ޕާކިސްތާނުގެ ދާޚިލީ ވަޒީރު އީރާނަށް ވަޑައިގެންފި

ޕާކިސްތާނާއި އީރާނާ ދެމެދު އޮންނަ ގުޅުން ބަދަހިކުރުމަށާއި، އެމެރިކާއާއި އީރާނާ ދެމެދު ސީދާގޮތުންނާއި ނުސީދާގޮތުން ކުރިއަށްދާ ޑިޕްލޮމެޓިކް މުއާމަލާތްތަކަށް މަގުފަހިކޮށްދިނުމަށް ޕާކިސްތާނުން ކުރަމުންދާ މަސައްކަތްތަކުގެ ތެރެއިން، އެ ގައުމުގެ ދާޚިލީ ވަޒީރު މުހުސިން ނަގްވީ އީރާނުގެ ވެރިރަށް ތެހެރާނަށް ވަޑައިގެންފި ކަމަށް ޕާކިސްތާނުގެ ފޮރިން އޮފީހުން ބުދަ ދުވަހު ހާމަކޮށްފި އެވެ.

ޕާކިސްތާނުގެ ޚާރިޖީ ވުޒާރާގެ ތަރުޖަމާނު ތާހިރު އަންދްރާބީ އިސްލާމްއާބާދުގައި ނޫސްވެރިންނަށް މައުލޫމާތު ދެއްވަމުން ވިދާޅުވީ، ސަރަހައްދީ ހަމަނުޖެހުންތައް ކުޑަކުރުމަށާއި ހައްލުނުވެ ހުރި މައްސަލަތަކަށް ނިމުމެއް ގެނައުމަށްޓަކައި މެދުވެރިއެއްގެ ދައުރު އަދާކުރުމަށް ޕާކިސްތާނުން ކުރަމުންދާ މަސައްކަތްތައް މެދުނުކެނޑި ކުރިއަށްދާ ކަމަށެވެ.

ތަރުޖަމާނު އަންދްރާބީ އިތުރަށް ވިދާޅުވީ، ދާޚިލީ ވަޒީރުގެ މި ދަތުރުފުޅުގައި ދެ ގައުމުގެ ދޭދޭ ގުޅުންތަކާއި، ސަލާމަތީ ކަންކަމާއި، ސަރަހައްދީ ހަމަޖެހުމުގެ އިތުރުން، ސަރަހައްދީ މަސްލަހަތު ހިމެނޭ ކަންކަމުގައި ހުރިހާ ފަރާތްތަކަކުން ބިނާކުރުވަނިވި ގޮތެއްގައި ބައިވެރިވުމާ ގުޅޭގޮތުން މަޝްވަރާ ކުރައްވާނެ ކަމަށެވެ.

ޕާކިސްތާނު ސަރުކާރުން ހާމަކޮށްފައިވާ ގޮތުގައި، ވަޒީރު މުހުސިން ނަގްވީ ވަނީ އެ ގައުމުގެ ބޮޑުވަޒީރު ޝެހްބާޒް ޝަރީފާއި، އަސްކަރިއްޔާގެ ވެރިޔާ ޖެނެރަލް އާސިމް މުނީރުގެ މުހިންމު މެސެޖެއް އީރާނުގެ ލީޑަޝިޕަށް ރައްދުކޮށްދެއްވާފަ އެވެ.

ނަގްވީ އީރާނަށް މި ކުރައްވާ ދަތުރުފުޅަކީ، މެދުއިރުމަތީގައި ހިނގަމުންދާ ހަނގުރާމަތައް ހުއްޓުވުމަށާއި، ހައްލުނުވެ ހުރި މައްސަލަތައް ނިންމުމަށްޓަކައި ވޮޝިންގޓަނާއި ތެހެރާނާ ދެމެދު ޑިޕްލޮމެޓިކް ގުޅުންތައް ގާއިމުކޮށްދިނުމަށް ޕާކިސްތާނުން ހުއްޓުމެއްނެތި ކުރަމުންދާ މަސައްކަތްތަކުގެ ތެރެއިން ކުރައްވާ ދަތުރުފުޅެކެވެ.