ޚާމަނާއީ އަވަހާރަކޮށްލި ހާދިސާއަށްފަހު ފުރަތަމަ ހިނގި ކަންތައްތަކުގެ ތަފުސީލު ޣާލީބާފް ހާމަކުރައްވައިފި

އީރާނުގެ އެންމެ މަތީ ވެރިޔާ އަލީ ޚާމަނާއީ ފެބްރުއަރީ މަހުގެ 28 ވަނަ ދުވަހު އަވަހާރަކޮށްލުމާ ގުޅިގެން، އެ ހާދިސާގެ ފަހަތުގައި ހިނގައިދިޔަ ކަންތައްތަކުގެ ތަފުސީލު، އެ ގައުމުގެ މަޖިލީހުގެ ރައީސް އަދި އިސް މަޝްވަރާވެރިޔާ މުހައްމަދު ބާގިރު ޣާލީބާފް ކިޔައިދެއްވާފައިވާ ކަމަށް އަލް އަރަބިއްޔާ އިން ރިޕޯޓުކޮށްފި އެވެ.

ޣާލީބާފް ވިދާޅުވި ގޮތުގައި، ޚާމަނާއީ ދިރިއުޅުއްވާ ގެކޮޅަށް ދިން ހަމަލާގެ މައުލޫމާތު، އެ ހަމަލާ ދިންތާ ގަޑިއިރެއްގެ ތެރޭގައި ދައުލަތުގެ އިސްވެރިންނަށް ވަނީ ލިބިފަ އެވެ.

އީރާނުގެ ޝޫރާ ކައުންސިލްގެ ކޯޑިނޭޝަން ކައުންސިލާއެކު ބޭއްވި ބައްދަލުވުމެއްގައި ޣާލީބާފް ވިދާޅުވީ، ބޮން އެޅިތާ ގަޑިއިރެއްގެ ތެރޭގައި އެންމެ މަތީ ވެރިޔާ އަލީ ޚާމަނާއީ އަވަހާރަވިކަން ކަށަވަރުވި ކަމަށެވެ.

އީރާނުގެ ރަސްމީ ނިއުސް އެޖެންސީ "އިރްނާ" އިން ރިޕޯޓުކޮށްފައިވާ ގޮތުގައި، ޚާމަނާއީ އަވަހާރަވި ޚަބަރު ފަތިސްވަގުތު އިއުލާން ކުރުމަށާއި، އަލީ ލަރީޖާނީއާ ގުޅިގެން ރައްޔިތުން މަގުތަކަށް ނުކުތުމަށް ގޮވާލުމަށް އެ ވަގުތު ނިންމެވި ކަމަށް ޣާލީބާފް ވިދާޅުވި އެވެ.

ޣާލީބާފް އިތުރަށް ވިދާޅުވީ، ދައުލަތުގެ ތިން ބާރުގެ ވެރިންނާއި ލަރީޖާނީއަށް ބައްދަލުވުމަށް އާދެވުނުއިރު ރޭގަނޑު 8 ޖަހާފައިވާ ކަމަށެވެ. އެހެންކަމުން، ޚާމަނާއީ އަވަހާރަވިކަން އަނެއް ދުވަހުގެ ހެނދުނު އިއުލާން ކުރުމަށް ނިންމުމަށްފަހު، އެ ބޭފުޅުން އަވަހަށް އެ ތަނުން ވަޑައިގަތީ ކަމަށް އޭނާ ވިދާޅުވި އެވެ.

ނަމަވެސް، ބޭރުގެ މީޑިއާތަކުން އޭރު ޚާމަނާއީ އަވަހާރަވި ޚަބަރު ފަތުރަން ފަށާފައިވާތީ، ކަންކަން ވިލަރެސްކުރުމަށްޓަކައި އެރޭ ދަންވަރު އަލުން ލަރީޖާނީއާ ގުޅުއްވި ކަމަށް ޣާލީބާފް ވިދާޅުވި އެވެ.

"ކުރިން ރޭވި ގޮތަށް ކުރިއަށް ދެވެން ނެތްކަން އަޅުގަނޑުމެންނަށް ވިސްނުނު. އެހެންކަމުން އަޅުގަނޑާއި އަލީ ލަރީޖާނީ ނިންމީ ފަތިސްވަގުތު އެ ޚަބަރު އިއުލާންކޮށް، ރައްޔިތުން މަގުތަކަށް ނުކުތުމަށް ގޮވާލުމަށް،" ޣާލީބާފް ވިދާޅުވި އެވެ. އޭނާ އިތުރަށް ވިދާޅުވީ އެގޮތަށް އެ ނިންމުން ނުނިންމި ނަމަ، މަގުމަތީގެ މަސްރަހު ބަދަލުވެގެންދިޔައީސް ކަމަށެވެ.

އިސްރާއީލާއި އެމެރިކާއިން އީރާނަށް ހަމަލާދޭން ފަށާފައިވަނީ ފެބްރުއަރީ މަހުގެ 28 ވަނަ ދުވަހު އެވެ. އަލީ ޚާމަނާއީ އަވަހާރަވީ އެ ދުވަހު ދިން ހަމަލާއެއްގަ އެވެ. އޭގެ ފަހުން ދިން އެކި ހަމަލާތަކުގައި އީރާނުގެ މަތީ ފަންތީގެ ގިނަ ވެރިންނާއި ކޮމާންޑަރުން ވެސް ވަނީ މަރުވެފަ އެވެ.

ޚާމަނާއީ އަވަހާރަވުމުން އެ މަގާމަށް ދެން ވަޑައިގަތީ އޭނާގެ ދަރިކަލުން މުޖުތަބާ ޚާމަނާއީ އެވެ. ނަމަވެސް މުޖުތަބާ މިހާތަނަށް އާންމުންގެ ކުރިމައްޗަށް ނުކުމެވަޑައިގަންފައެއް ނުވެ އެވެ. އޭނާގެ ފަރާތުން އާންމުންނަށް ދެއްވާ ބަޔާންތައް ޓީވީ މެދުވެރިކޮށް ކިޔައިދެނީ ޕްރެޒެންޓަރުންނެވެ.