ސައުދީގެ ތެޔޮ އުފުލާ 8 ބޯޓެއް ޔަމަނުގެ ހަތިޔާރު އެޅި ފައުޖުތަކުން ހުއްޓުވައިފި
1 އޯގަސްޓު 2026 | ހޮނިހިރު 08:06ސައުދީން ޔަމަނަށް އަޅާފައިވާ ދަތިކުރުމުގެ ފިޔަވަޅުތަކަށް ރައްދުދިނުމަށް ހޫޘީން ފެށި "ހިސާރަށް ހިސާރު" ސިޔާސަތުގެ ދަށުން، ސައުދީގެ އަށް ތެޔޮ ބޯޓެއްގެ މިސްރާބު ބަދަލުކުރަން މަޖުބޫރުކޮށްފި. މީގެ އިތުރުން ސައުދީން ޔަމަނުގެ ބަނދަރުތަކަށް ދޭ ހަމަލާތަކާ ގުޅިގެން، ކުރިއަށް އޮތް ތަނުގައި "ހަމަލާއަށް ހަމަލާ" ދިނުމުގެ ވަރުގަދަ މަރުހަލާއެއް ފަށާނެކަމުގެ އިންޒާރުވެސް ޔަމަނުގެ އަސްކަރިއްޔާއިން ވަނީ ދީފައި
ސައުދީ އަރަބިއްޔާގެ އަބްގަައިގްގައި ހުންނަ ތެޔޮ އުފައްދާ މަރުކަޒަކުން ދުން އަރަމުންދާ މަންޒަރު ފެންނަ ސެޓެލައިޓް ފޮޓޯއެއް އާންމުވެފައިވާއިރު، އީރާނަށް ތާއީދުކުރާ ޔަމަނުގެ ހޫޘީން ވަނީ ސައުދީގެ ތެޔޮ ސަޕްލައިކުރާ އަދި އުފުލާ މުހިންމު ސަރަހައްދުތަކަކަށް ހަމަލާދީފައިވާ ކަމަށް 2026 ޖުލައި 27 ވާ ހޯމަ ދުވަހު ބުނެފައި. ހޫތީންގެ އަސްކަރީ ތަރުޖަމާނު ޔަހްޔާ ސަރީއު ނެރުއްވި ބަޔާނެއްގައި ބުނެފައިވަނީ، އެ ޖަމާއަތުން އަމާޒުކުރި ތަންތަނުގެ ތެރޭގައި ތެލުގެ ސިނާއަތާ ގުޅުންހުރި ތަންތަން ހިމެނޭކަމަށް | ރޮއިޓާސް
ޔަމަނާ ދެކޮޅަށް ސައުދީ އަރަބިއްޔާއިން އަޅާފައިވާ ހިސާރުގެ ފިޔަވަޅުތަކަށް ރައްދު ދިނުމުގެ ގޮތުން ސަންޢާގެ ސަރުކާރުން ކަނޑައަޅާފައިވާ "ހިސާރަށް ހިސާރު" ސިޔާސަތުގެ ދަށުން، ސްޓްރެޓީޖިކް ބާބުލް މަންދަބު ކަނޑުއޮޅިން ދަތުރުކުރަން އުޅުނު ސައުދީގެ ތެޔޮ އުފުލާ އަށް ބޯޓެއް ޔަމަނުގެ ހަތިޔާރު އެޅި ފައުޖުތަކުން ހުއްޓުވައިފި ކަމަށް ބުނެފި އެވެ.
ޔަމަނުގެ ހޫޘީންގެ އަސްކަރީ ތަރުޖަމާނު ބްރިގޭޑިއާ ޔަހްޔާ ސަރީއު ހުކުރު ދުވަހު ނެރުއްވި ބަޔާނެއްގައި ވިދާޅުވީ، "ހިސާރަށް ހިސާރު" ސިޔާސަތުގެ ދަށުން ޔަމަނުގެ އަސްކަރިއްޔާއިން ސައުދީގެ ތެޔޮ ބޯޓުތަކަށް އަމާޒުކޮށް ކަނޑުގެ ސަރަހައްދުގައި އަޅާފައިވާ ފިޔަވަޅުތައް ވަރުގަދަކުރުމުގެ ނަތީޖާއެއްގެ ގޮތުން، ސައުދީގެ އަށް ބޯޓަކަށް މަޖުބޫރުވީ އެމީހުންގެ މިސްރާބު ބަދަލުކޮށް "ސްޓްރެއިޓް އޮފް ގުޑް ހޯޕް" މަގުން ދަތުރުކުރުމަށް ކަމަށެވެ.
އެމެރިކާއާއި ހުޅަނގުގެ ގައުމުތަކުގެ އަސްކަރީ، ސިޔާސީ އަދި ލޮޖިސްޓިކް އެހީތެރިކަމާއެކު 2015 ވަނަ އަހަރުގެ މާރިޗު މަހުގެ 26 ވަނަ ދުވަހު ސައުދީ އަރަބިއްޔާއާއި އެ ގައުމުގެ ބައިވެރިން ޔަމަނާ ދެކޮޅަށް ފެށި ފުޅާ ދާއިރާއެއްގެ އަސްކަރީ ކެމްޕޭނުގެ ބައެއްގެ ގޮތުން، އެ ގައުމުން ވަނީ ޔަމަނު ހިސާރުކޮށްފައި ކަމަށް ހޫޘީން އަންނަނީ ބުނަމުންނެވެ.
ހޫޘީން ވަނީ އެކަމަށް ބަދަލު ހިފުމުގެ ގޮތުން ކަމަށް ބުނެ ޖުލައި މަހުގެ 20 ވަނަ ދުވަހު ސައުދީ އަރަބިއްޔާއާ ދެކޮޅަށް ކަނޑުގެ ހިސާރެއް އިއުލާނުކޮށްފަ އެވެ. އެހެން ނަމަވެސް ބާބުލް މަންދަބު ކަނޑުއޮޅިން ދަތުރުކުރާ ވިޔަފާރި އުޅަނދުތަކުން ފީއެއް ނަގަން އުޅޭކަމަށް ދެކެވޭ ވާހަކަތައް އެ ޖަމާއަތުން ދާދި ފަހުން ވަނީ ދޮގުކޮށްފަ އެވެ.
ސައުދީ އާއި ސައުދީގެ ބައިވެރިން ފެށި ހަނގުރާމައިގެ ސަބަބުން ޔަމަނުގެ އެތައް ހާސް ރައްޔިތުންނެއް މަރުވެފައިވީ ނަމަވެސް، ސައުދީން ތާއީދުކުރާ ޔަމަނުގެ ކުރީގެ ސަރުކާރު އަލުން އިއާދަކުރުމަށް އެ ގައުމުން ކަނޑައެޅި މަގުސަދު ހާސިލުކުރެވިފައެއް ނުވެ އެވެ.
ޔަމަނުގެ ކުރީގެ ސަރުކާރުން ގައުމު ދޫކޮށް ފިލައިގެން ދިޔައީ އެ ގައުމުގެ ސިޔާސީ މަސްރަހު ހަލަބޮލިވެފައި ވަނިކޮށެވެ. އެއަށްފަހު، ދައުލަތް ހިންގުމުގެ ޒިންމާއާ ހަވާލުވީ ޔަމަނުގެ ރައްޔިތުންގެ މެދުގައި މަގުބޫލު ހަރަކާތެއް ކަމަށްވާ ހޫޘީންގެ ނަމުން އާއްމުކޮށްކިޔާ އަންސާރުﷲ އިންނެވެ.
ދާދި ފަހުން ސައުދީގެ ހަނގުރާމަމަތީ ބޯޓުތަކުން ޔަމަނުގެ މުހިންމު ބަނދަރެއް ކަމަށްވާ އަލް-ހުދައިދާއަށް ހަމަލާދިނުމާ ގުޅިގެން، ޔަމަނުގެ އަސްކަރިއްޔާއިން ވަނީ ސައުދީއާ ދެކޮޅަށް ކުރިއަށް އޮތް މަރުހަލާގެ ނަމަކީ "ހަމަލާއަށް ހަމަލާ" (އެސްކަލޭޝަން ފޯ އެސްކަލޭޝަން) ކަމަށް ކަނޑައަޅާފަ އެވެ.
