އީރާން އިން މަޝްވަރާކުރަން ބޭނުންވާ ނަމަ، އެންމެ ފުރަތަމަ ޖެހޭނީ ބަދަލު ދޭން: ޓްރަމްޕް
11 އޯގަސްޓު 2026 | އަންގާރަ 04:29ޓްރުތު ސޯޝަލް މީޑިއާގައި ކުރެއްވި ޕޯސްޓެއްގައި ޓްރަމްޕް ވިދާޅުވީ، ފަސް މަސް ދުވަހަށް ދެމިގެން ދާ ހަނގުރާމައިގައި އީރާން އަށް ލިބުނު ގެއްލުންތަކަށް ބަދަލު ހޯދުމަށް އެ ޤައުމުން ދަނީ އެދެމުން ކަމަށް. އެހެންކަމުން އީރާާން އިން ދިން ބޮމުގެ ހަމަލާތަކާއި، މަރާލި މީހުން އަދި ޒަޚަމުކުރި މީހުންގެ ބަދަލު އެ ޤައުމުން ދޭން އެމެރިކާ އިން ވެސް ބޭނުންވާ ކަމަށް ޓްރަމްޕް ވަނީ ވިދާޅުވެފައި
އެމެރިކާާގެ ރައީސް ޑޮނަލްޑް ޓްރަމްޕް | ގެޓީ އިމޭޖަސް
އެމެރިކާ އާއި އީރާންއާ ދެމެދު އުފެދިފައިވާ ނުތަނަވަސްކަން ޙައްލު ކުރުމަށް މަޝްވަރާތައް ކުރިއަށް ގެންދަން އީރާން އިން ބޭނުންވާ ނަމަ، ހަނގުރާމައިގެ ބަދަލު އެ ޤައުމުން ހޯދައި ދޭން ޖެހޭނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.
ޓްރުތު ސޯޝަލް މީޑިއާގައި ކުރެއްވި ޕޯސްޓެއްގައި ޓްރަމްޕް ވިދާޅުވީ، ފަސް މަސް ދުވަހަށް ދެމިގެން ދާ ހަނގުރާމައިގައި އީރާން އަށް ލިބުނު ގެއްލުންތަކަށް ބަދަލު ހޯދުމަށް އެ ޤައުމުން ދަނީ އެދެމުން ކަމަށެވެ. އެހެންކަމުން އީރާާން އިން ދިން ބޮމުގެ ހަމަލާތަކާއި، މަރާލި މީހުން އަދި ޒަޚަމުކުރި މީހުންގެ ބަދަލު އެ ޤައުމުން ދޭން އެމެރިކާ އިން ވެސް ބޭނުންވާ ކަމަށް ޓްރަމްޕް ވަނީ ވިދާޅުވެފައި އެވެ.
މީގެ ކުރިން މިދިޔަ ދުވަސް lތަކުގައި އީރާން އަށް ވަރަށް ވަރުގަދަ ހަމަލާތަކެއް ދޭނެ ކަމަށް ވިދާޅުވެ، ޓްރަމްޕް ވަނީ ވަރުގަދަ އިންޒާރުތަކެއް ދެއްވައިފަ އެވެ. ނަމަވެސް، ފަހު ވަގުތު އެ ހަމަލާތައް ކެންސަލް ކުރެއްވުމަށް ފަހު ޓްރަމްޕް ވިދާޅުވެފައި ވަނީ، އެ ހަމަލާތައް ފަސް ކޮށްފައި ވަނީ މަޝްވަރާތަކަށް ޖާގަ ދިނުމުގެ ގޮތުން ކަމަށެވެ.
މި ހަފުތާގެ އާދީއްތަ ދުވަހު ޓްރަމްޕް ވިދާޅުވެފައި ވަނީ، އީރާން ހަނގުރާމައާ ގުޅޭ ގޮތުން އެމެރިކާާ އިން މިހާރު އަމަލު ކުރަމުން ދަނީ ވަރަށް ހަމަޖެހިލައިގެން ކަމަށާއި، އިތުރު ހަނގުރާމައިގެ ފިޔަވަޅުތަކެއް އެޅުމުގެ ބަދަލުގައި، އިޤްތިޞާދީ ގޮތުން އީރާން އަށް ދަތި ކުރުން ކުރިއަށް ގެންދަން ބޭނުންވާ ކަމަށެވެ.
މީގެ އިތުރުން ހޯމަ ދުވަހު ޓްރަމްޕް ވިދާޅުވެފައި ވަނީ، އެމެރިކާާގެ ސިފައިން ހުރްމުޒް ކަނޑުއޮޅި މުޅިން ސާފު ކޮށްފައިވާ ކަމަށާއި، އެ ކަނޑުއޮޅި މިހާރު އެމެރިކާގެ ފުރިހަމަ ބާރުގެ ދަށުގައި އޮތް ކަމަށެވެ. ޓްރަމްޕް މިހެން ވިދާޅުވި ނަމަވެސް، ހުރްމުޒް ކަނޑުއޮޅި މުޅިން އެމެރިކާގެ ބާރުގެ ދަށަށް ގެނެވިފައިވާ ކަމަށް ބުނާ ވާހަކަ އީރާާން އިން ތަކުރާރުކޮށް ދޮގު ކުރެ އެވެ.
މަޝްވަރާތައް ހުއްޓިފައި އޮތުމާާ އެކު، އީރާާން އިން ހުރްމުޒް ކަނޑުއޮޅި ބަންދު ކޮށްފައިވުމުގެ ސަބަބުން ތެލުގެ އަގު ވަރަށް ބޮޑަށް އުފުލިފައިވާއިރު، އެކަމުން ދުނިޔޭގެ އިޤްތިޞާދަށް ވެސް ބޮޑެތި ނޭދެވޭ އަސަރުތަކެއް ކޮށްފައިވެ އެވެ. މިކަމުގެ ސަބަބުން އެމެރިކާގައި ނޮވެމްބަރު މަހު އޮންނަ މިޑްޓާމް އިންތިޚާބުގައި ޓްރަމްޕް އާއި ވެރިކަން ކުރާ ރިޕަބްލިކަން ޕާޓީ އަށް ވަނީ ޕްރެޝަރު ބޮޑުވެފައި އެވެ.
މަސްދަރު: އޭއެފްޕީ
