އީރާނާއެކު ކުރަމުންދާ ހަނގުރާމައިން "އަބުރުވެރިކަމާއެކު" އަވަހަށް ސަލާމަތްވެވޭނެ މަގެއް ހޯދުމަށް އެމެރިކާގެ އެންމެ އިސް ޖެނެރަލް ދަނީ ސިއްރިއްޔާތުގައި މަސައްކަތްކުރައްވަމުން - ސީއެންއެން

އީރާނާއެކު ކުރަމުންދާ ހަނގުރާމައިގައި އެމެރިކާއަށް އޮތް އަސްކަރީ ފުރުސަތުތައް ހަނިވަމުންދާތީ، އެ ހަނގުރާމައިން އަބުރުވެރިކަމާއެކު ވަކިވެވޭނެ މަގަކަށް (އޮފް-ރޭމްޕް) އެމެރިކާގެ އެންމެ އިސް ޖެނެރަލް މަސައްކަތް ކުރައްވަމުން ގެންދަވާ ކަމަށް މަސްދަރުތަކުން ބުނެފި އެވެ.

މި މައްސަލައާ ގުޅުންހުރި ތިން މަސްދަރަކުން ސީއެންއެން އަށް މައުލޫމާތު ދީފައިވާ ގޮތުގައި، ޖޮއިންޓް ޗީފްސް އޮފް ސްޓާފްގެ ޗެއާމަން ޖެނެރަލް ޑޭން ކޭން ވަނީ ފާއިތުވި ހަފުތާތަކުގައި ރައީސް ޑޮނަލްޑް ޓްރަމްޕްގެ އިސް މުޝީރުންނާ ސިއްރުން ބައްދަލުކުރައްވައި، އީރާނު ހަނގުރާމައިން ނުކުންނާނެ މަގެއް ހޯދަންޖެހޭކަން ސާފުކޮށްދެއްވާފަ އެވެ. އޭނާ ވިދާޅުވި ގޮތުގައި، ހަނގުރާމަ ވަރުގަދަކުރުމަށް މިހާރު ހުރި އަސްކަރީ ފުރުސަތުތަކުގެ ސަބަބުން ނޭދެވޭ ނަތީޖާއެއް ނުކުމެދާނެ އެވެ. އަދި ހަމައެކަނި ވައިގެ މަގުން ދޭ ހަމަލާތަކަކުން ރައީސް ޓްރަމްޕް ބޭނުންފުޅުވާ މަގުސަދުތައް ހާސިލުވުމަކީ ދުރު ކަމެއް ކަމަށްވެސް އޭނާ ފާހަގަކުރެއްވި އެވެ.

"ކޭން މިހާރު މަސައްކަތް ކުރައްވަނީ މިކަމުން ސަލާމަތްވެވޭނެ މަގެއް ހޯދުމަށް،" އެއް މަސްދަރަކުން ސީދާ ބަހުން ބުންޏެވެ.

ހަނގުރާމަ މިހާރު އޮތީ ނާޒުކު ފައްތަރެއްގައި ކަމަށް ދެކެވަޑައިގަންނަވަނީ ހަމައެކަނި ޖެނެރަލް ކޭންއެއް ނޫނެވެ. މަސްދަރުތަކުން ބުނާ ގޮތުގައި އޭނާ ވަނީ ކެބިނެޓުގެ އިސް ބޭފުޅުން ކަމަށްވާ ސީ.އައި.އޭގެ ޑިރެކްޓަރު ޖޯން ރެޓްކްލިފް، ސެކްރެޓަރީ އޮފް ސްޓޭޓް މާކޯ ރޫބިއޯ އަދި ނައިބު ރައީސް ޖޭ.ޑީ ވޭންސްއާ އެކު މި ކަންބޮޑުވުންތައް ހިއްސާކުރައްވާފަ އެވެ.

އެމެރިކާގެ އެންމެ އިސް ޖެނެރަލް ވަނީ ޓްރަމްޕްގެ މުޝީރުންގެ ތެރެއިން އޭނާއާ އެއްބަސްވާ ބޭފުޅުންނާ ވަކިން ބައްދަލުކުރައްވައި، ރައީސްއާ ބައްދަލުކުރުމުގެ ކުރިން ހުރިހާ އިދާރާތަކެއް އެއްގަލަކަށް އެރުވުމަށް މަސައްކަތް ކުރައްވާފަ އެވެ. މި މަސައްކަތުގެ ބޭނުމަކީ، އެމެރިކާ ސިފައިން ބިމުގެ މަގުން ހަނގުރާމައަށް ނުނެރެ، މިހާރު ހުރި އަސްކަރީ ފުރުސަތުތަކުން ކުރިމަތިވެދާނެ ނުރައްކާތަކާއި އޭގެ ހަނިކަން ސާފުކޮށްދިނުން ކަމަށް މަސްދަރުތަކުން ބުނެ އެވެ.

"އަޅުގަނޑަށް ހީވަނީ މިއީ އަސްކަރިއްޔާ ހިމާޔަތްކުރުމަށް އޭނާ ގެންގުޅުއްވާ އުސޫލެއްހެން،" ކޭންގެ މަޝްވަރާތަކާ ގުޅޭގޮތުން ސީ.އެން.އެންއަށް މައުލޫމާތު ދިން މަސްދަރަކުން ބުންޏެވެ.

އީރާނަށް އެމެރިކާގެ އެއްގަމު ސިފައިން ފޮނުވުމަށް ޓްރަމްޕް އަބަދުވެސް ދެކޮޅު ހައްދަވަ އެވެ. އޭގެ ބަދަލުގައި އޭނާ ގަބޫލުކުރައްވަނީ ވައިގެ މަގުން ބޮން އެޅުމުން، އޭނާ ބޭނުންވާ ޝަރުތުތަކަށް އީރާނުން އެއްބަސްވާނެ ކަމަށެވެ. ނަމަވެސް، ކޭން އާއި ކެބިނެޓުގެ އެހެން ބޭފުޅުން ސިއްރު މަޝްވަރާތަކުގައި ގަބޫލުކުރައްވާ ގޮތުގައި އެއީ ވާނެ ކަމެއް ނޫނެވެ. އެހެންކަމުން އެ ބޭފުޅުން މަސައްކަތް ކުރައްވަނީ ރައީސް ކަނޑައަޅުއްވާފައިވާ އިމުގެ ތެރެއިން އެހެން ގޮތްތަކެއް ހޯދުމަށެވެ.

އީރާނުގެ އަސްކަރީ ގާބިލުކަން ނައްތާލެވިއްޖެ ކަމަށް ބުނެ ފެށި މި ހަނގުރާމައަށް ހަ މަސް ފުރެން ކައިރިވެފައިވާއިރު، އަދި ތެހެރާނުން ނިއުކްލިއާ ހަތިޔާރު ހޯދުން ހުއްޓުވާނެ ކަމަށް ރައީސް ވައުދުވެވަޑައިގެންފައިވާއިރު، އެމެރިކާގެ އެންމެ އިސް ޖެނެރަލް މި ހަނގުރާމަ ނިންމާލާނެ ފަސޭހަ އަސްކަރީ ހައްލެއް ނެތް ކަމަށް ވިދާޅުވުމަކީ ވަރަށް މުހިންމު ފާހަގަކޮށްލެވޭ ކަމެކެވެ.

މި ޚަބަރާ ގުޅިގެން ސީ.އެން.އެންއިން ސުވާލުކުރުމުން، ޖެނެރަލް ކޭންގެ ތަރުޖަމާނު ޖޯސެފް ހޮލްސްޓެޑް ވިދާޅުވީ، ރައީސާއި ސެކްރެޓަރީ ނުވަތަ އެހެން އިސް ވެރިންނާއެކު ޗެއާމަން ކުރައްވާ ސިއްރު މަޝްވަރާތަކުގެ މައުލޫމާތު ހާމަނުކުރާނެ ކަމަށެވެ. އަދި އެ މަޝްވަރާތަކުގައި ބައިވެރިނުވާ ފަރާތްތަކުން ދައްކާ ވާހަކަތަކަށް ކޮމެންޓް ނުކުރާނެ ކަމަށްވެސް އޭނާ ވިދާޅުވި އެވެ.

ވައިޓް ހައުސްގެ އޮފިޝަލަކު ވަނީ ޓްރަމްޕްގެ ގައުމީ ސަލާމަތާ ބެހޭ ޓީމުގައި ކޭން އަދާކުރައްވާ ދައުރަށް ތައުރީފު ކުރައްވާފަ އެވެ. އޭނާ ވިދާޅުވީ "އޮޕަރޭޝަން އެޕިކް ފިއުރީ"، "މިޑްނައިޓް ހެމަރ" އަދި "އެބްސޮލިއުޓް ރިޒޯލްވް" އަށް ލިބުނު ބޮޑު ކާމިޔާބީން ކޭންގެ ގާބިލުކަން ހާމަވާ ކަމަށެވެ. އަދި ޖެނެރަލް އަބަދުވެސް ރައީސަށް ދެއްވަނީ ސައްހަ އަދި ވަކި ފަރާތަކަށް ނުޖެހޭ މައުލޫމާތު ކަމަށާއި، އެންމެ ފަހުގެ ނިންމުން ނިންމަވަނީ ރައީސް ކަމަށްވެސް އޭނާ ވިދާޅުވި އެވެ.

މި މައްސަލައިގައި ސްޓޭޓް ޑިޕާޓްމަންޓާއި ސީ.އައި.އޭ އިން ވަނީ ވަކި އެއްޗެއް ބުނަން އިންކާރުކޮށްފަ އެވެ.

ވައިގެ ބާރުގެވެސް ހައްދެއްވޭ

ހަނގުރާމަ މިހާރު އޮތް ހިސާބުން، ޓްރަމްޕްގެ ގައުމީ ސަލާމަތާ ބެހޭ އިސް ގިނަ ބޭފުޅުން ގަބޫލުކުރައްވަނީ ޖެނެރަލް ކޭން މިދިޔަ މަހު އާންމުކޮށް ވިދާޅުވި ފަދައިން "ވައިގެ ބާރުގެވެސް ހައްދެއް އޮންނަ" ކަމަށެވެ.

މި ސަބަބުތަކަށްޓަކައި، ޖުލައި މަހުގެ ފަހުކޮޅު ހަނގުރާމަ ވަރުގަދަކުރުމަށް ހުށަހެޅުނު އާ ޕްލޭނާ މެދު ކޭން އާއި އެހެން އޮފިޝަލުން ތިއްބެވީ ކަންބޮޑުވެފަ އެވެ. ރައީސް ޓްރަމްޕް "ބޮޑު" އޮޕަރޭޝަނަކަށް ފެށުމަށް ތައްޔާރުވެވަޑައިގެން ހުންނެވި ނަމަވެސް، އޭގެ ސަބަބުން ނުކުމެދާނެ ނަތީޖާއާ މެދު އޮފިޝަލުން ކަންބޮޑުވުން ފާޅުކުރެއްވި ކަމަށް މަސްދަރަކުން ބުންޏެވެ.

"އެ އޮޕަރޭޝަނަށް ތާއީދުކުރީ ހަމައެކަނި ސެންޓްކޮމް (CENTCOM) ގެ ބައެއް ފަރާތްތަކުން،" އެ މަސްދަރުން ބުންޏެވެ. އަދި އިސްރާއީލުންވެސް ހަނގުރާމަ ވަރުގަދަކުރުމަށް ތާއީދުކުރި ކަމަށް އޭނާ ފާހަގަކުރި އެވެ.

އިނގިރޭސިވިލާތުގެ ފެއަރފޯޑުގައި ހުންނަ ރޯޔަލް އެއަރ ފޯސް (އާރް.އޭ.އެފް) ފެއަރފޯޑް ބޭސްގައި ޖުލައި މަހުގެ 24 ވަނަ ދުވަހު ބީ-1 މަރުކާގެ ބޮން އަޅާ ބޯޓެއްގެ ކައިރީގައި ގޮވާތަކެތި ބަހައްޓާފައި ހުއްޓާ ފެންނަ މަންޒަރެއް. އެމެރިކާގެ ވައިގެ ސިފައިންގެ ބޮން އަޅާ ބޯޓުތަކުން އިނގިރޭސިވިލާތުގެ މި އަސްކަރީ މަރުކަޒު ބޭނުންކޮށްގެން އީރާނުގެ އަސްކަރީ އަމާޒުތަކަށް ހަމަލާދީފައިވާތީ، އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) އިން ވަނީ އާރް.އޭ.އެފް ފެއަރފޯޑަކީ ހަމަލާދިނުން ހުއްދަ "ޝަރުއީ އަމާޒެއް" ކަމަށް ކަނޑައަޅާފައި | ގެޓީ އިމޭޖަސް

ވައިޓް ހައުސްގެ އިސް އޮފިޝަލަކު ސީ.އެން.އެންއަށް ވިދާޅުވި ގޮތުގައި، މެދުއިރުމަތީގެ އެކުވެރި ގައުމުތަކާ މަޝްވަރާކުރެއްވުމަށްފަހު ޓްރަމްޕް ވަނީ އެ ނިންމުން މަޑުޖައްސާލައްވާފަ އެވެ. އެ ގައުމުތަކުން ވަނީ އީރާނުން ދީފާނެ ބަދަލު ހިފުމުގެ ހަމަލާތަކަކަށް، ޚާއްސަކޮށް ހަކަތައިގެ ވަސީލަތްތަކަށް ދީފާނެ ހަމަލާތަކަކަށް ބިރުގަންނަ ކަމަށް ބުނެފަ އެވެ. ނަމަވެސް، ރައީސް އެ ހަމަލާތައް ދިނުމުގެ ވިސްނުން މުޅިން ދޫކޮށްނުލައްވާ ކަމަށްވެސް އޭނާ ވިދާޅުވި އެވެ.

މީގެ އިތުރުން، އެމެރިކާގެ ހަތިޔާރުގެ ރަސްމީ ރިޒާވް މަދުވަމުންދިއުމަކީވެސް ކަންބޮޑުވުމެއް ކަމަށް ސީ.އެން.އެންއިން ވަނީ ރިޕޯޓްކޮށްފައެވެ. ގަލްފްގެ ގައުމުތަކުންވެސް ވަނީ އެމެރިކާގެ ވައިގެ ދިފާއީ ނިޒާމުތައް މަދުވުމުގެ ސަބަބުން، އީރާނުގެ ހަމަލާތަކުން ދިފާއުވުމަށް ހުރަސް އެޅިދާނެ ކަމުގެ ބިރު އޮތްކަން ހާމަކޮށްފައެވެ.

އީރާނުގެ ހަކަތައިގެ ވަސީލަތްތަކަށް ހަމަލާދޭނެ ކަމުގެ އިންޒާރު ޓްރަމްޕް ތަކުރާރުކޮށް ދެއްވި ނަމަވެސް، އޭގެ ސަބަބުން އީރާނުން ކެތްތެރިކަން ކޮޅުންލައި، ގަލްފް ގައުމުތަކުގެ ހަކަތައިގެ ވަސީލަތްތަކަށް ބަދަލު ހިފުމުގެ ހަމަލާދޭނެ ކަމަށް މަސްދަރުތަކުން ބުނެއެވެ. އަދި އެފަދަ ހަމަލާއެއްގެ ސަބަބުން އީރާނުގެ ރައްޔިތުން ސަރުކާރާ ދެކޮޅުވުމުގެ ބަދަލުގައި، އެމެރިކާއާ މެދު އޮންނަ ނަފުރަތު އިތުރުވާނެ ކަމަށްވެސް ބެލެވެއެވެ.

ޓްރަމްޕް ވަނީ އީރާނުގެ ފާލަންތަކަށް ބޮން އެޅުމަށްވެސް ވިސްނަވާފައެވެ. ނަމަވެސް އޭގެއިންވެސް އެދެވޭ ނަތީޖާއެއް ނުފެންނާނެ ކަމަށް ދެވަނަ މަސްދަރަކުން ބުންޏެވެ. "ޑްރޯން އަދި މިސައިލް ފޮނުވާ ތަންތަނަށް ހަމަލާދިނުމަކީ ނިމުމެއް ނެތް ކަމެއް. އޭގެ ބަދަލުގައި އިންޖީނުގެތަކަށް ބޮން އެޅުމަކީ އާންމުންގެ ސަމާލުކަން މާ ބޮޑަށް ލިބޭނެ ކަމެއް،" އޭނާ ބުންޏެވެ.

ޓްރަމްޕާ މުއާމަލާތްކުރުމުގައި ގެންގުޅޭ ފަރުވާތެރިކަން

ޖެނެރަލް ކޭން ކަންބޮޑުވުންތައް ފާޅުކުރެއްވި ނަމަވެސް، ރައީސް ޓްރަމްޕާ އޮންނަ ގުޅުން ހީނަރުވިޔަ ނުދިނުމަށް އޭނާ ވަރަށް ބޮޑަށް ސަމާލުވެލައްވަ އެވެ. އަދި އަސްކަރީ ފުރުސަތުތަކުގެ ނުރައްކާތައް ރައީސަށް ހުށަހަޅުއްވާއިރު ވަރަށް ބޮޑަށް ވިސްނަވަ އެވެ.

މަސްދަރުތަކުން ބުނާ ގޮތުގައި، ރައީސްއާ ގާތުން މަސައްކަތްކުރުމަށްޓަކައި ވައިޓް ހައުސްގައި އޮފީހެއް ހޯދުމަށްވެސް ކޭން މަސައްކަތް ކުރެއްވި އެވެ. މިދިޔަ މަހު ވައިޓް ހައުސްގައި ބޭއްވި ބައްދަލުވުމެއްގައި، ހަނގުރާމަ ވަރުގަދަކުރުމުން ކުރިމަތިވެދާނެ ނުރައްކާތަކާއި ހަތިޔާރު މަދުވުމުގެ މައްސަލަ ފާހަގަކުރައްވައި އޭނާ ވަނީ އޭނާގެ ޒިންމާ އަދާކުރައްވާފަ އެވެ.

ނަމަވެސް، ހަމަ އެ ބައްދަލުވުމުގައި ކޭން ވަނީ ރައީސް އެ އޮޕަރޭޝަންތަކާއިގެން ކުރިއަށްދާން ބޭނުންފުޅުވާނަމަ، އީރާނު "މުޅިން ސުންނާފަތިކޮށްލެވިދާނެ" ކަމުގެ ޔަގީންކަންވެސް ދެއްވާފަ އެވެ.

އެހެންނަމަވެސް، ސިއްރު މަޝްވަރާތަކުގައި ކޭން ވަނީ ވައިގެ ބާރުގެ ހަނިކަން ގަބޫލުކުރައްވައި، ހަމައެކަނި ބޮން އަޅައިގެން ޓްރަމްޕްގެ މަގުސަދުތައް ހާސިލުނުވާނެ ކަމަށް ވިދާޅުވެފަ އެވެ. ބައެއް ފަރާތްތަކުން ބުނާ ގޮތުގައި ކޭން ރައީސްގެ ކުރިމަތީގައި މާ ބޮޑަށް ދޫދެއްވަނީ އެވެ.

ފާއިތުވި ހަފުތާތަކުގައި ކޭން ވަނީ ހަނގުރާމަ ވަރުގަދަކުރުމުން ނުކުމެދާނެ ދެވަނަ އަދި ތިންވަނަ ދަރަޖައިގެ ނޭދެވޭ އަސަރުތަކާ ބެހޭގޮތުން ތަންކޮޅެއް އަޑުހަރުކޮށް ވާހަކަދައްކަވަން ފައްޓަވާފަ އެވެ. ޚާއްސަކޮށް އެމެރިކާގެ ހަތިޔާރުގެ ރިޒާވް ހުސްވަމުންދާ މައްސަލަ އޭނާ ވަނީ މަދުވެގެން ދެ ބައްދަލުވުމެއްގައި އެކަން ފާހަގަކުރައްވާފަ އެވެ.

ކޭން ވިސްނުންތެރިކަމާ އެކު އެއްކޮޅުން އަސްކަރިއްޔާއަށް އޮތް އިތުބާރު އިއާދަކުރަން މަސައްކަތް ކުރައްވާއިރު، އަނެއްކޮޅުން ޓްރަމްޕް ގެންދަވަނީ އަސްކަރިއްޔާ ސިޔާސީ ކުރައްވަމުންނެވެ.

ހަތިޔާރުގެ ރިޒާވްއާ މެދު ކުރިން ދެވުނު އިންޒާރުތައް

ހަނގުރާމަ ފެށުމުގެ ކުރިންވެސް ކޭން އާއި އެހެން އަސްކަރީ ވެރިން ވަނީ ދިގުދެމިގެންދާ ހަނގުރާމައެއްގެ ސަބަބުން އިސްރާއީލާއި ޔޫކްރެއިނަށް ދޭ ހަތިޔާރަށް އަސަރުކޮށްފާނެ ކަމުގެ އިންޒާރު ދެއްވާފަ އެވެ. މިހާރު އެމެރިކާގެ ހަތިޔާރުގެ ރިޒާވް އޮތީ "ނުރައްކާތެރި މިންވަރަކަށް ދަށްވެފައި" ކަމަށް މަސްދަރުތަކުން ބުނެ އެވެ. މިކަމުގެ ސަބަބުން އީރާނާއެކު ކުރާ މަޝްވަރާތަކުގައި ބާރު ދެއްކުމަށް ހުރަސްއެޅޭތީ ޓްރަމްޕް ހުންނެވީ ވަރަށް ބޮޑަށް ކޯފާވެފަ އެވެ.

އިނގިރޭސިވިލާތުގެ ލަންޑަނަށް ކުރައްވާ ރަސްމީ ދަތުރުފުޅެއްގައި ފުރާވަޑައިގަތުމުގެ ކުރިން، 2025 ސެޕްޓެމްބަރު 16 ގައި ވޮޝިންގޓަން ޑީސީގެ ވައިޓް ހައުސްގައި އެމެރިކާގެ ރައީސް ޑޮނަލްޑް ޓްރަމްޕް ނޫސްވެރިންނާ ބައްދަލުކުރައްވައި ވާހަކަފުޅު ދައްކަވަނީ | ގެޓީ އިމޭޖަސް

ހަތިޔާރު މަދުވުމުގެ މައްސަލަ އާންމުވުމުން ޓްރަމްޕް ވަނީ މިދިޔަ ހަފުތާގައި ކޭމްޕް ޑޭވިޑްގައި ބޭއްވި ކެބިނެޓް ބައްދަލުވުމުގައި އެކަމާ މެދު ހިތްހަމަނުޖެހުން ފާޅުކުރައްވާފައެވެ. މި މައްސަލައާ ގުޅިގެން ޕެންޓަގަން އާއި ސެންޓްކޮމް އިން މިހާރު ދަނީ އެމެރިކާގެ އަސްކަރީ ސިޔާސަތު މުރާޖައާ ކުރަމުންނެވެ.

ހަނގުރާމަ ފެށުނުތާ ހަ މަސް ފަހުން އާ ގޮތްތަކެއް ހޯދަން މަސައްކަތް ކުރުމަކީ، ކަންތައްތައް ރަނގަޅަށް ނުދާކަމުގެ ހެއްކެއް ކަމަށް މަސްދަރުތަކުން ބުނެ އެވެ. "ހަނގުރާމަ ފެށުމުގެ ކުރިން މިކަންކަމަށް ނުވިސްނައި، ހަނގުރާމައިގެ މެދުތެރެއިން މިފަދަ ގޮތްތައް ހޯދަން ޖެހުމަކީ އުނދަގޫ ކަމެއް،" އެއް މަސްދަރަކުން ބުންޏެވެ.

ވޮޝިންގޓަން ޑީސީގައި ޖުލައި މަހުގެ 21 ވަނަ ދުވަހު ބޭއްވި ސެނެޓް އެޕްރޮޕްރިއޭޝަންސް ކޮމިޓީގެ އަޑުއެހުމެއްގައި ޖޮއިންޓް ޗީފްސް އޮފް ސްޓާފްގެ ޗެއާމަން ޖެނެރަލް ޑޭން ކޭން ބައިވެރިވަޑައިގަންނަވަނީ | ގެޓީ އިމޭޖަސް

ޖެނެރަލް ކޭންގެ ތަޖުރިބާ މަދުވުމުގެ ސަބަބުން މިފަދަ ބޮޑު ހަނގުރާމައެއް މެނޭޖްކުރުމުގައި އޭނާއަށް ދަތިތަކެއް ކުރިމަތިވަމުންދާ ކަމަށް ބައެއް ފަރާތްތަކުން ބުނެ އެވެ. "އޭނާއަށް މިކަން މާ ބޮޑުވެއްޖެ،" ކޭންގެ މަސައްކަތްތައް ދަންނަ މަސްދަރަކުން ބުންޏެވެ.

ނަމަވެސް، ކޭންގެ ވިސްނުމަކީ އޭނާ އެކަނި ގެންގުޅުއްވާ ވިސްނުމެއް ނޫނެވެ. ގިނަ މުހައްލިލުން އެއްބަސްވާ ގޮތުގައި އީރާނު ބަލިކުރެވޭނީ އެތައް ހާސް އެމެރިކާ ސިފައިންގެ ފުރާނަ ގެއްލިދާނެ ފަދަ ބޮޑު އެއްގަމު އޮޕަރޭޝަނަކުންނެވެ. އެފަދަ ރޭވުންތައް ޕެންޓަގަންގައި ހުރި ނަމަވެސް، ސަރުކާރުގެ އެއްވެސް އޮފިޝަލަކު އެފަދަ ފިޔަވަޅެއް އެޅުމަށް ބޭނުމެއް ނުވެ އެވެ.

އެހެންކަމުން، ކޭން އާއި އެހެން ބޭފުޅުން މިހާރު މަސައްކަތް ކުރައްވަނީ ރައީސް ޓްރަމްޕަށް "ރަމްޒީ" ކާމިޔާބީއެއް ލިބޭނެ ފަދަ ގޮތަކަށް ހަނގުރާމައިން ނުކުމެވޭނެ މަގެއް ހޯދުމަށެވެ. މީގެ ތެރޭގައި އެންމެ ފުރަތަމަ ކަމެއްގެ ގޮތުގައި ހުރްމުޒް ކަނޑުއޮޅި އަލުން ހުޅުވުމުގެ އެއްބަސްވުމަކަށް އައުން ހިމެނެ އެވެ.