ސައުދީ އާގުބޯޓަކަށް ހޫޘީން ދިން މިސައިލް ހަމަލާއެއްގައި 3 މީހުން މަރުވެއްޖެ
11 އޯގަސްޓު 2026 | އަންގާރަ 12:52ޔަމަނުގެ ހޫޘީން ބާބުލް މަންދަބް ސަރަހައްދުން ދަތުރުކުރި ބޯޓަކަށް ދިން މިސައިލް ހަމަލާއެއްގައި ތިން ފަޅުވެރިން މަރުވެފައިވާއިރު، އަނެއްކޮޅުން ޔަމަނު ސަރުކާރު ސިފައިން ވަނީ ހޫޘީންގެ އަސްކަރީ މަރުކަޒުތަކަށް ވަރުގަދަ ހަމަލާތަކެއް ދީފައި. އީރާނުގެ އެހީތެރިކަން ލިބޭ ހޫޘީން ރަތްކަނޑުގެ އުޅަނދުތަކަށާއި މާރިބް ސިޓީގެ އާންމުންނަށް އަމާޒުކޮށް ދޭ ހަމަލާތައް ފަހަކަށް އައިސް ވަނީ އިތުރުކޮށްފައި
ޔަމަނުގެ ހޫޘީންނަށް ތާއީދުކުރާ ގަބީލާތަކުގެ ބަޔަކު، އެމެރިކާ ސަރުކާރާ ދެކޮޅަށް ބޭއްވި މުޒާހަރާއެއްގެ ތެރެއިން އެމީހުންގެ ހަތިޔާރުތަކާއެކު ބައިވެރިވަނީ | އެލަމީ
ބާބުލް މަންދަބް ސަރަހައްދުން ދަތުރުކުރަމުންދިޔަ ސައުދީ އަރަބިއްޔާގެ މުދާ އުފުލާ ބޯޓަކަށް ހޫޘީން ފޮނުވާލި ބެލިސްޓިކް މިސައިލް ހަމަލާއެއްގައި، އެ ބޯޓުގެ ފަޅުވެރިންގެ ތެރެއިން ތިން މީހަކު މަރުވެފައިވާ ކަމަށް އަލް އަރަބިއްޔާ އަދި އަލް ހަދަޘްގެ ރިޕޯޓަރުން އަންގާރަ ދުވަހު ރިޕޯޓުކޮށްފި އެވެ.
މި ހާދިސާގައި މަރުވީ ޕާކިސްތާނުގެ ދެ މީހަކާއި އިންޑޮނޭޝިއާގެ މީހެއް ކަމަށް ރިޕޯޓަރުން ބުނެފައިވެ އެވެ. ހޫޘީން މި މިސައިލް ފޮނުވާލާފައިވަނީ ތާއިޒް ޕްރޮވިންސްގެ އިރުމަތީ ސަރަހައްދުން ކަމަށާއި، މިސައިލް އަރާފައިވަނީ ބާބުލް މަންދަބް ހުރަސްކޮށް ދަތުރުކުރަމުންދިޔަ މުދާ އުފުލާ ބޯޓަށް ކަމަށްވެސް މައުލޫމާތު ލިބެ އެވެ.
މި ހަމަލާ ދީފައިވަނީ ދުނިޔޭގެ ކަނޑުދަތުރުފަތުރުގެ އެންމެ މުހިންމު އެއް ސަރަހައްދު ކަމަށްވާ ރަތްކަނޑާއި ބާބުލް މަންދަބް ސަރަހައްދުން ދަތުރުކުރާ މުދާ އުފުލާ ބޯޓުފަހަރަށް ހޫޘީން މެދުނުކެނޑި އިންޒާރުދެމުންދާ ދަނޑިވަޅެއްގަ އެވެ.
އަނެއްކޮޅުން ޔަމަނުގެ ސަރުކާރު ސިފައިން ވެސް ވަނީ އަންގާރަ ދުވަހު ހޫޘީންގެ އެކި މަރުކަޒުތަކަށާއި އެމީހުން ޖަމާވާ ތަންތަނަށް އަމާޒުކޮށް ހަމަލާތަކެއް ދީފަ އެވެ.
މިގޮތުން ޔަމަނު ބައިނަލް އަގްވާމީ މުޖްތަމައުން ބަލައިގަންނަ ސަރުކާރުގެ ސިފައިންގެ ޑްރޯންތަކުން މާރިބް ގަވަރުނޭޓްގެ އަލް ރަޟާ ފަރުބަދަތަކުގައި ހުރި ހޫޘީންގެ މޯޓަރު ސިސްޓަމްތަކަށާއި މަރުކަޒުތަކަށް ހަމަލާދީފައިވާއިރު، އެ ގައުމުގެ ވައިގެ ސިފައިން ވަނީ އަލް ޖައުފް ގަވަރުނޭޓްގެ އަލް އާލަމް ފްރަންޓްގައި ހުރި ހޫޘީންގެ ކޭމްޕަކަށް ހަމަލާދީފަ އެވެ.
މީގެ ކުރިން ޔަމަނުގެ އަސްކަރީ މަސްދަރަކުން މައުލޫމާތު ދީފައިވާ ގޮތުގައި، ހޫޘީން ވަނީ ޑްރޯން އާއި މިސައިލް ބޭނުންކޮށްގެން މާރިބް ސިޓީގެ އާންމުން ދިރިއުޅޭ ސަރަހައްދުތަކަށް އަމާޒުކޮށް ހަމަލާތަކެއް ދީފައެވެ.
ޔަމަނުގެ ސަރުކާރުގެ ވައިގެ ދިފާއީ ނިޒާމުން ހޫޘީންގެ ޑްރޯންތަކަށް ހަމަލާދެމުންދިޔަ ވަގުތު، މާރިބް ސިޓީން ދެ ގޮވުމެއްގެ އަޑު އިވިފައިވާ ކަމަށް އަލް އަރަބިއްޔާ އަދި އަލް ހަދަޘްގެ ރިޕޯޓަރުން ބުނެފައިވެ އެވެ.
ހަމައެއާއެކު، ހޫޘީން ދަނީ ބަނދަރުމަތީ ރަށެއް ކަމަށްވާ އަލް މުޚާ އަށް މިސައިލުން ހަމަލާދެމުންނެވެ. އެ ބަނދަރު ކައިރިން ވިދިވިދިގެން ދެ ގޮވުމެއްގެ އަޑު އިވިފައިވާ ކަމަށް އަލް އަރަބިއްޔާގެ ރިޕޯޓަރު ވަނީ ބުނެފަ އެވެ.
އީރާނުގެ އެހީތެރިކަން ލިބޭ ހޫޘީން ފަހަކަށް އައިސް ވަނީ ރަތްކަނޑުން ދަތުރުކުރާ ބޯޓުފަހަރަށް އަމާޒުކޮށްދޭ ހަމަލާތައް އިތުރުކޮށް، ޔަމަނުގެ މަދަނީ އަދި އަސްކަރީ މަރުކަޒުތަކަށް ދޭ ހަމަލާތައް ވަރުގަދަކޮށްފަ އެވެ.
