ޔަމަނުން ސައުދީގެ ތެޔޮ ޓޭންކަރަކަށް މިސައިލް ހަމަލާދީފި

ޔަމަނުގެ ހަތިޔާރުއެޅި ހޫޘީންގެ ފައުޖުތަކުން ރަތްކަނޑުގެ އުތުރު ސަރަހައްދުން ސައުދީ އަރަބިއްޔާގެ ތެޔޮ ޓޭންކަރަކަށް ހަމަލާދީފި އެވެ. މި ހަމަލާ ދީފައިވަނީ ސައުދީ އަރަބިއްޔާއާ ދެކޮޅަށް ޔަމަނުން އިއުލާންކޮށްފައިވާ ކަނޑުގެ ބްލޮކޭޑް ނުވަތަ ކަނޑުގެ މަގުތައް ބަންދުކުރުމުގެ ނިންމުމާ އެ އުޅަނދުން ޚިލާފުވުމާ ގުޅިގެން ކަމަށް ބުނެފައިވެ އެވެ.

ބުދަ ދުވަހު ނެރުނު ބަޔާނެއްގައި ޔަމަނުގެ ހަތިޔާރުއެޅި ފައުޖުތަކުގެ ތަރުޖަމާނު ބްރިގޭޑިއާ ޖެނެރަލް ޔަހްޔާ ސަރީއު ވިދާޅުވީ، "ވަފާ" ނަމަކަށް ކިޔާ މި ތެޔޮ ޓޭންކަރަށް ހަމަލާދީފައިވަނީ ސައުދީގެ ޔަންބޫ އައްސޭރިފަށާ ދުރުން ކަމަށެވެ. އަދި މި ހަމަލާ ދިނުމަށް "ގިނަ އަދަދެއްގެ ބެލިސްޓިކް މިސައިލް" ބޭނުންކޮށްފައިވާ ކަމަށާއި، މި ހަމަލާތައް އަމާޒަށް ސީދާ ވާސިލުވެފައިވާކަން އޭނާ ފާހަގަކުރެއްވި އެވެ.

ތަރުޖަމާނު ވިދާޅުވި ގޮތުގައި މި އޮޕަރޭޝަން ކުރިއަށް ގެންގޮސްފައިވަނީ "ސައުދީ ދުޝްމަނުންނާ ދެކޮޅަށް ކަނޑުގެ މަގުތައް ބަންދުކުރުމަށް ޔަމަނުގެ ހަތިޔާރުއެޅި ފައުޖުތަކުން ނިންމާފައިވާ ނިންމުން" ތަންފީޒުކުރުމުގެ ގޮތުންނެވެ. އަދި މިއީ ސައުދީން ޔަމަނަށް ކުރިމަތިކޮށްފައިވާ ހުރަސްތަކަށް ރައްދު ދިނުމުގެ ގޮތުން "ބަންދުކުރުމަކަށް ބަންދުކުރުމެއް" މި އުސޫލުގެ ދަށުން ހިންގި ހަރަކާތެއް ކަމަށްވެސް އޭނާ ވިދާޅުވި އެވެ.

ޖުލައި މަހުގެ 22 ވަނަ ދުވަހު ކަނޑުގެ މަގުތައް ބަންދުކުރާނެކަން އިއުލާންކުރި ފަހުން، މިހާތަނަށް ސައުދީގެ އަށް ތެޔޮ ޓޭންކަރަކަށް ހަމަލާދީފައިވާ ކަމަށް ޔަހްޔާ ސަރީއު ފާހަގަކުރެއްވި އެވެ.

މީގެ އިތުރުން، ސައުދީ އަރަބިއްޔާގެ 29 ތެޔޮ ޓޭންކަރެއްގެ ދަތުރުތަކަށް ހުރަސްއަޅައި، ރަތްކަނޑާއި އަރަބި ކަނޑުން އެ އުޅަނދުތައް އަނބުރާ ފޮނުވާލާފައިވާ ކަމަށްވެސް އޭނާ ވިދާޅުވި އެވެ.

ބާބުލް މަންދަބު ކަނޑުއޮޅިން ފެށިގެން ކަނޑުގެ މަގުތައް ބަންދުކުރުމުގެ ފިޔަވަޅުތައް ވަރުގަދަކުރުމާ ގުޅިގެން، ސައުދީ އަރަބިއްޔާއިން އެގައުމުގެ ތެޔޮ ޓޭންކަރުތައް ރަތްކަނޑުގެ އުތުރު ސަރަހައްދަށް މިސްރާބު ބަދަލުކުރަން ފަށާފައިވާ ކަމަށްވެސް އޭނާ ވިދާޅުވި އެވެ.

"ޔަމަނުގެ ހަތިޔާރުއެޅި ފައުޖުތަކުން ދޭ ހަމަލާތައް ކުރިއަށްދާނެ. އަދި ރަތްކަނޑުގެ އުތުރު ސަރަހައްދުން ސައުދީ ތެޔޮ ޓޭންކަރުތަކަށް އަމާޒުކޮށްދޭ ހަމަލާތައް އިތުރަށް ވަރުގަދަކޮށް، ހުރިހާ މަގުތަކެއް ބަންދުކޮށް އެ އުޅަނދުތަކަށް ދަތުރު ނުކުރެވޭނެ ގޮތް ހަދާނަން،" ތަރުޖަމާނު ވިދާޅުވި އެވެ.

މި ފަހުގެ ކުރިމަތިލުންތައް ހިނގާފައި މިވަނީ ހޫޘީންނާއި ސައުދީ އަރަބިއްޔާއާ ދެމެދު އޮތް ނުތަނަވަސްކަން އިންތިހާއަށް ބޮޑުވެފައިވާ ދަނޑިވަޅެއްގަ އެވެ.

މި ނުތަނަވަސްކަން އިތުރުވެފައިވަނީ، ބަލިމީހުންނާއި ހާލުގައި ޖެހިފައިވާ އާންމުން އުފުލާ އިންސާނީ އެހީގެ ދަތުރުތައް ހުއްޓުވުމަށްޓަކައި، މިދިޔަ މަހު ސައުދީން ސަންޢާގެ ބައިނަލްއަގުވާމީ ވައިގެ ބަނދަރަށް ވައިގެ ހަމަލާތަކެއް ދިނުމާ ގުޅިގެންނެވެ.

ސައުދީގެ އެ ހަމަލާތަކުގެ ރައްދުގައި ހޫޘީންގެ ފައުޖުތަކުން ވަނީ ބެލިސްޓިކް މިސައިލާއި ޑްރޯން ބޭނުންކޮށްގެން ސައުދީ އަރަބިއްޔާގެ އަބްހާ ބައިނަލްއަގުވާމީ ވައިގެ ބަނދަރަށް ހަމަލާދީފަ އެވެ. އަދި ސައުދީ އިސްވެ އޮވެ ޔަމަނަށް 12 އަހަރު ވަންދެން ކުރިމަތިކޮށްފައިވާ ހިސާރު ނިމުމަކަށް ގެނައުމަށްޓަކައި، ސައުދީއާ ދެކޮޅަށް ކަނޑުގެ ބްލޮކޭޑެއް ވެސް ވަނީ އިއުލާންކޮށްފަ އެވެ.

ޔަމަނުގެ ސުޕްރީމް ޕޮލިޓިކަލް ކައުންސިލްގެ ރައީސް މަހްދީ އަލް-މަޝާތު ވިދާޅުވީ، މިހާރު ހިނގަމުންދާ ހަމަލާތައް ހުއްޓާލައި ސުލްހަ ގާއިމުކުރެވޭނެ އޮތް ހަމައެކަނި މަގަކީ، އެއްވެސް ޝަރުތަކާ ނުލައި ސައުދީ އަރަބިއްޔާއިން ޔަމަނަށް ކުރިމަތިކޮށްފައިވާ ހިސާރާއި އުދުވާންތައް ހުއްޓާލުން ކަމަށެވެ.

"މި އުދުވާންތައް ކުރިއަށްދާނަމަ އަދި ހިސާރު ނައްތާނުލާނަމަ، ދެކެވޭ އެއްވެސް ވާހަކައަކީ ނުވަތަ ވެވޭ އެއްބަސްވުމަކީ ހަގީގަތެއް ނެތް ހުސް އުންމީދުތަކެއް،" މަޝާތު ދާދިފަހުން އިންޒާރު ދެއްވި އެވެ.

ސައުދީ އަރަބިއްޔާއާއި އެގައުމުގެ އަރަބި ބައިވެރިން ހޫޘީންނާ ދެކޮޅަށް ކަނޑުގެ މަގުތައް ބަންދުކޮށްފައިވަނީ، 2015 ވަނަ އަހަރުގެ މާރިޗު 26 ގައި ފެށި ފުޅާ ދާއިރާއެއްގެ އަސްކަރީ ކެމްޕޭނުގެ ދަށުންނެވެ. މި ހަރަކާތަށް އެމެރިކާއާއި ހުޅަނގުގެ އެހެން ގައުމުތަކުން އަސްކަރީ، ސިޔާސީ އަދި ލޮޖިސްޓިކް އެހީތެރިކަން ފޯރުކޮށްދީފައިވެ އެވެ.

މި ހަނގުރާމައިގެ ސަބަބުން ޔަމަނުގެ އެތައް ހާސް ބަޔަކު މަރުވެފައިވީ ނަމަވެސް، ސައުދީން ތާއީދުކުރާ ޔަމަނުގެ ކުރީގެ ސަރުކާރު އަލުން އިއާދަކުރުމަށް ކަނޑައެޅި މަގްސަދު ހާސިލުކުރެވިފައެއް ނުވެ އެވެ.

ޔަމަނުގެ ކުރީގެ ސަރުކާރުން ގައުމު ދޫކޮށް ފިލައިގެން ދިޔައީ ސިޔާސީ ގޮތުން ގައުމު ނުރައްކާތެރި ހާލަތަކަށް ދިޔުމުންނެވެ. އެއަށްފަހު ގައުމުގެ ކަންކަން ހިންގުމާ ހަވާލުވީ ޔަމަނުގެ ރައްޔިތުންގެ މެދުގައި މަގުބޫލު ހަރަކާތެއް ކަމަށްވާ އަންސާރުﷲ އިންނެވެ.