މެދުއިރުމަތީގެ މަސްރަހު ގޯސްވުމާ ގުޅިގެން ތެލުގެ އަގު އުފުލިއްޖެ

އެމެރިކާއާއި އިސްރާއީލުން ގުޅިގެން އީރާނާ ދެކޮޅަށް ކުރަމުންދާ ހަނގުރާމައިގެ ހަމަލާތައް އަލުން ފެށުމާ ގުޅިގެން، ދުނިޔޭގެ ބާޒާރުގައި ތެޔޮ ސަޕްލައިކުރުމަށް ހުރަސްތަކެއް ކުރިމަތިވެދާނެކަމުގެ ބިރު ހީވެ، ބްރެންޓް ކްރޫޑް ތެލުގެ އަގު 6.7 އިންސައްތަ މައްޗަށް ގޮސްފިއެވެ. މިއާއެކު، ތެޔޮ ފީފާއެއްގެ އަގު މިހާރު ވަނީ 87.55 އެމެރިކާ ޑޮލަރަށް އުފުލިފަ އެވެ.

މެދުއިރުމަތިން ދުނިޔޭގެ އެކި ކަންކޮޅުތަކަށް ތެޔޮ އުފުލާ ޓޭންކަރުތަކަށް މިނިވަންކަމާއެކު ދަތުރުކުރެވޭނެ ފަދަ އެއްބަސްވުމަކަށް އެމެރިކާއާއި އީރާނަށް އާދެވިދާނެތޯ އުފެދިފައިވާ ޝައްކުތަކާ ގުޅިގެން، މި މަހުގެ ކުރީކޮޅު ބްރެންޓް ކްރޫޑް ތެލުގެ އަގު 72 ޑޮލަރަށް ދަށްވި ނަމަވެސް، ނިމިދިޔަ ހަފުތާގައި ތެޔޮ ފީފާއެއްގެ އަގު 102 ޑޮލަރަށް އުފުލުނެވެ.