ހުރްމުޒް ކަނޑުއޮޅިއާ މެދު ނުބައި ހިސާބެއް ނުޖެހުމަށް އީރާނުގެ ޚާރިޖީ ވަޒީރު އެމެރިކާއަށް އިންޒާރުދެއްވައިފި

ހުރްމުޒް ކަނޑުއޮޅިއާ ގުޅޭގޮތުން އެމެރިކާއިން "މާ ބޮޑު ގޯސް ހިސާބުތަކެއް" ޖަހަމުންދާ ކަމަށް ބުނެ، އީރާނުގެ ޚާރިޖީ ވަޒީރު އައްބާސް އަރަގްޗީ އެމެރިކާއަށް އިންޒާރު ދެއްވައިފި އެވެ. އޭނާ ވިދާޅުވީ އެމެރިކާގެ އިންޓެލިޖެންސް އިދާރާތަކަށް މަޢުލޫމާތު ހޯދުމުގައި ނާކާމިޔާބީއާ ކުރިމަތިލާން ޖެހުމުގެ ސަބަބުން، އިސްލާމީ ޖުމްހޫރިއްޔާއާ މެދު ވޮޝިންގޓަނުން ކުރީގެ ގޯސްތައް ތަކުރާރު ކުރަމުންދާ ކަމަށެވެ.

އަރަގްޗީ މިހެން ވިދާޅުވީ ބުރާސްފަތި ދުވަހު އެކްސްގައި ކުރެއްވި ޕޯސްޓެއްގަ އެވެ. އޭނާ މި އިންޒާރު ދެއްވީ، އިސްތިރާތީޖީ ގޮތުން މުހިންމު އެ ކަނޑުއޮޅީގެ "ފުރިހަމަ ކޮންޓްރޯލް" އެމެރިކާއަށް އެބައޮތް ކަމަށް އެ ގައުމުގެ ރައީސް ޑޮނަލްޑް ޓްރަމްޕް ވިދާޅުވުމާ ގުޅިގެންނެވެ. ނަމަވެސް، ހަނގުރާމައިގެ ކުރިން ދުވާލަކު ގާތްގަނޑަކަށް 130 އުޅަނދު ދަތުރުކުރި އެ ކަނޑުއޮޅިން، އީރާނުގެ މަގުން މިދިޔަ ހަފުތާގައި ދަތުރުކޮށްފައިވަނީ އެންމެ އަށް އުޅަނދު ކަމަށްވުމުން، އެ ސަރަހައްދުގެ ދަތުރުފަތުރު ވަނީ ރެކޯޑް މިންވަރަކަށް ދަށަށް ގޮސްފަ އެވެ.

"އިންޓެލިޖެންސް ފެއިލިއަރތަކުގެ ސަބަބުން އެމެރިކާއިން ގޯސް ހިސާބުތައް ޖަހާތާ މިހާރު ވަރަށް ދުވަސްވެއްޖެ. އޭގެ އެންމެ ސާފު މިސާލަކީ އީރާނާ ދެކޮޅަށް ކުރި ހަނގުރާމަ. މިހާރު ހުރްމުޒް ކަނޑުއޮޅިއާ މެދު އެމެރިކާއިން އެ ދަނީ އެއަށްވުރެ ވެސް ބޮޑު ގޯސް ހިސާބެއް ޖަހަމުން،" އަރަގްޗީ ވިދާޅުވި އެވެ.

އޭނާ އިތުރަށް ވިދާޅުވީ، "ދޮގު ޚަބަރަށްވުރެ ނުރައްކާތެރީ އޮޅުވާލާފައިވާ އިންޓެލިޖެންސް މަޢުލޫމާތު" ކަމަށެވެ. އަދި ސަމާލުވުމަށް ގޮވާލައްވަމުން، މާތްﷲ އީ އެންމެ މަތިވެރި އަދި ދުނިޔޭގެ އެއްވެސް ބާރަކަށްވުރެ އެކަލާނގެ ބާރުގަދަވެގެންވާ ކަމަށް ވިދާޅުވެ، އީރާނުން ވަކީލުކުރަނީ އެކަލާނގެއަށް ކަމަށް ވެސް އަރަގްޗީ ވިދާޅުވި އެވެ.

ދުނިޔޭގެ ތެލުގެ ޑިމާންޑުގެ ފަސްބައިކުޅަ އެއްބައި ހިއްސާކުރާ ހުރްމުޒް ކަނޑުއޮޅިން ދަތުރުފަތުރު ކުރުން އީރާނުން ހަނިކުރީ، ފެބްރުއަރީ 28 ވަނަ ދުވަހު އެމެރިކާ އާއި އިސްރާއީލުން އީރާނާ ދެކޮޅަށް ފެށި ޣައިރު ގާނޫނީ އުދުވާނާ ގުޅިގެންނެވެ. އެ ހަނގުރާމަ ހުއްޓުމަކަށް އައީ އޭޕްރީލް 8 ވަނަ ދުވަހު އެއްބަސްވި ސީޒްފަޔަރ ނުވަތަ ހަނގުރާމަ ހުއްޓާލުމުގެ އެއްބަސްވުމުގެ ދަށުންނެވެ.

ޖޫން މަހުގެ 17 ވަނަ ދުވަހު، ޕާކިސްތާނު މެދުވެރިއެއްގެ ދައުރު އަދާކޮށްގެން ތެހެރާނާއި ވޮޝިންގޓަނާ ދެމެދު ވަނީ ފަހުމުނާމާއެއްގައި ސޮއިކޮށްފަ އެވެ. އެ ފަހުމުނާމާގެ 5 ވަނަ މާއްދާގައިވާ ގޮތުން، ހުރްމުޒް ކަނޑުއޮޅި އަލުން ހުޅުވުމާއި އެތަން ބެލެހެއްޓުމުގެ ފުރިހަމަ މަސްއޫލިއްޔަތު އޮތީ އީރާނުގެ އަތްމަތީގަ އެވެ.

އެހެންނަމަވެސް، އޮމާންގެ އައްސޭރިފަށާ ކައިރީގައި ރައްކާތެރިކަމެއް ނެތް ކޮރިޑޯއެއް ގާއިމުކޮށް، ހަކަތައިގެ މުހިންމު މި މަގުގެ މައްޗަށް އީރާނަށް އޮތް އިސްތިގުލާލީ ބާރު ކަނޑުވާލުމަށް އެމެރިކާއިން ވަނީ މަސައްކަތް ކޮށްފަ އެވެ. މީގެ އިތުރުން، ހަނގުރާމަ ނިމުމަކަށް ގެނައުމަށް ވެފައިވާ އެއްބަސްވުމާ ޚިލާފަށް، އެމެރިކާއިން ވަނީ އީރާނަށް ވައިގެ މަގުން ހަމަލާދޭން އަލުން ފަށާފަ އެވެ.

އެމެރިކާގެ މި "ޣައިރު ގާނޫނީ" އަމަލުތަކާ ގުޅިގެން، "މި ސަރަހައްދަށް އެމެރިކާއިން ވަދެގަތުން ހުއްޓާލަންދެން" ހުރްމުޒް ކަނޑުއޮޅި ބަންދުކޮށްފައި އޮންނާނެ ކަމަށް އީރާނުން ވަނީ އިޢުލާންކޮށްފަ އެވެ.

މި ދަނޑިވަޅުގައި، ކަނޑުއޮޅިން ދަތުރުފަތުރު ކުރުން މެނޭޖްކުރާނެ އާ ނިޒާމަކާ މެދު އެއްބަސްވުމަކަށް އައުމަށް އީރާނާއި އޮމާނުން ދަނީ މަޝްވަރާ ކުރަމުންނެވެ.

އީރާނުން ބުނަމުންދަނީ، މި މުހިންމު ކަނޑުގެ މަގު އަލުން ހުޅުވޭނީ، ހަނގުރާމަ ހުއްޓާލުމަށް ސޮއިކުރި ފަހުމުނާމާގެ ދަށުން އެމެރިކާއިން އަދާކުރަންޖެހޭ ޒިންމާތަކަށް އެ ގައުމުން ފުރިހަމައަށް ބޯލަނބައިގެން ކަމަށެވެ.