ޔަމަނުގެ ހޫޘީން ސައުދީގެ ތާއީދު އޮންނަ ފައުޖުތަކަށް ވަރުގަދަ ހަމަލާތަކެއް ދީފި

ޔަމަނުގެ ހޫޘީންގެ ސިލްސިލާ ހަމަލާތަކެއްގައި، ތައީޒް ޕްރޮވިންސްގެ މުޚާ ސަރަހައްދާއި މަޣްރިބް ޕްރޮވިންސްގެ ތަދާވިން ކޭމްޕުގައި ތިބި ސައުދީ އަރަބިއްޔާއަށް ތާއީދުކުރާ ހަނގުރާމަވެރިންގެ މަރުކަޒުތަކަށާއި، އެމީހުން އެއްވެ ތިބި ތަންތަނުގެ އިތުރުން ހަތިޔާރު ގުދަންތަކަށް އަމާޒުކޮށް، ގިނަ އަދަދެއްގެ މިސައިލާއި ޑްރޯން ބޭނުންކޮށްގެން ވަރުގަދަ އޮޕަރޭޝަނެއް ހިންގައިފި އެވެ.

އަންގާރަ ދުވަހު ނެރުއްވި ބަޔާނެއްގައި ޔަމަނުގެ ހޫޘީންގެ އަސްކަރީ ތަރުޖަމާނު ބްރިގޭޑިއާ ޖެނެރަލް ޔަހްޔާ ސަރީއު ވިދާޅުވީ، މި އޮޕަރޭޝަނުގައި ގިނަ އަދަދެއްގެ ބެލިސްޓިކް މިސައިލާއި ހަމަލާދޭ ޑްރޯން ބޭނުންކޮށްފައިވާ ކަމަށެވެ. އަދި މި ހަމަލާތައް އަމާޒުކުރި ތަންތަނުގެ ތެރޭގައި ހަނގުރާމަވެރިންގެ ކޮމާންޑް ސެންޓަރުތައް ހިމެނޭ ކަމަށްވެސް އޭނާ ވިދާޅުވި އެވެ.

މި ހަމަލާތަކުގައި ސައުދީ ރައްޔިތުން ހިމެނޭހެން އެތައް ބަޔަކު މަރުވެ، ގިނަ ބަޔަކު ޒަޚަމްވެފައިވާ ކަމަށް ސަރީއު އިތުރަށް ހާމަކުރެއްވި އެވެ.

މި އޮޕަރޭޝަން ހިންގާފައިވަނީ ޖެހިޖެހިގެން ދެވަނަ ދުވަހަށް، ސައުދީގެ ތާއީދު އޮންނަ ފައުޖުތަކަށް އަމާޒުކޮށް ޔަމަނުގެ އަސްކަރިއްޔާއިން ވަރުގަދަ ހަމަލާތަކެއް ދެމުންދަނިކޮށެވެ.

ލޯކަލް މީޑިއާ ރިޕޯޓްތައް ބުނާގޮތުން، ހޯމަ ދުވަހު ޔަމަނުގެ އަސްކަރީ ޔުނިޓްތަކުން ވަނީ ޝަބްވާ ޕްރޮވިންސްގެ ބައިހާން ޑިސްޓްރިކްޓްގައި ހަރަކާތްތެރިވާ، ސައުދީގެ އެހީތެރިކަން ލިބޭ "ޝަބްވާ ޑިފެންސް ފޯސަސް" ގެ ހަނގުރާމަވެރިންނަށް ހަމަލާދީފަ އެވެ. މި ހަމަލާތަކުގައި މަދުވެގެން ދެ ހަނގުރާމަވެރިން މަރުވެ، އިތުރު ބަޔަކު ވަނީ ޒަޚަމްވެފަ އެވެ.

ހޯމަ ދުވަހުގެ މި ހަމަލާތައް ދީފައިވަނީ، ޔަމަނުގެ ސިފައިން މުޚާ ސަރަހައްދަށް ޑްރޯން ހަމަލާތަކެއް ދިންތާ މަދު ގަޑިއިރުތަކެއްގެ ތެރޭގަ އެވެ. އާދީއްތަ ދުވަހުގެ ރޭ ދިން އެ ހަމަލާތަކުގައި މީހަކަށް ގެއްލުމެއް ލިބުނުކަމުގެ ނުވަތަ މާލީ ގެއްލުމެއް ލިބުނުކަމުގެ ރިޕޯޓެއް އެ ވަގުތު ލިބިފައެއް ނުވެ އެވެ.

ނަމަވެސް އޭގެ ކުރީ ދުވަހު މުޚާ އާއި އެ ސަރަހައްދުގެ ކައިރި ރަށްތަކަށް ހޫޘީން ދިން ހަމަލާތަކުގައި، ސައުދީގެ ތާއީދު އޮންނަ ހަތް ހަނގުރާމަވެރިއަކު މަރުވެ، 30 މީހަކު ޒަޚަމްވި އެވެ.

އެ ވަގުތު ހޫޘީންގެ ތަރުޖަމާނު ވިދާޅުވީ، މި ވަރުގަދަ އޮޕަރޭޝަން ހިންގަން ޖެހުނީ ސައުދީގެ އެހީތެރިކަން ލިބޭ ފައުޖުތަކުން އަސްކަރީ ބާރުގަދަކޮށް، ހޫޘީންނަށް ހަމަލާދިނުމަށް ތައްޔާރުވަމުންދާތީ ކަމަށެވެ.

ހޫޘީން މި ހަމަލާތައް ދޭން ފަށާފައިވަނީ، ސައުދީ އަރަބިއްޔާއިން ޔަމަނާ ދެކޮޅަށް ޖެހިޖެހިގެން 12 އަހަރު ވަންދެން ހިންގަމުންދާ ހިސާރުކުރުމުގެ އަމަލުތަކުގެ ބަދަލުހިފުމެއްގެ ގޮތުން، ޖުލައި 20 ވަނަ ދުވަހު ސައުދީއާ ދެކޮޅަށް ކަނޑުގެ މަގުން ބްލޮކޭޑެއް ނުވަތަ ދަތުރުފަތުރު ހުއްޓުވުމުގެ ފިޔަވަޅެއް އިއުލާންކުރުމަށްފަހު އެވެ.

މި ފިޔަވަޅާ ގުޅިގެން، ރަތްކަނޑުގައި ދަތުރުކުރާ ސައުދީއާ ގުޅުންހުރި އުޅަނދުތަކަށް އަމާޒުކޮށް އެތައް އޮޕަރޭޝަނެއް ހިންގާފައިވާކަން ޔަމަނުގެ ޙޫޘީންގެ އަސްކަރިއްޔާއިން ފަހުން ވަނީ ހާމަކޮށްފަ އެވެ.

ޔަމަނު ހިސާރުކުރުމުގެ ފިޔަވަޅުތަކާއެކު، އެމެރިކާ އާއި ހުޅަނގުގެ ބައެއް ގައުމުތަކުގެ އަސްކަރީ، ސިޔާސީ އަދި ލޮޖިސްޓިކް އެހީތެރިކަމާއެކު ސައުދީ އަރަބިއްޔާ އާއި އެގައުމުގެ ބައިވެރިން ވަނީ ހޫޘީންނާ ދެކޮޅަށް ވަރުގަދަ ހަނގުރާމައެއް ފަށާފަ އެވެ.

މި ހަނގުރާމައިގައި ޔަމަނުގެ އެތައް ހާސް ރައްޔިތުންނެއްގެ ފުރާނަ ވަނީ ގޮސްފަ އެވެ. އެހެންނަމަވެސް، ސައުދީ އަރަބިއްޔާއަށް ތާއީދުކުރާ ސަރުކާރެއް އަލުން ގާއިމުކުރުމަށް އެގައުމުން ކަނޑައެޅި މައިގަނޑު މަގްސަދު ހާސިލުކުރުމުގައި ސައުދީ ވަނީ ނާކާމިޔާބުވެފަ އެވެ.

ބުދަ ދުވަހު ސައުދީގެ ތާއީދު އޮންނަ ސަރުކާރުގެ އަސްކަރިއްޔާއިން ބުނީ، އީރާނުގެ ތާއީދު އޮންނަ ހޫޘީ ހަނގުރާމަވެރިން ސްޓްރެޓީޖިކް މުހިންމުކަމެއް އޮތް މުޚާ ބަނދަރަށް ދޭ ހަމަލާތައް އަލުން ފަށާފައިވާ ކަމަށާއި، މުޅި ގައުމުގައި މަޝްރަހު ގޯސްވެފައިވާ މި ދަނޑިވަޅުގައި އެ ބަނދަރަށް ބެލިސްޓިކް މިސައިލް ފޮނުވާފައިވާ ކަމަށެވެ.

މުޚާ ބަނދަރަށާއި އާންމުން ދިރިއުޅޭ ސަރަހައްދުތަކަށް އަމާޒުކޮށް ދެމުންދާ ޑްރޯން އަދި މިސައިލް ހަމަލާތަކާ ގުޅިގެން، އެ ސިޓީގެ ވައިގެ ސަރަހައްދުގައި އަސްކަރީ ބޯޓުތަކުގެ ހަރަކާތްތައް ވަނީ ވަރަށް ބޮޑަށް އިތުރުވެފަ އެވެ.

ހޫތީން އަސްކަރީ ގޮތުން ހިންގަމުންދާ މި އަމަލުތަކުގެ ނަތީޖާއާ މެދު މަޝްވަރާކުރުމަށާއި، ގައުމުގެ ސަލާމަތާއި އިގްތިސާދާއި އިންސާނީ ހާލަތަށް މީގެ ސަބަބުން ކުރާނެ އަސަރުތައް ވަޒަންކުރުމަށް، ސައުދީން ތާއީދު ކުރާ ސަރުކާރުގެ ކެބިނެޓުން އަންގާރަ ދުވަހު ވަގުތީ ވެރިރަށް އަދަނުގައި ބައްދަލުވުމެއް ބާއްވާފަ އެވެ.

މި ބައްދަލުވުމުގައި ކެބިނެޓުން ވަނީ މުޚާ ބަނދަރަށާއި، ހަޟްރަމައުތު، މައުރިބް އަދި އަލް-ޟާލިއާގެ ސަރަހައްދުތަކުގެ އިތުރުން ސައުދީ އަރަބިއްޔާއަށް އަމާޒުކޮށް ހޫޘީން ދެމުންދާ ހަމަލާތައް މުރާޖައާކޮށްފަ އެވެ.

ޔަމަނުގެ ސައުދީގެ ތާއީދު އޮންނަ ސަރުކާރުން ބުނީ، ބާރުގެ ބޭނުންކޮށްގެން ގައުމުގެ ހާލަތު ބަދަލުކުރުމަށް ކުރާ އެއްވެސް މަސައްކަތަކަށް ފުރުސަތު ނުދޭނެ ކަމަށެވެ.