2050 އަންނައިރު ދުނިޔޭގެ އާބާދީގެ 90 އިންސައްތައަށްވުރެ ގިނަ މީހުންނަށް ކޮންމެވެސް ސިފައެއްގައި ކެންސަރުގެ އަސަރު ފޯރާނެ: ޑަބްލިއުއެޗްއޯ

 2050 ވަނަ އަހަރާ ހަމައަށް ދާއިރު ދުނިޔޭގައި ކެންސަރު ބަލި ޖެހޭ މީހުންގެ އަދަދު ދެގުނައާ ގާތްކުރާ މިންވަރަކަށް އިތުރުވާނެ ކަމުގެ އިންޒާރު ދުނިޔޭގެ ސިއްހަތު ޖަމްއިއްޔާ (ޑަބްލިއުއެޗްއޯ) އިން ދީފި އެވެ. އަދި އެހާހިސާބަށް ދާއިރު ދުނިޔޭގެ އާބާދީގެ 90 އިންސައްތައަށްވުރެ ގިނަ މީހުންނަށް ކޮންމެވެސް ސިފައެއްގައި މި ބަލީގެ އަސަރު ފޯރާނެ ކަމަށް އެ ޖަމްއިއްޔާއިން ލަފާކުރެ އެވެ.

ބުދަ ދުވަހު އާންމުކުރި ރިޕޯޓެއްގައި އެ އެޖެންސީން ބުނެފައިވަނީ، ހިތުގެ ބަލިތަކަށް ފަހު ދުނިޔޭގައި ދެވަނައަށް އެންމެ ގިނައިން މީހުން މަރުވާ ސަބަބަކީ ކެންސަރު ބަލި ކަމަށެވެ. މި ބަލީގައި ކޮންމެ ދުވަހަކު 26،000 އަށްވުރެ ގިނަ މީހުން މަރުވަމުންދާއިރު، މިހާރު އަހަރަކު ގާތްގަނޑަކަށް 10 މިލިއަން މީހުން މަރުވެ، 20.6 މިލިއަން އާ ކޭސް ރިޕޯޓްކުރެ އެވެ. އަދި މިކަމަށް އަވަސް ފިޔަވަޅުތަކެއް ނާޅައިފިނަމަ، 2050 ވަނަ އަހަރާ ހަމައަށް ދާއިރު އަހަރަކު އަލަށް ބަލިޖެހޭ މީހުންގެ އަދަދު 35 މިލިއަނަށް އަރާނެ ކަމަށް ޑަބްލިއުއެޗްއޯއިން އިންޒާރުދެ އެވެ. މީގެއިތުރުން، ކޮންމެ ފަސް މީހަކުން އެކަކަށް އެމީހެއްގެ ހަޔާތުގައި ކެންސަރު ޖެހޭނެ ކަމަށް ލަފާކުރެވޭއިރު، އެންމެ ގިނަ މީހުން މަރުވަނީ ފުއްޕާމޭގެ ކެންސަރުގަ އެވެ.

ކެންސަރަށް ފަރުވާ ދިނުމުގައި ބޮޑެތި ކުރިއެރުންތަކެއް ހޯދާފައިވީ ނަމަވެސް، ބަލިން ސަލާމަތްވުމުގެ ފުރުސަތު ބޮޑަށް ބިނާވެފައިވަނީ ބަލިމީހާ ދިރިއުޅޭ ގައުމަށާއި އޭނާގެ މާލީ ތަނަވަސްކަމުގެ މައްޗަށް ކަމަށް ޑަބްލިއުއެޗްއޯއިން ފާހަގަކުރެ އެވެ. އެގޮތުން، މުއްސަނދި ގައުމުތަކުގައި އުރަމަތީގެ ކެންސަރާއި ކުޑަކުދިންނަށް ޖެހޭ ކެންސަރުން ސަލާމަތްވާ މީހުންގެ ނިސްބަތް 85 އިންސައްތައަށްވުރެ މަތީގައި ހުރި ނަމަވެސް، ފަގީރު ގައުމުތަކުގައި މި ނިސްބަތް ހުރީ 45 އިންސައްތައަށްވުރެ ދަށުގަ އެވެ.

ދުނިޔޭގެ 23 ގައުމެއްގައި ރޭޑިއޯތެރަޕީގެ ހިދުމަތް ލިބެން ނެތްއިރު، ދުނިޔޭގެ ގައުމުތަކުގެ ތިންބައިކުޅަ ދެބައި ގައުމުގެ އާންމު ސިއްހީ ނިޒާމުގެ ތެރޭގައި ކެންސަރުގެ ފަރުވާ ހިމަނާފައެއް ނުވެ އެވެ. އަދި ފަރުވާގެ ހަރަދު ބޮޑުވުމުގެ ސަބަބުން ބައެއް ސަރަހައްދުތަކުގެ 90 އިންސައްތަ ބަލިމީހުންނަށް މަޖުބޫރުވަނީ ފަރުވާ ހުއްޓާލާށެވެ. ޖުމްލަގޮތެއްގައި، މަދުވެގެން 45 އިންސައްތަ ބަލިމީހުންނަށް މާލީ ބޮޑެތި ދަތިތަކާ ކުރިމަތިލާންޖެހޭއިރު، މިއީ މުޅި ދުނިޔޭގައިވެސް މީހުން ބަނގުރޫޓުވާ މައިގަނޑު އެއް ސަބަބެވެ.

މިހާރު ކަންކަން ހުރި މަގުން ކުރިއަށްދާނަމަ، 2050 ވަނަ އަހަރާ ހަމައަށް ދާއިރު ދުނިޔޭގެ އާބާދީގެ 92 އިންސައްތަ މީހުންނަށް، އެމީހަކަށް އަމިއްލައަށް ނުވަތަ އާއިލާގެ ގާތް މީހަކަށް ބަލިޖެހުމުގެ ސަބަބުން ކެންސަރުގެ އަސަރު ފޯރާނެ ކަމަށް އެ އެޖެންސީން ލަފާކުރެ އެވެ. އެހެންކަމުން، ސަރުކާރުތަކާއި ބައިނަލްއަގުވާމީ ޖަމްއިއްޔާތަކާއި އަމިއްލަ ކުންފުނިތަކުން "އިންސާނުންނަށް އިސްކަންދޭ" ސިޔާސަތެއް ގެންގުޅުމަށް ޑަބްލިއުއެޗްއޯއިން ވަނީ ގޮވާލާފަ އެވެ. މީގެ ތެރޭގައި ބަލިން ރައްކާތެރިވުމާއި، ބަލި ދެނެގަތުމާއި، ފަރުވާ ދިނުން އާންމު ސިއްހީ ނިޒާމުގެ ތެރެއަށް ވެއްދުމާއި، ބަލިމީހުންނާއި އެހީތެރިންނަށް ދޭ އެއްބާރުލުން އިތުރުކުރުމާއި، ދިރާސާތަކުގެ އެހީގައި ފަރުވާ ލިބޭނެ މަގު ފަހިކޮށްދިނުން ހިމެނެ އެވެ.

މިހާރުވެސް ދުނިޔޭގެ އެތައް ގައުމަކުން ދަނީ ތަފާތު ގޮތްގޮތަށް ކެންސަރު ވެކްސިން އުފެއްދުމުގެ މަސައްކަތް ކުރަމުންނެވެ. އެގޮތުން ރަޝިޔާއިން ދަނީ ކޮންމެ މީހެއްގެ ހަށިގަނޑުގައި އުފެދޭ ޓިއުމަރާ ގުޅޭގޮތަށް ތައްޔާރުކުރާ "ޕާސަނަލައިޒްޑް އެމްއާރުއެންއޭ" ކެންސަރު ވެކްސިން އުފެއްދުމަށް ބުރަކޮށް މަސައްކަތް ކުރަމުންނެވެ. މިދިޔަ މާރިޗު މަހު، ހަމުގެ ކެންސަރަށް ހާއްސަ "ނިއޯއޮންކޯވެކް" (Neooncovac) އަދި ގޮހޮރުގެ ކެންސަރަށް ހާއްސަ "އޮންކޯޕެޕްޓް" (Oncopept) ކްލިނިކަލް ޓްރަޔަލްތަކުގައި ބޭނުންކުރުމުގެ ހުއްދަ ވަނީ ދީފަ އެވެ. އޭގެ ފަހުން 40 އަށްވުރެ ގިނަ ބަލިމީހުން މި ޓްރަޔަލްގައި ބައިވެރިވެފައިވާއިރު، ފުރަތަމަ ވެކްސިން ޖެހި މީހުންގެ ހަށިގަނޑުން ބައްޔާ ދެކޮޅަށް ވަރުގަދަ ދިފާއީ ނިޒާމެއް އުފެދިފައިވާކަން ވަނީ ފާހަގަކުރެވިފަ އެވެ. މި ވެކްސިންތަކުގެ ކާމިޔާބީ ކަށަވަރުވުމުން، ރަޝިޔާގެ ގައުމީ ސިއްހީ އިންޝުއަރެންސްގެ ދަށުން ހިލޭ ފޯރުކޮށްދޭނެ ކަމަށް ބެލެވެ އެވެ.

ރަޝިޔާގެ އިތުރުން އެމެރިކާ، އިނގިރޭސިވިލާތް، ކިއުބާ އަދި ޗައިނާއިންވެސް ދަނީ ހުއްދަ ދެވިފައިވާ ފަރުވާތަކާއި، ކްލިނިކަލް ޓްރަޔަލްތައް ނުވަތަ އެމްއާރުއެންއޭ ޓެކްނޮލޮޖީ ބޭނުންކޮށްގެން ކެންސަރު ވެކްސިން އުފެއްދުމުގެ މަސައްކަތް ކުރަމުންނެވެ.