ކެންސަރުގެ ފަރުވާ އަންނަ އަހަރު ނިންމާލެވޭނެ ކަމަށް އިނގިރޭސި ރަސްގެފާނު ވިދާޅުވެއްޖެ

ކެންސަރަށް މިހާރު ހޯއްދަވަމުން ގެންދަވާ ފަރުވާ، ކުރިއަށް އޮތް އަހަރުގެ ތެރޭގައި ނިންމާލެވޭނެ ކަމުގެ އުންމީދު ބޮޑު ކަމަށް އިނގިރޭސިވިލާތުގެ ރަސްގެފާނު، ޗާރލްސް ތިން ވަނަ ވިދާޅުވެއްޖެ އެވެ. 

ކެންސަރަށް ފަރުވާ ހޯއްދަވަމުން ގެންދަވާ ރަސްގެފާނު ޗާރލްސް މިހެން ވިދާޅުވީ، ހުކުރު ދުވަހު ޗެނަލް ފޯ ޓެލެވިޝަންއާ ވާހަކަ ދައްކަވަމުންނެވެ. މިއީ ކެންސަރު ދިރާސާ ތަކަށް ފައިސާ ހޯދުމަށް ބާއްވާ ސްޓޭންޑް އޮފް ޓު ކެންސަރު ކެމްޕެއިން އަށް އޭނާ ދެއްކެވި ވާހަކަ އެވެ. 

އުމުރުފުޅުން 77 އަހަރުގެ ޗާރލްސް ވިދާޅުވީ ކުރީ ކޮޅު ކެންސަރު ބަލި ދެނެގަތުމާއި، ޚަރުދަނާ ފަރުވާ އަދި ޑޮކްޓަރުންގެ ފުރިހަމަ އިރުޝާދު ތަކަށް ތަބާވުމުގެ ސަބަބުން އޭނާގެ ކެންސަރު ފަރުވާ އައު އަހަރުގެ ތެރޭގައި ނިންމާލެވޭނެ ކަމުގެ އުންމީދު ބޮޑު ކަމަށެވެ. ރަސްގެފާނު ޗާރލްސް އަށް ކެންސަރު ބަލި ޖެހިފައިވާކަން ހާމަ ކުރައްވާފައި ވަނީ މިއަހަރުގެ ފެބްރުވަރީ މަހުގެ ތެރޭގަ އެވެ. ނަމަވެސް، އެއީ ކޮން ބާވަތެއްގެ ކެންސަރު ބައްޔެއް ކަމެއް ހާމަ ކޮށްފައި ނުވެ އެވެ. 

ބައްޔާ ގުޅޭ ގޮތުން ވާހަކަ ދައްކަވަމުން ރަސްގެފާނު ވިދާޅުވީ ކެންސަރު ބައްޔެއް ދެނެގަތުމަކީ ވަރަށް ބޮޑު ކަމެއް ކަމަށް ހީވެދާނެ ކަމަށެވެ. ނަމަވެސް، ކުރީ ކޮޅު ބަލި ދެނެގަތުމަކީ ފަރުވާގެ ދަތުރު ބަދަލު ކޮށްލެވޭނެ މުހިންމު ކަމެއް ކަމަށް އޭނާ ފާހަގަ ކުރެއްވި އެވެ. އެކަމުގެ ސަބަބުން ފަރުވާ ދެއްވާ ޑޮކްޓަރުންނަށް ވެސް ގިނަ ވަގުތު ލިބިގެންދާ ކަަމަށާއި، އާއިލާ އާއި ގާތް ރަޙުމަތްތެރިންނަށް އުންމީދު ލިބިގެން ދާ ކަމަށް ވެސް ރަސްގެފާނު ފާހަގަ ކުރެއްވި އެވެ. 

މީގެ އިތުރުން ރަސްގެފާނު ވިދާޅުވީ އިނގިރޭސިވިލާތުގައި ދިރިއުޅޭ މީހުންގެ ތެރެއިން މަދުވެގެން ނުވަ މިލިއަން މީހުން، ކެންސަރު ހުރިތޯ ބެލުމުގެ ޕްރޮގްރާމްގައި ބައިވެރި ނުވާ ކަމަށް ހާމަ ކުރައްވާފައި އެވެ. އަދި އިންތިހާ އަށް ކަންބޮޑުވެ ވަޑައިގަންނަވާ ކަމެއް ކަމަށް ވެސް ރަސްގެފާނު ފާހަގަ ކުރެއްވި އެވެ. އެ މީހުން އެކަން ކޮށްފި ނަމަ، ކުރީ ކޮޅު ބަލި ދެނެގަތުމުގެ ފުރުސަތު ވަރަށް ގިނަ ބަޔަކަށް އޮންނާނެ ކަމަށް ވެސް ރަސްގެފާނު ވަނީ ވިދާޅުވެފަ އެވެ. 

ހަމަ އެހެންމެ، ކެންސަރަށް ފަރުވާ ދިނުމުގައި ހޯދާފައިވާ ކުރިއެރުންތައް ފާހަގަ ކުރައްވައި، ރަސްގެފާނު ވަނީ އެކަމަށް ވެސް ވަރަށް ބޮޑަށް ތައުރީފު ކުރައްވައިފަ އެވެ. ރަސްގެފާނުގެ ވާހަކަފުޅާ ގުޅިގެން އިނގިރޭސިވިލާތުގެ ބޮޑު ވަޒީރު ކިއާ ސްޓާމަރ ވިދާޅުވެފައި ވަނީ، ކުރީ ކޮޅު ކެންސަރު ބަލި ދެނެގަނެވިއްޖެ ނަމަ، ފުރާނަ ސަލާމަތް ކުރެވޭނެ ކަމަށެވެ. އަދި ރަސްގެފާނުގެ ފަރުވާ އަވަހަށް ނިންމާލެވޭނެ ކަމުގެ އުންމީދު އޮތުމަކީ އުފާ ކުރައްވާ ކަމެއް ކަމަށް ވެސް ބޮޑު ވަޒީރު ވިދާޅުވި އެވެ. 

ރަސްގެފާނު ޗާރލްސްގެ ޞިއްޙީ ޙާލަތާ ގުޅޭ ގޮތުން އާންމު ގޮތެއްގައި ވާހަކަ ދައްކަވަމުން ގެންދަވާއިރު، މީގެ ކުރިން ރަސްގެފާނުގެ މަންމާާފުޅު ރާނީ އެލިޒަބަތު ދެ ވަނައިގެ ޞިއްޙީ ޙާލު ކޮޅު ވަރަށް ބޮޑަށް ސިއްރު ކޮށްފައި އޮތް ކަމަށް ރިޕޯޓު ތަކުގައި ވަނީ ފާހަގަ ކޮށްފަ އެވެ. އެއާ ޚިލާފަށް، ރަސްގެފާނު ގެންދަވަނީ އޭނާގެ ޞިއްޙީ ޙާލު ކޮޅާ ގުޅޭ އެންމެ ފަހުގެ މައުލޫމާތުތައް ހިއްސާ ކުރައްވަމުން ކަމަަށް ބުނެފައިވެ އެވެ.

ކެންސަރަށް ފަރުވާ ހޯދުމަށް ފަށާފައިވާ ކެމްޕެއިން ސްޓޭންޑް އަޕް ޓު ކެންސަރުން ވަނީ މިހާތަނަށް ވިހި ވައްތަރަށް ވުރެ ގިނަ ކެންސަރު ބައްޔަަށް ދިރާސާ ކުރުމަށް އެއް ސަތޭކަ ތޭރަ މިލިއަން ޕައުންޑަށް ވުރެ ގިނަ ފައިސާ ހޯދައިފަ އެވެ.