ރާއްޖެއިން ފޭކު ކެންސަރު ބޭހެއް ފެނިފައިވާތީ ދުނިޔޭގެ ސިއްހަތު ޖަމްއިއްޔާ އިން މުޅި ދުނިޔެއަށް ސިއްހީ އިންޒާރެއް ނެރެފި

ކެންސަރު ބައްޔަށް ފަރުވާ ދިނުމަށް ބޭނުންކުރާ "ޑާޒަލެކްސް" (ޑެރަޓުމުމާބް) ނަމަކަށް ކިޔާ ބޭހެއްގެ ފޭކު ބާވަތެއް ދިވެހިރާއްޖެ އާއި މެކްސިކޯ ގައި ދައުރުވަމުންދާތީ އެކަމަށް ސަމާލުވުމަށް އިންޒާރު ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ނެރެފި އެވެ.

މި މައްސަލަ ފެންމަތިވެފައިވަނީ 2026 ވަނަ އަހަރުގެ މޭ އަދި ޖޫން މަހުގެ ތެރޭގަ އެވެ. ޑަބްލިއުއެޗްއޯއިން ހާމަކުރި ގޮތުގައި، ހުއްދަ ނެތް ފަރާތްތަކުން ސަޕްލައިކޮށްފައިވާ މި ފޭކު އިންޖެކްޝަންތައް ފެނިފައިވަނީ ދިވެހިރާއްޖެއާއި މެކްސިކޯއިންނެވެ.

މި މައްސަލައިގައި ރިޕޯޓްކޮށްފައިވާ މަދުވެގެން އެއް ހާދިސާއެއްގައި، ހޮސްޕިޓަލްތަކަށް ފޭކު ބޭސް ލިބިފައިވާކަން ފާހަގަކުރެވިފައިވެ އެވެ. މިއާއެކު، ބޭސް ސަޕްލައިކުރުމުގެ ނިޒާމުގައި ހުރި މައްސަލަތަކާ މެދު ބައިނަލްއަގުވާމީ ފެންވަރުގައި ވަނީ ކަންބޮޑުވުން އުފެދިފަ އެވެ.

ކެންސަރު ބޭހާ ބެހޭ މައުލޫމާތު

ޑާޒަލެކްސް (ޑެރަޓުމުމާބް) އަކީ ކަށީގެ މަދުގެ ޕްލާޒްމާ ސެލްތަކަށް ޖެހޭ ކެންސަރެއް ކަމަށްވާ "މަލްޓިޕަލް މައިލޯމާ" އާއި، ލޭގެ ނާދިރު ބައްޔެއް ކަމަށްވާ "އެމިލޮއިޑް ލައިޓް-ޗެއިން (އޭއެލް) އެމިލޮއިޑޯސިސް" އަށް ފަރުވާ ދިނުމަށް ބޭނުންކުރާ އެންޓިބޮޑީއެކެވެ.

މި ބޭހަކީ އެކި ބާވަތްތަކުގެ ކެންސަރަށް ފަރުވާ ދިނުމުގައި ވަރަށް މުހިންމު ދައުރެއް އަދާކުރާ ބޭހެކެވެ. އެހެންކަމުން، މި ބޭހުގެ ފޭކު އެއްޗެހި ބޭނުންކުރުމުގެ ސަބަބުން ފަރުވާ ލަސްވުމާއި، ފަރުވާ ކާމިޔާބު ނުވުމުގެ އިތުރުން ފުރާނައަށް ނުރައްކާވާ ފަދަ ހާލަތްތައް ކުރިމަތިވެދާނެ ކަމަށް ޑަބްލިއުއެޗްއޯއިން ބުނެފައިވެ އެވެ.

ޑަބްލިއުއެޗްއޯއިން ބުނި ގޮތުގައި މި ފޭކު އުފެއްދުންތަކަކީ އޭގެ އަސްލާއި، އެކުލެވިގެންވާ މާއްދާތަކާއި ނުވަތަ އުފެއްދި ފަރާތާ ގުޅޭގޮތުން ގަސްތުގައި އޮޅުވާލާފައިވާ ތަކެއްޗެވެ. މި ބޭސް އުފައްދާ ކުންފުނި ކަމަށްވާ "ޖެންސަން" އިން ކަށަވަރުކޮށްދީފައިވާ ގޮތުގައި، MYS7381 އަދި STV1K01 އަކީ ސައްހަ ބެޗް ނަންބަރުތަކެއް ނޫނެވެ. އެހެންކަމުން، މި ބެޗް ނަންބަރުތައް ޖަހާފައިވާ އެއްވެސް ޑާޒަލެކްސް އުފެއްދުމަކީ ފޭކު އެއްޗެއް ކަމަށް ބަލައި، އެ ބޭނުން ނުކުރުމަށް ވަނީ އަންގާފަ އެވެ.

މީގެ އިތުރުން، ފޭކު ބެޗްތަކުގެ ތެރެއިން ބައެއް ފުޅިތަކުގެ އެތެރޭގައި ލޮލަށް ފެންނަ ކުނޑި ނުވަތަ ތިކިތަކެއް ހުރިކަން މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން ވެސް ވަނީ ރިޕޯޓްކޮށްފައި ކަމަށް ވެސް ޑަބްލިޔުއެޗްއޯ އިން ބުނެފައިވެ އެވެ.

އދ. ގެ ސިއްހަތާ ބެހޭ އިދާރާއިން ވަނީ ގައުމީ ފެންވަރުގައި ސިއްހީ ކަންކަން ރެގިއުލޭޓްކުރާ އިދާރާތަކާއި، ސިއްހީ ހިދުމަތްދޭ ފަރާތްތަކާއި، ހޯލްސޭލްކޮށް ބޭސް ވިއްކާ ފަރާތްތަކުގެ އިތުރުން ސަޕްލަޔަރުން، ބޭސް ސަޕްލައިކުރާ ނިޒާމުގެ ސަލާމަތީ ކަންކަން ވަރުގަދަކުރުމަށް ގޮވާލާފަ އެވެ. 

ހަމައެއާއެކު، ގަވާއިދާ ހިލާފަށް ބޭސް ވިއްކާ މާކެޓްތަކަކީ ފޭކު ބޭސް ދައުރުވުމުގެ ފުރުސަތު ބޮޑު ތަންތަން ކަމަށްވާތީ، އެފަދަ ތަންތަން ވަރަށް ގާތުން މޮނިޓަރ ކުރުމަށް ވެސް ޑަބްލިއުއެޗްއޯއިން ގައުމުތަކަށް އިރުޝާދު ދީފައިވެ އެވެ.