ލެވިޓް ވައިޓް ހައުސް ޕްރެސް ސެކްރެޓަރީ މަގާމުން ވަކިވަނީ

މި މަސް ނިމުމުން ވައިޓް ހައުސްގެ ޕްރެސް ސެކްރެޓަރީ ކެރޮލީން ލެވިޓް އެ މަގާމުން ވަކިވެވަޑައިގަންނަވާނެކަން ރައީސް ޑޮނަލްޑް ޓްރަމްޕް އިޢުލާނު ކުރައްވައިފި އެވެ.

ލެވިޓަކީ އެމަނިކުފާނުގެ "އެންމެ އިތުބާރުކުރެވޭ އެއް އެހީތެރިޔާ" ކަމަށް ސިފަކުރައްވަމުން ޓްރަމްޕް ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ، ލެވިޓް މަގާމުން ވަކިވަނީ އޭނާގެ ތުއްތު ދަރިންނާއި އާއިލާއާއެކު ވަގުތު ހޭދަކުރުމަށް ކަމަށެވެ. އަދި އެއީ އެމަނިކުފާނު ފުރިހަމައަށް ބަލައިގަނެ، އިހުތިރާމް ކުރައްވާ ނިންމުމެއް ކަމަށްވެސް ޓްރަމްޕް ވިދާޅުވި އެވެ.

"ކެރޮލީން ދެން ވެގެންދާނީ ސަރުކާރުން ބޭރުގައި ހުންނަވާ އަޅުގަނޑުގެ އެޑްވައިޒަރަކަށް އަދި ރިޕަބްލިކަން ޕާޓީގެ ތެރޭގައި ނުފޫޒުގަދަ އަޑަކަށް،" ޓްރަމްޕް އިތުރަށް ވިދާޅުވި އެވެ.

އުމުރުން 28 އަހަރުގެ ލެވިޓް ވައިޓް ހައުސްގެ ޕްރެސް ސެކްރެޓަރީގެ މަގާމާ ހަވާލުވީ މިދިޔަ އަހަރު އެވެ. މިއާއެކު އޭނާ ވެގެން ގޮސްފައިވަނީ އެމެރިކާގެ ތާރީޚުގައިވެސް އެ މަގާމު ފުރުއްވި އެންމެ ޒުވާން ބޭފުޅާއަށެވެ. ލެވިޓްގެ ބަދަލުގައި އެ މަގާމަށް ދެން އަންނާނީ ކޮން ބޭފުޅެއްކަން އަދި ސާފެއް ނުވެ އެވެ. ލެވިޓްއާއި އޭނާގެ ފިރިމީހާ ނިކޮލަސް ރިޗިއޯއަށް މިދިޔަ މޭ މަހު ވަނީ އަންހެން ކުއްޖަކު ލިބިފަ އެވެ. މީގެ އިތުރުން ދެ އަހަރުގެ ފިރިހެން ކުއްޖަކުވެސް އެ ދެމަފިރިންގެ ތިބެ އެވެ. ވިހެއުމާ ގުޅިގެން ދިން ޗުއްޓީއަށްފަހު ލެވިޓް އަލުން ވަޒީފާއަށް ނުކުމެފައިވަނީ މިދިޔަ މަހު އެވެ.

ރައީސް ޓްރަމްޕްގެ އިޢުލާނާ ގުޅިގެން އެކްސްގައި ކުރެއްވި ޕޯސްޓެއްގައި ލެވިޓް ވިދާޅުވީ، މި މަގާމަކީ އޭނާގެ މުޅި ހަޔާތުގައިވެސް ލިބުނު އެންމެ ބޮޑު ޝަރަފާއި ތަޖުރިބާ ކަމަށެވެ.

"ދުނިޔޭގެ އެންމެ ބުރަ އެއް ވަޒީފާ އަދާކުރަމުން މަންމައަކަށް ވުމާއި، އާ ދަރިފުޅަކަށް މަރުހަބާ ކިޔުމަކީ އަޅުގަނޑުގެ ހަޔާތުގައި ކުރިމަތިވި އެންމެ އުފާވެރި، ނަމަވެސް އެންމެ ގޮންޖެހުން ބޮޑު ދުވަސްތައް،" ލެވިޓް ލިޔުއްވާފައިވެ އެވެ.

"ހަގީގަތަކީ ދަރިފުޅު ލިބުމަށްފަހު އަލުން ވައިޓް ހައުސްއަށް އެނބުރި އައި ފަހުން، ވައިޓް ހައުސްގެ ޕްރެސް ސެކްރެޓަރީގެ މަގާމަށް ބޭނުންވާ ވަގުތާއި ހަކަތަ އަދި ސަމާލުކަން ދެމުން، އަޅުގަނޑުގެ ދެ ދަރިންނަށް ހައްގުވާ އެންމެ ރަނގަޅު މަންމައަށް ނުވެވޭނެކަން ހިތުގެ އަޑިން ގަބޫލުކުރެވޭ ކަމެވެ. އެހެންކަމުން، މިއީ ނިންމަން އުނދަގޫ ނިންމުމެއް ނަމަވެސް، ވައިޓް ހައުސްއިން ވަކިވެ ހަޔާތުގެ އާ ސަފުހާއެއް ފެށުމަށް އަޅުގަނޑު ގަސްދުކުރީ،" އޭނާ އިތުރަށް ވިދާޅުވި އެވެ.

ވައިޓް ހައުސްގެ ޕްރެސް ސެކްރެޓަރީގެ މަގާމާ ހަވާލުވުމުގެ ކުރިންވެސް ލެވިޓް ވަނީ ޓްރަމްޕާއެކު ގިނަ ދުވަސްތަކެއް ވަންދެން މަސައްކަތް ކުރައްވާފަ އެވެ. އެގޮތުން ޓްރަމްޕްގެ ފުރަތަމަ ރިޔާސީ ދައުރުގައި އެސިސްޓަންޓް ޕްރެސް ސެކްރެޓަރީއެއްގެ ގޮތުގައާއި ތަގުރީރު ލިޔެދޭ މީހެއްގެ ގޮތުގައި އޭނާ މަސައްކަތް ކުރެއްވި އެވެ.

އޭގެ ފަހުން އޭނާ ވަނީ ނިއުޔޯކްގެ ރިޕަބްލިކަން ކޮންގްރެސް މެންބަރު އެލީސް ސްޓެފަނިކްގެ ކޮމިއުނިކޭޝަންސް ޑައިރެކްޓަރުގެ ގޮތުގައި އިސް ދައުރެއް އަދާކުރައްވާފަ އެވެ.

2022 ވަނަ އަހަރު ނިއު ހެމްޕްޝަޔާގެ ކޮންގްރެސް ގޮނޑިއަކަށް ލެވިޓް ވާދަކުރެއްވި އެވެ. ރިޕަބްލިކަން ޕާޓީގެ ޕްރައިމަރީ ކާމިޔާބު ކުރެއްވި ނަމަވެސް، އާންމު އިންތިޚާބުގައި ޑިމޮކްރެޓް ކެންޑިޑޭޓް ކްރިސް ޕަޕާސްއާ ވާދަކޮށް އޭނާ ނާކާމިޔާބުވި އެވެ.

އޭގެ ފަހުން، ޓްރަމްޕަށް ފަންޑު ހޯދައިދޭ ގްރޫޕެއް ކަމަށްވާ "މޭގާ އިންކް" (Maga Inc) ގެ ތަރުޖަމާނެއްގެ ގޮތުގައި މަސައްކަތް ކުރެއްވުމަށްފަހު، 2024 ވަނަ އަހަރުގެ ރިޔާސީ ކެމްޕޭނާ ގުޅިވަޑައިގަތީ ނޭޝަނަލް ޕްރެސް ސެކްރެޓަރީގެ ގޮތުގަ އެވެ.