ހަނގުރާމަ އެތައް އަހަރަކަށް ދެމިގެންދިޔަ ކަމުގައި ވިޔަސް އީރާނުގެ ބެލިސްޓިކް މިސައިލްތައް ދުޝްމަނުންގެ ބޯމައްޗަށް ވާރޭ ފަދައިން އޮހެމުންދާނެ: އައިއާރުޖީސީ

އީރާނުގެ ބެލިސްޓިކް މިސައިލާއި ޑްރޯން އުފައްދާ މިންވަރު، އެ ތަކެތި ބޭނުންކުރާ މިންވަރަށް ވުރެ އިތުރުވެފައިވާ ކަމަށް އައިއާރުޖީސީގެ ޗީފް ކޮމާންޑަރުގެ އެޑްވައިޒަރު ވިދާޅުވެއްޖެ އެވެ.

އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) ގެ ޗީފް ކޮމާންޑަރުގެ ސީނިއާ އެޑްވައިޒަރަކު ވިދާޅުވި ގޮތުގައި، އީރާނުން ބެލިސްޓިކް މިސައިލާއި ޑްރޯން އުފައްދާ މިންވަރު، އެ ގައުމުގެ އަސްކަރިއްޔާއިން އެ ތަކެތި އޮޕަރޭޝަންތަކުގައި ބޭނުންކުރާ މިންވަރަށް ވުރެ މިހާރު ވަނީ އިތުރުވެފަ އެވެ.

އަންގާރަ ދުވަހު ޓީވީ މެދުވެރިކޮށް ދެއްވި އިންޓަވިއުއެއްގައި ބްރިގޭޑިއާ ޖެނެރަލް މުޙައްމަދު ރިޒާ ނަގްދީ ވިދާޅުވީ، އީރާނުން ބެލިސްޓިކް މިސައިލް އުފައްދަނީ އެ ތަކެތި ބޭނުންކުރާ މިންވަރަށް ވުރެ މަތީ ރޭޓެއްގައި ކަމަށާއި، އެ ތަކެތި މެދުނުކެނޑި އީރާނުގެ ހަތިޔާރު އެޅި ސިފަައިންގެ ލަޝްކަރުތަކަށް ފޯރުކޮށްދެމުންދާ ކަމަށެވެ. އަދި ޑްރޯންގެ ދާއިރާއިން ވެސް އީރާނުގެ އުފެއްދުންތެރިކަން ހުރީ އެ ތަކެތި ބޭނުންކުރާ މިންވަރަށް ވުރެ މާ މަތީގައި ކަމަށް އޭނާ ފާހަގަކުރެއްވި އެވެ.

އީރާނުގެ ބަސީޖް ވޮލަންޓިއަރު ފޯސްގެ ކުރީގެ ކޮމާންޑަރުކަން ވެސް ކުރައްވާފައިވާ ނަގްދީ އިތުރަށް ވިދާޅުވީ، ދިގު މުއްދަތަކަށް ހަނގުރާމައެއް ދެމިގެންދިޔަ ނަމަވެސް، ރައްދުގައި ދޭ ބެލިސްޓިކް މިސައިލް ހަމަލާތައް މެދުނުކެނޑި ކުރިއަށް ގެންދިއުމުގެ ގާބިލުކަން އީރާނަށް ލިބިގެންވާ ކަމަށެވެ.

މިކަމާ ގުޅޭގޮތުން އޭނާ ވިދާޅުވީ، ހަނގުރާމަ އެތައް އަހަރަކަށް ދެމިގެންދިޔަ ކަމުގައި ވީނަމަވެސް، އީރާނުގެ ބެލިސްޓިކް މިސައިލްތައް ދުޝްމަނުންގެ ބޯމައްޗަށް ވާރޭ ފަދައިން އޮހެމުންދާނެ ކަމަށެވެ.

އެމެރިކާގެ އަސްކަރިއްޔާއިން އަހަރަކު ކުރާ ހޭދަ އީރާނަށް ވުރެ އެތައް ގުނައެއް ބޮޑު ނަމަވެސް، އީރާނުގެ ހަތިޔާރު އެޅި ސިފަައިން އެމެރިކާއާ ކާމިޔާބުކަމާއެކު ކުރިމަތިލަމުންދާކަން ފާހަގަކުރައްވައި، އީރާނުން އަމިއްލައަށް ހަތިޔާރު އުފައްދަމުންދާ ދިއުމަށް ނަގްދީ ތައުރީފު ކުރެއްވި އެވެ.

މި މޭރުމުން ވާހަކަދައްކަވަމުން އޭނާ ވިދާޅުވީ، އީރާނުން މިހާރު ހަނގުރާމަކުރަމުންދާ އަސްކަރިއްޔާގެ އަހަރީ ބަޖެޓަކީ، އީރާނުގެ ހަތިޔާރު އެޅި ސިފަައިންގެ އަހަރީ ބަޖެޓަށް ވުރެ ސަތޭކަ ގުނަ ބޮޑު ބަޖެޓެއް ކަމަށެވެ.

އޭނާ މިހެން ވިދާޅުވީ، އެމެރިކާއިން އެއްވެސް އުދުވާނަކާ ނުލައި އީރާނަށް ދެމުންދާ ހަމަލާތަކާއި، އިސްރާއީލާ ގުޅިގެން ވޮޝިންގޓަނުން އީރާނާ ދެކޮޅަށް ހިންގާ އަމަލުތަކަށް ރައްދު ދިނުމުގެ ގޮތުން އީރާނުގެ ސިފައިން ހިންގަމުންދާ ދިފާއީ އޮޕަރޭޝަންތަކަށް އިޝާރާތް ކުރައްވަ އެވެ.

އީރާނުން ދެމުންދާ ރައްދު ހަމަލާތަކުގެ ސަބަބުން އެމެރިކާ ނުތަނަވަސްވެފައިވާ ކަމަށާއި، ވޮޝިންގޓަނުގެ ސްޓްރެޓީޖިކް ރޭވުންތަކަށް ބުރޫއަރައި، އެމެރިކާގެ މިސައިލް ރިޒާވް ހުސްވަމުންދާކަމަށް އެމެރިކާގެ އެކި މީޑިއާތަކުންނާއި އޮފިޝަލުން ވެސް ވަނީ އިއުތިރާފުވެފަ އެވެ.

'ދުޝްމަނުންގެ ސަރަހައްދަށް ވަދެ އޮޕަރޭޝަންތައް ހިންގުމުގެ ގާބިލުކަން ހޯދުމަށް އައިއާރުޖީސީއަށް ވަނީ އަމުރުކޮށްފައި'

އައިއާރުޖީސީގެ އޮޕަރޭޝަނަލް އުސޫލުތަކާ ބެހޭގޮތުން ވާހަކަދައްކަވަމުން ނަގްދީ ވިދާޅުވީ، ހާލަތު ނިޔާކުރާ ގޮތުންނާއި ލިބޭ އަމުރުތަކާ އެއްގޮތަށް، ދުޝްމަނުންގެ ސަރަހައްދަށް ވަދެ އޮޕަރޭޝަންތައް ހިންގުމަށް އައިއާރުޖީސީން ތައްޔާރަށް އޮންނަންޖެހޭނެ ކަމަށެވެ.

އޭނާ ވިދާޅުވީ، އީރާނުގެ އަމިއްލަ ސަރަހައްދާ ދުރުގައި، ދުޝްމަނުންގެ ބިމަށް ވަދެ އޮޕަރޭޝަންތައް ކުރިއަށް ގެންދިއުމުގެ ގާބިލުކަން އީރާނުގެ ކިބައިގައި ހުންނަންޖެހޭނެ ކަމަށެވެ.

މިއީ ކުރިއަށް ނުކުމެ ހަމަލާދިނުމުގެ އުސޫލުގެ ސިފަތަކެއް ކަމަށާއި، މިކަން ތަރައްގީކޮށް ދައްކުވައިދޭންޖެހޭ ކަމަށް އޭނާ ވިދާޅުވި އެވެ. އެހެން ގޮތަކަށް ދަންނަވާނަމަ، ހާލަތު ނިޔާކުރާ ވަގުތެއްގައި އެފަދަ އޮޕަރޭޝަންތައް ހިންގުމަށް ބޭނުންވާ ތައްޔާރީތަކާއި ގާބިލުކަން ހޯދުމަށް އައިއާރުޖީސީއަށް މިހާރު ވަނީ ހަވާލުކުރެވިފައި ކަމަށް ނަގްދީ ވިދާޅުވި އެވެ.