ކެންސަރު ބަލީގެ ފަރުވާއަށް ބޭނުންކުރާ އިންޖެކްޝަނެއްގެ ނަކަލުކޮށްފައިވާ ބެޗެއް ރާއްޖެ އެތެރެކޮށް ވިއްކަނީ، ސަމާލުވޭ!
12 އޯގަސްޓު 2026 | ބުދަ 13:15ކެންސަރު ބަލީގެ ފަރުވާއަށް ބޭނުންކުރާ 'އޮޕްޑީވޯ' ބްރޭންޑްގެ ބޭހެއްގެ ނަކަލުކޮށްފައިވާ ބެޗެއް (8081399) ރާއްޖެ އެތެރެކޮށްފައިވާތީ، އެ ބޭނުންކުރުމާއި ވިއްކުން އެމްއެފްޑީއޭއިން ވަނީ މަނާކޮށްފައި. މި ބޭހާ ގުޅޭ އެއްވެސް މައުލޫމާތެއް ލިބިފައިވާނަމަ އެ އޮތޯރިޓީގެ ހޮޓްލައިން 7200321 އަށް ގުޅައި ހިއްސާކުރުމަށް އެދިފައިވޭ
'އޮޕްޑީވޯ' ބްރޭންޑްގެ 'ނިވޯލުމެބް' ޖެނެރިކް ނަން ދެވިފައިވާ އިންޖެކްޝަން | ފިއަރސެފާރމާ.ކޮމް
ކެންސަރު ބަލީގެ ފަރުވާއަށް ބޭނުންކުރާ އިންޖެކްޝަނެއްގެ ނަކަލުކޮށްފައިވާ ބެޗެއް ރާއްޖެ އެތެރެކޮށްފައިވާތީ ސަމާލުވުމަށް މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން އިލްތިމާސްކޮށްފި އެވެ.
ބުދަ ދުވަހު އެމްއެފްޑީއޭއިން ބުނީ، ކެންސަރު ބަލީގެ ފަރުވާއަށް ބޭނުންކުރާ ބޭހެއްގެ އަސްލާ އެއްގޮތަށް ނަކަލުކޮށްގެން ހަދާފައިވާ ބެޗެއް ރާއްޖެއަށް އެތެރެކޮށްފައިވާކަން ކަށަވަރުވެފައިވާ ކަމަށެވެ.
މިކަމަށް ސަމާލުވާން ޖެހޭ ކަމަށް އިލްތިމާސްކޮށް އެމްއެފްޑީއޭއިން ބުނީ، ރާއްޖެއަށް އެތެރެކޮށްފައިވަނީ 'އޮޕްޑީވޯ' (OPDIVO®) ބްރޭންޑްގެ 'ނިވޯލުމެބް' (Nivolumab) ޖެނެރިކް ނަން ދެވިފައިވާ، 10 މިލިގްރާމް/އެމްއެލް 40 މިލިގްރާމް/4 އެމްއެލްގެ އިންޖެކްޝަން ކަމަށެވެ.
މިއީ އަޔަރލޭންޑްގެ 'ސްވޯޑްސް ލެބޯޓްރީސް އަންލިމިޓެޑް ކޮމްޕެނީ' އިން އުފައްދާފައިވާ އިންޖެކްޝަނެއް ކަމަށާއި، ބެޗު ނަންބަރަކީ 8081399 ކަމަށް އެ އޮތޯރިޓީން ބުނެ އެވެ.
އެމްއެފްޑީއޭއިން ބުނީ، މި ބެޗު ރާއްޖެ އެތެރެކޮށް ވިއްކައި ބޭނުން ކުރުމަކީ މަނާ ކަމެއް ކަމަށެވެ. އަދި މިކަމާ ގުޅޭގޮތުން އިތުރު މައުލޫމާތެއް ބޭނުންވާނަމަ އެ އޮތޯރިޓީގެ ހޮޓްލައިން ނަންބަރު 7200321 އަށް ގުޅުމަށް ވެސް އެ އޮތޯރިޓީން ވަނީ އެދިފަ އެވެ.
މީގެ އިތުރުން 2026 ވަނަ އަހަރުގެ މޭ އަދި ޖޫން މަހުގެ ތެރޭގައި ވެސް ކެންސަރު ބައްޔަށް ފަރުވާ ދިނުމަށް ބޭނުންކުރާ "ޑާޒަލެކްސް" (ޑެރަޓުމުމާބް) ނަމަކަށް ކިޔާ ބޭހެއްގެ ފޭކު ބާވަތެއް ރާއްޖެ އާއި މެކްސިކޯ ގައި ދައުރުވަމުންދާތީ އެކަމަށް ސަމާލުވުމަށް އިންޒާރު ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ނެރިފައިވެ އެވެ.
ނަކަލު ބޭސްތައް އިތުރުވާ މައްސަލަތައް ފެންމަތިވަމުންދާއިރު، ރާއްޖެއަށް އެތެރެކުރާ ކާބޯތަކެތީގެ ރައްކާތެރިކަން ކަށަވަރުކުރުމަށްޓަކައި ކޮންޓެއިނަރުތައް ހުޅުވާއިރު ހުންނަންޖެހޭ އެމްއެފްޑީއޭގެ މުވައްޒަފުން އެތަނަށް ނުދާ މައްސަލަ ވެސް ވަނީ މިފަހުން ފެންމަތިވެފަ އެވެ. އަދި މި މައްސަލައާ ގުޅިގެން ކަމާގުޅުންހުރި އެއްވެސް މީހެއްގެ އަދި އިދާރާގެ ބަހެއް ވަނީ ލިބޭ ގޮތް ނުވެފަ އެވެ.
