިވާ ކަމަށެވެ.
އީރާނާއި އެމެރިކާގެ ދެމެދުގައި ކުރިއަށްދާ ފުޅާ ސުލްހައިގެ މަޝްވަރާތަކާ ގުޅޭގޮތުން އެނގެނީ ކޮން އެއްޗެއް؟
އީރާނުން ބުނާ ގޮތުގައި އެމެރިކާއިން ޖުލައި މަހު އަލުން އީރާނަށް ހަމަލާދީ ޖޫން 17 ގެ ފަހުމުނާމާއާ ހިލާފުވެފައިވާތީ، އެމެރިކާއާއެކު ސީދާކޮށް ވާހަކައެއް ނުދައްކާނެ އެވެ.
މިހާރު ޕާކިސްތާނުން ދަނީ މި މަޝްވަރާތައް މެދުވެރިއެއްގެ ހައިސިއްޔަތުން ކުރިއަށް ގެންދިއުމަށް މަސައްކަތް ކުރަމުންނެވެ. ޕާކިސްތާނުގެ އިންޓީރިއާ މިނިސްޓަރު މުހްސިން ނަގްވީ ތެހެރާނުގައި އީރާނުގެ އިސް އޮފިޝަލުންނާ ބައްދަލުކުރައްވައި، އެމެރިކާއާއި އީރާނު އަލުން މަޝްވަރާގެ މޭޒަށް ގެނައުމަށް މަސައްކަތް ކުރަމުންދާ ކަމަށް އަންގާރަ ދުވަހު ވަނީ ބުނެފަ އެވެ.
މިދިޔަ އޭޕްރީލް މަހު އެމެރިކާގެ ނައިބު ރައީސް ޖޭޑީ ވޭންސް އާއި އީރާނުގެ މަޖިލީހުގެ ރައީސް މުހައްމަދު ބާގިރު ގާލީބާފް ވަނީ އިސްލާމްއާބާދުގައި ބައްދަލުކުރައްވައި ސީދާ މަޝްވަރާތަކެއް ބާއްވާފަ އެވެ. އޭގެ ފަހުން ޖޫން 17 ގައި ދެ ފަރާތުން ވަނީ 60 ދުވަހުގެ މަޝްވަރާގެ މަރުހަލާއެއް ފެށުމަށް ފަހުމުނާމާއެއްގައި ސޮއިކޮށްފަ އެވެ. ނަމަވެސް އެކި ދެބަސްވުންތަކާ ހުރެ އެ މަސައްކަތް ކުރިއަށް ނުގޮސް ވަނީ ހުއްޓިފަ އެވެ.
ވޮޝިންޓަންގެ މިޑްލް އީސްޓް އިންސްޓިޓިއުޓްގެ އެލަން އޭޔާ އަލްޖަޒީރާއަށް ވިދާޅުވީ، މިވަގުތު ކުރިއަށްދާ އެންމެ މުހިންމު މަޝްވަރާއަކީ ހުރްމުޒް ކަނޑުއޮޅިއާ ގުޅޭގޮތުން އީރާނާއި އޮމާނާ ދެމެދު ކުރިއަށްދާ ވާހަކަތައް ކަމަށެވެ.
އޭޔާ ވިދާޅުވި ގޮތުގައި އެމެރިކާއިން ދައްކާ އެއްވެސް ވާހަކައަކަށް އިތުބާރު ނުކުރެވޭތީ، އެ ގައުމާއެކު ސީދާ މަޝްވަރާ ކުރުމުގެ ބޭނުމެއް ނެތް ކަމަށް އީރާނުން ދެކެއެވެ.
އެމެރިކާގެ ސެންޓަރ ފޯ އިންޓަރނޭޝަނަލް ޕޮލިސީގެ ސީނިއާ ފެލޯ ނެގާރ މުރުތަޒަވީ ވިދާޅުވީ، ދެ ފަރާތުން ދައްކަމުންދާ ހަރުކަށި ވާހަކަތަކަކީ މަޝްވަރާއަށް ހުޅުވާލާ ދޮރެއްތޯ ނުވަތަ އެއީ ބަދަލުނުކުރާނެ ނިންމުންތަކެއްތޯ ބަލަންޖެހޭ ކަމަށެވެ.
"ދެ ފަރާތުންވެސް ދޫދޭން ތައްޔާރުނަމަ، ހަނގުރާމަ ހުއްޓާލައި ކަނޑުއޮޅި ހުޅުވުމުގެ ފުރުސަތު އެބައޮތް،" މުރުތަޒަވީ ބުދަ ދުވަހު ވިދާޅުވި އެވެ. "ނަމަވެސް ދޫނުދީފިނަމަ، ހުރްމުޒް ކަނޑުއޮޅި ބަންދުވެފައި އޮވެ، މިއީ މެދުއިރުމަތީގައި ނިމުމެއް ނެތް ދިގުލީ ހަމަނުޖެހުމަކަށް ވެގެންދާނެ."
އީރާނާއި އެމެރިކާގެ އެންމެ ފަހުގެ ޝަރުތުތަކަކީ ކޮބައި؟
ނިމިދިޔަ ހަފުތާގެ ބަންދުގައި އީރާނުގެ ސުޕްރީމް ނޭޝަނަލް ސެކިއުރިޓީ ކައުންސިލުން ވަނީ ހުރްމުޒް ކަނޑުއޮޅި ހުޅުވުމުގެ ކުރިން އެމެރިކާއިން ފުރިހަމަކުރަންޖެހޭ އާ ޝަރުތުތަކެއް ކަނޑައަޅާފައެވެ.
އޭގެ ތެރޭގައި ހިމެނެނީ: އީރާނަށް ދޭ އިންޒާރުތަކާއި ގައުމީ އަދި ދީނީ ކަންކަމަށް ކުރާ ފުރައްސާރަ ހުއްޓާލުން؛ އީރާނާއި ލުބުނާން، ފަލަސްތީން، ޔަމަން އަދި އިރާގުގައި ތިބި އީރާނުގެ ބައިވެރިންނަށް ދޭ ހަމަލާތައް ދާއިމީކޮށް ހުއްޓާލުން؛ އެމެރިކާގެ ކަނޑުގެ ބްލޮކޭޑް އުވާލައި އީރާނު ވަށައިގެންވާ ކަނޑާއި ވައިގެ ސިފައިން ބޭލުން؛ "މަޖުބޫރުކޮށްގެން ކުރި ދެ ހަނގުރާމަ" އިން ލިބުނު ގެއްލުމުގެ ބަދަލު ދިނުން؛ ދަތިކުރުމުގެ ފިޔަވަޅުތައް އުވާލުން؛ އަދި ހިފަހައްޓާފައިވާ އީރާނުގެ ފައިސާތައް އެއްވެސް ޝަރުތަކާ ނުލައި ދޫކޮށްލުމެވެ.
ވައިޓް ހައުސްގައި ހޯމަ ދުވަހު ނޫސްވެރިންނާ ވާހަކަދައްކަވަމުން ޓްރަމްޕް ވިދާޅުވީ، އީރާނުގެ ސަބަބުން ފާއިތުވި 50 އަހަރު ލިބުނު ގެއްލުމުގެ ބަދަލު ހޯދުމަށް މަސައްކަތް ކުރައްވާނެ ކަމަށެވެ.
ޓްރަމްޕް ވިދާޅުވި ގޮތުގައި މި ފައިސާއަކީ އެ ސަރަހައްދުގައި މަރުވި އެމެރިކާ ސިފައިންނާއި އީރާނުގެ މުޒާހަރާތަކުގައި މަރުވި މީހުންގެ ބަދަލެވެ. ފާއިތުވި ހަތަރު މަސް ތެރޭގައި އީރާނުގައި 52،000 މީހުން މަރުވެފައިވާ ކަމަށް ޓްރަމްޕް ދައުވާ ކުރެއްވި އެވެ. ނަމަވެސް އީރާނުން ބުނަނީ ޖެނުއަރީ މަހުގެ މުޒާހަރާތަކުގައި މަރުވީ 3،117 މީހުން ކަމަށެވެ. އެމެރިކާގެ ހިއުމަން ރައިޓްސް އެކްޓިވިސްޓްސް ނިއުސް އެޖެންސީ (އެޗްއާރުއޭއެންއޭ) އިން ރިޕޯޓްކޮށްފައިވާ ގޮތުގައި މަރުވި މީހުންގެ އަދަދަކީ ގާތްގަނޑަކަށް 7،000 އެވެ.
ބުރާސްފަތި ދުވަހު އަލްޖަޒީރާގެ ތޯހިދު އައްސީދީ ރިޕޯޓްކޮށްފައިވާ ގޮތުގައި، އީރާނުން މިހާރު އެންމެ ބޮޑަށް އިސްކަންދެނީ ދެ ކަމަކަށެވެ.
"ފުރަތަމަ ކަމަކީ އީރާނުން ބޭނުންވާ ސަލާމަތީ ކަށަވަރުކަން. އެއީ އެއްބަސްވުމަކަށް އާދެވިއްޖެނަމަ ގައުމުގައި ހަމަޖެހުން ގާއިމުވާނެކަން ޔަގީންކުރުން،" ކަމުގަ އެވެ. "ދެވަނަ ކަމަކީ އިގްތިސާދީ ކަންބޮޑުވުންތައް. އެގޮތުން އެމެރިކާގެ ކަނޑުގެ ބްލޮކޭޑް އުވާލުމާއި ދަތިކުރުމުގެ ފިޔަވަޅުތައް ހުއްޓާލުމަކީ އީރާނުގެ މައިގަނޑު ޝަރުތުތައް."
ޓްރަމްޕްގެ ހަރުކަށި ބަސްމަގު މިހެން ހުރި ނަމަވެސް، މަސްރަހު ދިރާސާކުރާ ފަރާތްތަކުން އަލްޖަޒީރާއަށް ބުނެފައިވަނީ، ހަނގުރާމަ އިތުރަށް ފުޅާވިޔަނުދިނުމަށް އެމެރިކާގެ އެތެރެއިން ކުރިމަތިވަމުންދާ ފިއްތުންތަކުގެ ސަބަބުން، އީރާނުގެ ބައެއް ޝަރުތުތަކަށް އެމެރިކާއިން ދޫދޭން ޖެހިދާނެ ކަމަށެވެ.
އެމެރިކާގެ މީޑިއާތަކުން ރިޕޯޓްކޮށްފައިވާ ގޮތުގައި، އެމެރިކާގެ ދިފާއީ ހަތިޔާރު މަދުވަމުންދާތީ، އީރާނަށް ބޮޑެތި ހަމަލާތަކެއް ދޭނެ ކަމަށް ބުނެ ޓްރަމްޕް ދެމުންދިޔަ އިންޒާރުތަކަށް އަމަލީ ސިފައެއް ނުގެނައުމަށް އޭނާ މިހާރު ވަނީ ނިންމަވާފަ އެވެ.
