އީރާނުގެ އެންމެ މަތީ ލީޑަރާއެކު ބޭއްވެވި ހަތް ގަޑިއިރުގެ ދިގު ބައްދަލުވުމުގެ ތަފްސީލުތައް ރައީސް ޕެޒެޝްކިއަން ދެއްވައިފި

މިހާތަނަށް އަދި އާންމު އެއްވެސް ތާކުން ފެނިފައިނުވާ އީރާނުގެ އިސްލާމީ އިންގިލާބުގެ ލީޑަރާއެކު ދާދި ފަހުން ބޭއްވެވި ބައްދަލުވުމުގެ ތަފްސީލުތައް ހިއްސާކުރައްވަމުން، ދުޝްމަނުންގެ ރޭވުންތަކާ ދެކޮޅަށް "ގައުމީ އެއްބައިވަންތަކަމާއި ބަދަހިކަން" ދެމެހެއްޓުމުގެ މުހިންމުކަމުގެ މައްޗަށް އާޔަތުﷲ ސައްޔިދު މުޖުތަބާ ޚާމަނާއީ ބާރުއެޅުއްވި ކަމަށް ރައީސް މަސްއޫދު ޕެޒެޝްކިއަން ވިދާޅުވެއްޖެ އެވެ.

ޕެޒެޝްކިއަން މިހެން ވިދާޅުވީ، ހޯމަ ދުވަހު އިންޓީރިއާ މިނިސްޓްރީގައި ސިޔާސީ ޕާޓީތަކުގެ ސެކްރެޓަރީ ޖެނެރަލުންނާއި ސިޔާސީ އިސް ބޭފުޅުންނާއެކު ބޭއްވެވި ބައްދަލުވުމެއްގެ ހަވާސާގަ އެވެ.

އީރާނުގެ ރައީސް ވިދާޅުވީ، ލީޑަރާއެކު ގާތްގަނޑަކަށް ހަތް ގަޑިއިރަށް ދެމިގެންދިޔަ "ވަރަށް ކާމިޔާބު" ބައްދަލުވުމުގައި، މިއަދު ގައުމަށް ކުރިމަތިވެފައިވާ ހުރިހާ މުހިންމު މައްސަލަތަކާ ބެހޭގޮތުން މަޝްވަރާ ކުރުމުގެ ފުރުސަތު ލިބިވަޑައިގެންނެވި ކަމަށެވެ.

މީގެ އިތުރުން، "އެއްބައިވަންތަކަމާއި ބަދަހިކަން ދެމެހެއްޓުމަކީ" އާޔަތުﷲ ޚާމަނާއީ ދެއްވި އެންމެ މުހިންމު އިރުޝާދު ކަމަށްވެސް ޕެޒެޝްކިއަން ވިދާޅުވި އެވެ.

"މިއަދު ދުޝްމަނުންގެ މުޅި އިސްތިރާތީޖީ އަމާޒު ހިފާފައިވަނީ ބައިބައިވުން އުފެއްދުމަށް. އެއްބައިވަންތަކަން ގެއްލިދާނެ ފަދަ އެއްވެސް ޚިޔާލުތަފާތުވުމަކުން ނުވަތަ ބަހަކުން ނުވަތަ ބަޔާނަކުން އަޅުގަނޑުމެން ދުރުހެލިވާންޖެހޭ،" ރައީސް ވިދާޅުވި އެވެ.

"ގައުމުގެ އެތެރޭގައި ޚިޔާލުތަފާތުވުންތައް ހުރެދާނެ، ނަމަވެސް ބޭރު ދުނިޔެއާ ކުރިމަތިލާއިރު އަޅުގަނޑުމެން ތިބޭނީ އެއް އަޑަކުން ވާހަކަދައްކަން. އެއީ އަޅުގަނޑުމެންގެ ލޮބުވެތި އީރާނަކީ އެތަނުގެ މިނިވަންކަމާއި، ކަރާމާތާއި، އަދި ގަބޫލުކުރުންތައް ދިފާއުކުރުމުގައި ސާބިތުކަމާއެކު އޮތް ގައުމެއްކަން ދުޝްމަނުންނަށް އަންގައިދިނުމަށްޓަކައި،" ޕެޒެޝްކިއަން އިތުރަށް ވިދާޅުވި އެވެ.

ހަމައެއާއެކު، ރައްޔިތުންގެ ދިރިއުޅުމުގެ ހާލަތާއި، ވަޒީފާގެ ފުރުސަތުތަކާއި، ބޯހިޔާވަހިކަމުގެ އިތުރުން، ދަތިކުރުމުގެ ފިޔަވަޅުތަކުގެ ސަބަބުން ކުރިމަތިވާ ދަތިތަކާއި، ސަރުކާރާއި ރައްޔިތުންގެ ކެތްތެރިކަމާއި، އަދި އާންމުންގެ އެއްބާރުލުމަކީވެސް އެ ބައްދަލުވުމުގައި މަޝްވަރާކުރެވުނު ކަންކަން ކަމަށް ރައީސް ވިދާޅުވި އެވެ.

އީރާނުގެ ރައްޔިތުންނާ މުޚާތަބު ކުރައްވައި ޕެޒެޝްކިއަން ވިދާޅުވީ، "އީރާނުގެ ލޮބުވެތި ރައްޔިތުންނޭވެ، މި ދަތި އުނދަގޫ ވަގުތުތަކުގައި އެއްވެސް އުނިކަމެއް ނުވަތަ ނާކާމިޔާބީއެއް ފެންނަމުންދާނަމަ، އެކަމާ އަޅުގަނޑުމެން ނުހަނު ހިތާމަކުރާކަން ދެނެވަޑައިގަންނަވާށެވެ. އަޅުގަނޑުމެން މިތިބީ މުޅި ހިތުން ތިޔަބޭފުޅުންނަށް ޚިދުމަތް ކުރުމަށް ތައްޔާރަށް. އަދި ތިޔަބޭފުޅުންގެ މައްސަލަތައް ހައްލުކުރުމުގައި އެއްވެސް މަސައްކަތެއް ދޫނުކުރާނެކަމުގެ ޔަގީންކަން އަރުވަން."

ޕެޒެޝްކިއަންގެ ރައީސްކަމުގެ ތިންވަނަ އަހަރު ފެށުމާ ދިމާކޮށް، އާދީއްތަ ދުވަހު އޭނާ ލީޑަރާއެކު މަޝްވަރާތައް ބޭއްވެވި ކަމަށް ޚަބަރުތައް ބުނެ އެވެ.

އެމެރިކާއާއި އިސްރާއީލުން އީރާނާ ދެކޮޅަށް ޣައިރު ގާނޫނީ އުދުވާނީ ހަނގުރާމައެއް ފެށީ ފެބްރުއަރީ މަހުގެ 28 ވަނަ ދުވަހު، އިސްލާމީ އިންގިލާބުގެ ކުރީގެ ލީޑަރު ސައްޔިދު އަލީ ޚާމަނާއީއާއި އަސްކަރިއްޔާގެ އިސް ކޮމާންޑަރުން އަވަހާރަކޮށްލައިގެންނެވެ.

އޭގެ ސާޅީސް ދުވަސް ފަހުން، އޭޕްރިލް މަހުގެ 8 ވަނަ ދުވަހު، އީރާނުގެ ހިތްވަރުގަދަ ދިފާއާއި، ވަރުގަދަ ރައްދު ހަމަލާތަކާއި، އަދި ހުރްމުޒް ކަނޑުއޮޅީގެ މައްޗަށް އޮތް ބާރުގަދަ ކޮންޓްރޯލްގެ ސަބަބުން، ދުޝްމަނުންނަށް ވަނީ ހަނގުރާމަ ހުއްޓާލުމުގެ އެއްބަސްވުމަކަށް އަންނަން މަޖުބޫރުވެފަ އެވެ.

ތެހެރާނާއި ވޮޝިންޓަނުން ޖޫން މަހުގެ 17 ވަނަ ދުވަހު އިސްލާމްއާބާދު ފަހުމުނާމާގައި ސޮއިކުރި ނަމަވެސް، އެމެރިކާއިން އަނެއްކާވެސް އީރާނަށް ހަމަލާދީ، ކަނޑުގެ މަގުން ގައުމު ބަންދުކޮށް (ނޭވަލް ބްލޮކޭޑް)، އެ އެއްބަސްވުމާ އަމަލީގޮތުން ޚިލާފުވި އެވެ.

މީގެ ރައްދުގައި، އީރާނުގެ ހަތިޔާރު އެޅި ފައުޖުތަކުން ވަނީ ހުޅަނގު އޭޝިއާގައި ހުރި އެމެރިކާގެ އިސްތިރާތީޖީ އަމާޒުތަކަށް ވަރުގަދަ ހަމަލާތަކެއް ދީފައެވެ. މީގެ އިތުރުން، ހުރްމުޒް ކަނޑުއޮޅިއަކީ ހުރިހާ ދަތުރުފަތުރަކަށް ބަންދު ތަނެއްގެ ގޮތުގައި ތެހެރާނުން ވަނީ އިއުލާނުކޮށްފަ އެވެ.