ހުރްމުޒް ކަނޑުއޮޅި އޮތީ ފުރިހަމަ ކޮންޓްރޯލްގެ ދަށުގައި ކަމަށް އީރާން އިން ބުނެފި

ހުރްމުޒް ކަނޑުއޮޅީގެ ސަރަހައްދުގައި އީރާންގެ ފުރިހަމަ ބާރުވެރިކަން އޮތް ކަމަށާއި، އެ ކަނޑު އޮޅި އޮތީ އީރާންގެ ފުރިހަމަ ކޮންޓްރޯލްގެ ދަށުގައި ކަމަށް އީރާންގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ)ގެ ބަސީޖް ފޯސްގެ ކޮމާންޑަރު ހޮއްޖަތުލް އިސްލާމް ހުސައިން ތައިބް ވިދާޅުވެއްޖެ އެވެ. 

އީރާންގެ ސެމީ އޮފިޝަލް ނޫސް އެޖެންސީ ފާސްގައި ރިޕޯޓު ކޮށްފައިވާ ގޮތުގައި ތައިބް ވިދާޅުވީ، މިއަދު ހުރްމުޒް ކަނޑުއޮޅި އޮތީ އީރާންގެ ހިންގުމާއި، އެ ޤައުމުގެ ބެލުމުގެ ދަށުގައި ކަމަށެވެ. އަދި އީރާން އިން އެންމެ ފުރިހަމަ ގޮތުގައި އެ ޤައުމުގެ ނިންމުންތައް ތަންފީޒު ކުރަމުން ދާނެ ކަމަށް ވެސް އޭނާ ވަނީ ވިދާޅުވެފައި އެވެ.  

ތައިބް މިހެން ވިދާޅުވެފައި ވަނީ، ހުރްމުޒް ކަނޑުއޮޅީގެ ފުރިހަމަ ކޮންޓްރޯލް މިހާރު އެމެރިކާގެ އަތުގައި އޮތް ކަމަށާއި، އެމެރިކާގެ އަސްކަރިއްޔާ އިން އަންނަނީ އެ ސަރަހައްދުގެ ކަންކަން ބަލަމުން ކަމަށް އެ ޤައުމުގެ ރައީސް ޑޮނަލްޑް ޓްރަމްޕް ވިދާޅުވެފައި ވަނިކޮށެވެ. 

ހުރްމުޒް ކަނޑުއޮޅި އަކީ ދުނިޔޭގެ ވިޔަފާރީގައި އެންމެ ފާހަގަކޮށްލެވޭ ސަރަހައްދު ކަމަށްވާއިރު، ދުނިޔޭގެ ތެލުގެ ބާޒާރުގައި ގިނަ ދަތުރުތަކެއް ކުރަނީ މި ކަނޑުއޮޅިިންނެވެ. ހުރްމުޒް ކަނޑުއޮޅީގެ މައްސަލައިގައި އެމެރިކާ އާއި އީރާންއާ ދެމެދު ބޮޑު ނުތަނަވަސްކަމެއް އޮންނަތާ ދުވަސްތަކެއް ވެއްޖެ އެވެ. 

ބަސީޖް ފޯސް އަކީ އީރާންގެ އެންމެ ބާރުގަދަ ސިފައިންގެ ބާރުތަކުގެ ތެރޭގައި ހިމެނޭ އައިއާރުޖީސީގެ ބަޔެކެވެ. މި ފޯސް އިން މައިގަނޑު ގޮތެއްގައި މަސައްކަތް ކުރަނީ އީރާންގެ އިސްލާމީ ނިޒާމު ރައްކާތެރިކޮށް، ދިފާއު ކުރުމަށެވެ.