ސްރީލަންކާ ގައި ކެންސަރު ބަލިޖެހޭ މީހުންގެ އަދަދު އިންތިހާ އަށް އިތުރުވެ، ކޮންމެ ދުވަހަކު އަލަށް 100 މީހުންނަށް ބަލި ޖެހޭ ކަމަށް ހާމަ ކޮށްފި

ސްރީލަންކާ ގައި ކެންސަރު ބަލި ފެތުރެމުންދަނީ ނުރައްކާތެރި އަދި ބިރުވެރި މިންވަރަކަށް ކަމަށާއި ތަފާސްހިސާބުތަކުން ދައްކާ ގޮތުގައި އެ ގައުމުގައި ކޮންމެ ދުވަހަކު އަލަށް 100 މީހުންނަށް ކެންސަރު ބަލި ޖެހޭކަމަށް ހާމަ ކޮށްފި އެވެ.

ތަފާސް ހިސާބުތަކުން ދައްކާ ގޮތުގައި މި ބަލީގައި ދުވާލަކު ގާތްގަނޑަކަށް 40 މީހުން މަރުވަމުންދާއިރު، ސިއްހީ މާހިރުން އިންޒާރު ދެއްވާ ގޮތުގައި މިއީ ދިރިއުޅުމުގެ ނުރަނގަޅު އާދަކާދަތަކާއި ތިމާވެށްޓަށް ދިމާވެފައިވާ ނުރައްކާތަކުގެ ސަބަބުން ކުރިމަތިވަމުންދާ ކަމެކެވެ.

ނޭޝަނަލް ކެންސަރ ކޮންޓްރޯލް ޕްރޮގްރާމްގެ އިސްވެރިޔާ ޑރ. ހަސަރޭލީ ފެނާންޑޯ ބުދަ ދުވަހު ހާމަކުރެއްވި ގޮތުގައި، ކެންސަރު ބަލި އިތުރުވުމަށް މެދުވެރިވާ މައިގަނޑު ސަބަބުތަކުގެ ތެރޭގައި ދުންފަތުގެ އިސްތިއުމާލު ކުރުމާއި، މަސްތުވާތަކެތި ބޭނުންކުރުމާއި، ޑީސަލް އިންޖީނުން ބޭރުވާ ދުމާއި، ޕްލާސްޓިކް އެންދުމުން އުފެދޭ ވިހަ ގޭސްތަކުގެ އިތުރުން އެއްގަމު މަސް ކެއުން އިތުރުވުން ހިމެނެ އެވެ. މީގެ ތެރެއިން ފިރިހެނުންގެ މެދުގައި އެންމެ އާންމުކޮށް ފެންނަނީ އަނގައިގެ ކެންސަރު ކަމަށް ވެސް ރިޕޯޓުކޮށްފައިވެ އެވެ.

ފެބްރުއަރީ 4 ވަނަ ދުވަހު ފާހަގަކުރާ ދުނިޔޭގެ ކެންސަރު ބަލީގެ ދުވަހާ ގުޅިގެން މީޑިއާ އަށް މައުލޫމާތު ދެއްވަމުން ޑރ. ފެނާންޑޯ ވިދާޅުވީ، ކެންސަރު ޖެހުމަށް މެދުވެރިވާ އެންމެ ބޮޑު ސަބަބަކީ އަދިވެސް ދުންފަތް ކަމަށެވެ. އޭގެ ފަހުން ބަނގުރާ ބުއިމާއި، ޑީސަލް ދުމާއި، ޕްލާސްޓިކް އަދި ޕޮލިތީން އެންދުމާއި، ރޭޑަން ފަދަ ސިނާއީ ގޭސްތަކަށް ހުށަހެޅުން ހިމެނޭ ކަމަށް އޭނާ ވިދާޅުވި އެވެ. މީގެ އިތުރުން، އޫރުމަސް ހިމެނޭހެން އެއްގަމު މަސް ކެއުމަކީ އިންސާނުންގެ ހަށިގަނޑުގައި ކެންސަރު އުފެދުމަށް މަގުފަހިކޮށްދޭ ކަމެއް ކަމުގައި މިހާރު ވަނީ ކަނޑައެޅިފަ އެވެ.

ސްރީ ލަންކާ ގެ ގައުމީ ކެންސަރު ރެޖިސްޓްރީގެ ތަފާސްހިސާބުތަކަށް ހަވާލާދީ އެ ގައުމުގެ ދުވަހު ނޫސް ޑެއިލީ މިރަރ އިން ރިޕޯޓު ކޮށްފައިވާ ގޮތުގައި، 2022 ވަނަ އަހަރު އަލަށް 35,855 މީހުންނަށް ކެންސަރު ޖެހިގެން ރިޕޯޓްކޮށްފައިވެ އެވެ. މީގެ ތެރޭގައި ހިމެނެނީ 19,500 އަންހެނުންނާއި 16,400 ފިރިހެނުންނެވެ. ފިރިހެނުންނަށް އެންމެ ގިނައިން ޖެހެނީ އަނގައިގެ ކެންސަރު ކަމަށްވާއިރު، އަންހެނުންގެ މެދުގައި އެންމެ އާންމީ އުރަމަތީގެ ކެންސަރެވެ. މީގެ އިތުރުން ތައިރޮއިޑް ކެންސަރާއި ގޮހޮރުގެ ކެންސަރު ޖެހޭ މީހުންގެ އަދަދުވެސް ވަނީ އިތުރުވެފަ އެވެ.

މަހަރަގަމާގައި ހުންނަ އަޕޭކްޝާ ހޮސްޕިޓަލަށް ކޮންމެ ދުވަހަކު 3,000 އާއި 4,000 އާ ދެމެދުގެ އަދަދަކަށް ކެންސަރު ބަލިމީހުން ދައްކާއިރު، މީގެ ތެރެއިން ސީދާ ފަރުވާ ހޯދަމުންދަނީ އެންމެ 20 އިންސައްތަ މީހުންނެވެ. ބާކީ ތިބި މީހުންނަކީ ބަލި އިތުރަށް ބޮޑުވިޔަ ނުދިނުމަށް ގަވާއިދުން ޗެކަޕް ހަދަމުންދާ މީހުން ކަމަށް ރިޕޯޓު ކޮށްފައިވެ އެވެ.

ޑރ. ފެނާންޑޯ އިތުރަށް ފާހަގަކުރެއްވި ގޮތުގައި، އުމުރުން ދުވަސްވުމާއި، ވިރާސީ ގޮތުން ވާރުތަވާ ސަބަބުތަކަކީ އިންސާނުންނަށް ބަދަލުނުކުރެވޭނެ ކަންކަމެވެ. ސްރީލަންކާގެ އާބާދީގައި އުމުރުން ދުވަސްވީ މީހުން އިތުރުވަމުންދިއުމަކީ، ހަށިގަނޑުގެ ދިފާއީ ނިޒާމު ބަލިކަށިވެ ކެންސަރު ޖެހުމުގެ ފުރުސަތު ބޮޑުވާނެ ކަމެއް ކަމަށް އޭނާ ވިދާޅުވި އެވެ.

ނަމަވެސް، ދުނިޔޭގެ ސިއްހަތު ޖަމިއްޔާ (ޑަބްލިޔުއެޗްއޯ) އިން ހާމަކުރާ ގޮތުގައި 30 އިންސައްތައާއި 50 އިންސައްތައާ ދެމެދުގެ ކެންސަރު ބައްޔަކީ ދުރާލާ ރައްކާތެރިވެވިދާނެ ބަލިތަކެވެ. އެހެންކަމުން، ދުންފަތާއި މަސްތުވާތަކެއްޗާ ދުރުހެލިވެ، ތިމާވެށި ތަޣައްޔަރުވާ ކަންކަމުން ރައްކާތެރިވެ، އަދި ސިއްހަތަށް ފައިދާހުރި ކާނާ ބޭނުންކުރުމުގެ އާދަ އަށަގަންނެވުމުގެ ތެރެއިން، މި ނުރައްކާތެރި ބަލީގައި މަރުވާ މީހުންގެ އަދަދު މަދުކުރުމަށް މާހިރުން އިލްތިމާސް ކުރައްވަ އެވެ.