އެމެރިކާގެ ދަތިކުރުންތަކުގެ ސަބަބުން އީރާން މުޅިން ބަނގުރޫޓުވެއްޖެ، އަދިވެސް ޓްރަމްޕް ހުންނެވީ އިތުރު ފިޔަވަޅު އަޅުއްވަން ތައްޔާރަށް!

އެމެރިކާ އިން އީރާންއާ ދެކޮޅަށް ކުރިމަތިކޮށްފައިވާ ދަތިކުރުންތަކާއި، ކަނޑުގެ ހުރަސްތަކުގެ ސަބަބުން އީރާން އިން މުޅިން ދަރަނިވެރިވެ ބަނގުރޫޓުވެފައިވާ ކަމަށް އެމެރިކާގެ ރިޔާސީ ގަނޑުވަރު، ވައިޓް ހައުސްގެ އިސް އޮފިޝަލަކު ވިދާޅުވެއްޖެ އެވެ. 

މި މައުލޫމާތު ހާމަކުރެއްވި ވައިޓް ހައުސްގެ އޮފިޝަލު ވިދާޅުވީ، އީރާންއާ ދެކޮޅަށް އެމެރިކާ އިން އަޅާފައިވާ އިޤްތިސާދީ ދަތިކުރުންތައް ވަރަށް ބާރުގަދަ ކަމަށާއި، އެޤައުމުގެ މާލީ ނިޒާމު ވަނީ ފުރިހަމަ އަށް ހުސްވެފައި ކަމަށެވެ. އަދި އީރާން އިން ތެލުގެ ވިޔަފާރި ކުރުމަށް ހުރަސް އެޅުމަށް އެމެރިކާ އިން ކަނޑު މަގުން އަޅާފައިވާ ހުރަސްތަކުގެ ސަބަބުން، އެޤައުމުގެ އިޤްތިސާދަށް ވަރަށް ބޮޑެތި ގެއްލުންތައް ލިބިފައިވާ ކަމަށެވެ.

އެއާ އެކު އެ އޮފިޝަލު ވިދާޅުވެފައި ވަނީ، މި ހާލަތުގައި ވެސް އީރާާންއާ ދެކޮޅަށް އަޅާނެ ގިނަ ފިޔަވަޅުތަކެއްގެ ފުރުސަތު އެމެރިކާގެ ރައީސް ޓްރަމްޕްގެ އަތްޕުޅު މަތީގައި އޮތް ކަމަށެވެ. އޭނާ ވިދާޅުވީ ކުރިއަށް އޮތް ތަނުގައި ވެސް، އެމެރިކާ އިން އީރާންއާ ދެކޮޅަށް ދަތި ކުރުން ކުރިއަށް ގެންދާނެ ކަމަށެވެ. 

އެމެރިކާގެ ދަތިކުރުންތަކުގެ ސަބަބުން އީރާާންގެ ތެލުގެ އެކްސްޕޯޓަށް ވަނީ ވަރަށް ބޮޑު ގޮންޖެހުންތަކެއް ކުރިމަތިވެފައި އެވެ. މިއީ އެ ޤައުމުގެ އެންމެ ބޮޑު އާމްދަނީގެ ވަސީލަތަށްވާއިރު، އެކަމުގެ ސަބަބުން އީރާންގެ އިޤްތިސާދަށް ވަރަށް ބޮޑެތި ލޮޅުންތަކެއް އަރާފައިވާ ކަމަށް މާހިރުން އަންނަނީ ފާހަގަ ކުރަމުންނެވެ. 

ބައިނަލްއަޤުވާމީ ޖަމިއްޔާތަކުން ވެސް ބުނަމުން އަންނަ ގޮތުގައި، އީރާންއާ ދެކޮޅަށް އެމެރިކާާ އިން އަޅާފައިވާ ދަތިކުރުމުގެ ފިޔަވަޅުތަކުގެ ސަބަބުން، އީރާންގެ ރައްޔިތުންނަށް ވެސް ވަނީ އެކަމުގެ ތަކުލީފު ޖެހިފައި އެވެ. އަދި އެ ޤައުމުގެ ރައްޔިތުންނަށް ގިނަ ދަތިތަކެއް ދިމާވެ، އާންމު ދިރިއުޅުމަށް އަސަރު ކޮށްފައިވާ ކަމަށް ވެސް ބުނެފައިވެ އެވެ. 

އީރާންއާ ދެކޮޅަށް އެމެެރިކާ އިން މިފަދަ ފިޔަވަޅުތަކެއް އަޅާފައި ވަނީ، އެ ޤައުމުގެ ނިއުކްލިއަރ ޕްްރޮގްރާމް އާއި ސަރަހައްދީ ސިޔާސަތުތަކާ ދެކޮޅަށެވެ. އެމެރިކާގެ މި ފިޔަވަޅުތަކަކީ ބައިނަލްއަޤުވާމީ ޤާނޫނުތަކާ ޚިލާފު ފިޔަވަޅުތަކެއް ކަމަށް އީރާން އިން ބުނެފައިވާއިރު، އެ ޤައުމުން ބުނެފައި ވަނީ އެމެރިކާގެ ކުރިމަތީގައި އެންމެ އިންޗިއެއް ވެސް ފަހަތަށް ނުޖެހޭނެ ކަމަށެވެ.