އެމެރިކާ-އީރާން ހަމަލާތައް މެދުކެނޑުމާއެކު ތެލުގެ އަގު ވަރަށް ބޮޑަށް ވެއްޓިއްޖެ

އެމެރިކާއާއި އީރާނާ ދެމެދު ބަދަލުކުރަމުންދާ ހަމަލާތައް މެދުކަނޑާލުމުން، ދެ ގައުމުގެ ދެމެދުގައި އުފެދިފައިވާ ހަމަނުޖެހުންތަކަށް ހައްލެއް ލިބިދާނެ ކަމުގެ އުންމީދު ބޮޑުވެ، ތެލުގެ އަގު ވަރަށް ބޮޑަށް ދަށަށް ގޮސްފި އެވެ.

ދުނިޔޭގެ ބާޒާރުގައި ތެލުގެ އަގު ކަނޑައަޅާ މިންގަނޑު ކަމަށްވާ ބްރެންޓް ކްރޫޑްގެ އަގު 9 އިންސައްތައަށް ވުރެ ބޮޑަށް ދަށަށް ގޮސް، ފީފާއެއްގެ އަގު 88 ޑޮލަރަށް ވުރެ ތިރިވެފައިވެ އެވެ. މިއީ ތެލުގެ އަގު 100 ޑޮލަރަށް ވުރެ މައްޗަށް އެރި މިދިޔަ ހަފުތާއާ އަޅާބަލާއިރު އައި ބޮޑު ބަދަލެކެވެ.

ތެލުގެ އަގު ދަށަށް ދާން ފަށާފައިވަނީ، މަޝްވަރާތަކަށް ފުރުސަތު ދިނުމުގެ ގޮތުން އީރާނަށް ދެމުންދާ ހަމަލާތައް ޖެހިޖެހިގެން ދެވަނަ ރެޔަކަށް މެދުކަނޑާލާފައިވާ ކަމަށް އދ. އަށް ކަނޑައަޅުއްވާފައި ހުންނަވާ އެމެރިކާގެ ސަފީރު ވިދާޅުވުމާ ގުޅިގެންނެވެ.

މީގެ އިތުރުން، އެމެރިކާގެ ހަމަލާތަކަށް ރައްދު ދިނުމުގެ ގޮތުން އެ ސަރަހައްދުގައި ދެމުންދިޔަ ހަމަލާތައް އީރާނުން ވެސް މިހާރު މެދުކަނޑާލާފައިވާ ކަމަށް އެ ގައުމުގެ އަސްކަރިއްޔާގެ ތަރުޖަމާނަކު އާދީއްތަ ދުވަހު ވަނީ ވިދާޅުވެފަ އެވެ.

އީރާނުގެ ހަނގުރާމަ ފެށުމާއެކު ތެލުގެ އަގު އިންތިހާއަށް އުފުލިގެން ދިޔައީ، ދުނިޔޭގެ ތެލާއި ދިޔާ ކުރި ގޭސް (އެލް.އެން.ޖީ) ގެ 20 އިންސައްތަ އުފުލާ މައިގަނޑު މަގު ކަމަށްވާ ހުރްމުޒް ކަނޑުއޮޅި ބަންދުވުމާ ގުޅިގެންނެވެ.

މިދިޔަ ޖޫން މަހު އަސްކަރީ ހަރަކާތްތައް ހުއްޓާލައި، އެ ކަނޑުއޮޅި އަލުން ހުޅުވުމަށް އެމެރިކާއާއި އީރާނުން ފަހުމުނާމާއެއްގައި ސޮއިކުރުމުން، ތެލުގެ އަގު ހަނގުރާމައިގެ ކުރިން ހުރި މިންވަރު ކަމަށްވާ ފީފާއެއް 70 ޑޮލަރަށް ތިރިވި އެވެ.

ނަމަވެސް، މި މަހުގެ ކުރީކޮޅު ހަމަލާ ބަދަލުކުރުން ހުއްޓާލުމަށް ވެފައިވާ އެއްބަސްވުން އުވާލުމާ ގުޅިގެން، ދުނިޔެއަށް ބޭނުންވާ ހަކަތަ ފޯރުކޮށްދިނުމަށް ހުރަސް އެޅިދާނެ ކަމުގެ ބިރު ބޮޑުވެ، ތެލުގެ އަގު އަލުން އުފުލެން ފެށި އެވެ.

މިދިޔަ ހަފުތާގައި ތެލުގެ އަގު މެއި މަހަށްފަހު ފުރަތަމަ ފަހަރަށް ފީފާއެއް 100 ޑޮލަރަށް އެރި އެވެ. މިއީ ޔަމަނުގެ ހޫޘީ ހަނގުރާމަވެރިން ރަތްކަނޑުން ދަތުރުކުރާ ތެޔޮ ޓޭންކަރުތަކަށް ހަމަލާދޭން ފެށުމުން، ހުރްމުޒް ކަނޑުއޮޅި ނޫން މަގަކުން ސައުދީ އަރަބިއްޔާއިން ތެޔޮ ބޭރުކުރަން ބޭނުންކުރާ މައިގަނޑު މަގަށް ނުރައްކާވުމާ ގުޅިގެން މެދުވެރިވި ހާލަތެކެވެ.

ވެލްތު ކްލަބްގެ ޗީފް އިންވެސްޓްމަންޓް ސްޓްރެޓެޖިސްޓް ސުޒާނާ ސްޓްރީޓާ ބީބީސީ އަށް ވިދާޅުވީ، މި ހަނގުރާމައިގައި ކަންތައްތައް ބަދަލުވަމުންދާ ގޮތުން މާކެޓްތަކުން އަދިވެސް އޮތީ ވަރަށް ބޮޑަށް ސަމާލުވެގެން ކަމަށެވެ.

ތެލުގެ އަގު ވަރަށް ބޮޑަށް ދަށަށް ދިޔަ ނަމަވެސް، އަދިވެސް އަގުތަކަށް ބޮޑެތި ބަދަލުތަކެއް އައުމުގެ ފުރުސަތު އެބައޮތް ކަމަށާއި، މަޝްވަރާތަކުން ދާއިމީ ހައްލެއް ލިބޭނެ ކަމާމެދު އިންވެސްޓަރުން އަދިވެސް ފަސްޖެހޭ ކަމަށް އޭނާ އިތުރަށް ވިދާޅުވި އެވެ.

އެމެރިކާއާއި އީރާނާ ދެމެދު ހިނގަމުންދާ ހަމަނުޖެހުންތަކުގެ ސަބަބުން ތެލުގެ އަގަށް އަންނަ ބަދަލުތަކާ ގުޅިގެން، ގިނަ ގައުމުތަކެއްގައި ޕެޓްރޯލާއި ޑީސަލްގެ އަގު ވަނީ އުފުލިފަ އެވެ.

މީގެ ސަބަބުން ވިޔަފާރިތަކަށް ކުރަންޖެހޭ ހޭދަ ބޮޑުވެ، އެ ޚަރަދުތައް ކަސްޓަމަރުންގެ އަތުން ނަގަން ފެށުމުން، ކާބޯތަކެތީގެ އަގުތައް އުފުލި އިންފްލޭޝަން ރޭޓް މަތިވުމަށް މަގުފަހިވެ އެވެ.

އިންފްލޭޝަން މަތިވުމަކީ، އަގުތައް ކޮންޓްރޯލް ކުރުމަށްޓަކައި މަރުކަޒީ ބޭންކުތަކުން އިންޓްރެސްޓް ރޭޓް މަތިކުރުމުގެ ފުރުސަތު ބޮޑުވާ ކަމެކެވެ.