ހޫޘީންގެ ހަމަލާގައި ޔަމަނުގައި 7 މަރު، 30 ޒަޚަމް

ޔަމަނުގެ ރަތް ކަނޑުގެ އައްސޭރިފަށުގައި އޮންނަ މުޚާ ސިޓީއަށާއި، އާންމުންގެ މުދަލާއި ސިފައިންގެ މަރުކަޒުތަކަށް އަމާޒުކޮށް ހޫޘީން ދިން ހަމަލާތަކެއްގައި ސިފައިންނާއި އާންމުން ހިމެނޭހެން ހަތް މީހަކު މަރުވެ، އިތުރު 30 މީހަކު ޒަޚަމްވެފައިވާ ކަމަށް އެ ގައުމުގެ އަސްކަރިއްޔާއިން ބުނެފި އެވެ.

ހޯމަ ދުވަހުގެ ހެނދުނުގެ ވަގުތެއްގައި ޔަމަނުގެ އަސްކަރިއްޔާއިން ނެރުނު ބަޔާނެއްގައި ބުނެފައިވަނީ، މި ހަމަލާތަކުގައި އަސްކަރިއްޔާގެ ހަތަރު މެންބަރުންނާއި ތިން އާންމުން މަރުވެފައިވާ ކަމަށާއި، އަދި އިތުރު 30 މީހަކަށް އެކިވަރުގެ އަނިޔާތައް ލިބިފައިވާ ކަމަށެވެ.

މި ހަމަލާ ދިނުމުގައި ބޭނުންކުރި ހޫޘީންގެ 11 ޑްރޯން، ވައިގެ ދިފާއީ ނިޒާމުގެ އެހީގައި ހުއްޓުވައި ބިމަށް ވައްޓާލާފައިވާ ކަމަށްވެސް އަސްކަރިއްޔާއިން މައުލޫމާތުދެ އެވެ.

މީގެ އިތުރުން، ހޫޘީންގެ މި ހަމަލާތައް މޯކާ ސިޓީގެ އާންމުން ދިރިއުޅޭ ސަރަހައްދުތަކަށްވެސް އަމާޒުވެފައިވާ ކަމަށް ޔަމަނުގެ އަސްކަރިއްޔާއިން ބުނެފައިވެ އެވެ.

ހޯމަ ދުވަހުގެ ހެނދުނުގެ ވަގުތެއްގައި މުޚާ ސިޓީއަށް ދޭން އުޅުނު ހޫޘީންގެ ޑްރޯން ހަމަލާއެއް ޔަމަނުގެ ވައިގެ ދިފާއީ ނިޒާމުން ހުއްޓުވާފައިވާ ކަމަށް އެ ގައުމުގެ އަސްކަރީ މަސްދަރުތަކުން ބުނެފައިވާއިރު، އަލް އަރަބިއްޔާގެ ރިޕޯޓަރު ބުނެފައިވަނީ ޔަމަނުގެ އަސްކަރިއްޔާއިން މާރިބްގައި ހުރި ހޫޘީންގެ ކޮމާންޑް ސެންޓަރަކަށާއި ހަމަލާދޭން ބޭނުންކުރާ ލޯންޗަރުތަކަށް އަމާޒުކޮށް ހަމަލާދީފައިވާ ކަމަށެވެ.

ޔަމަނަށް ކަނޑައަޅާފައި ހުންނަ އދ. ގެ ހާއްސަ މަންދޫބު ހޭންސް ގްރަންޑްބާގް ހޯމަ ދުވަހު ނެރުއްވި ބަޔާނެއްގައި ވިދާޅުވީ، މޯކާ ސިޓީއަށް ދާދި ފަހުން ދިން ހަމަލާތަކާ މެދު އިންތިހާއަށް ކަންބޮޑުވާ ކަމަށެވެ.

މި ހަމަލާތަކުގެ ސަބަބުން މުޚާ އާއި މާރިބްގެ އިތުރުން އެހެނިހެން ސަރަހައްދުތަކުގައި ދިރިއުޅޭ އާންމުންގެ ފުރާނައަށް ބޮޑެތި ނުރައްކާތަކެއް ކުރިމަތިވެފައިވާ ކަމަށާއި، މިފަދަ ހަމަލާތައް ވަގުތުން ހުއްޓާލައި، އާންމުންނާއި އާންމުންގެ މުދަލާއި ވަސީލަތްތައް ރައްކާތެރިކުރަން ޖެހޭ ކަމަށް ގްރަންޑްބާގް ވިދާޅުވި އެވެ.

އދ. ގެ މަންދޫބުގެ ބަޔާނުގައި އިތުރަށް ފާހަގަކުރައްވާފައިވާ ގޮތުގައި، މި ހަމަލާތަކަކީ 2022 ވަނަ އަހަރު އދ. މެދުވެރިވެގެން ގާއިމުކުރި ހަނގުރާމަ ހުއްޓާލުމުގެ އެއްބަސްވުމަށްފަހު އަސްކަރީ ހަރަކާތްތައް އެންމެ ބޮޑަށް އިތުރުވެގެންދިޔަ ދަނޑިވަޅެވެ. މީގެ ސަބަބުން ޔަމަނުގައި އަލުން ފުރިހަމަ ދާޚިލީ ހަނގުރާމައެއް ފެށުމުގެ ބިރު ބޮޑުވެފައިވާ ކަމަށްވެސް ބަޔާނުގައިވެ އެވެ.

އެހެންކަމުން، ހަނގުރާމައިގެ ހުރިހާ ފަރާތްތަކުންވެސް ކެތްތެރިކަން އިސްކުރުމަށާއި، މަސްރަހު ފިނިކުރުމަށްޓަކައި އޭނާގެ އޮފީހާ ގުޅިގެން އަމަލީ މަސައްކަތްތަކެއް ކުރުމަށް ގްރަންޑްބާގް ވަނީ ގޮވާލައްވާފަ އެވެ.