ރޮނާލްޑޯ އޭނާގެ ފަސް ދަރިންގެ މަންމަ ޖޯޖީނާ އާ ކައިވެނިކޮށްފި
12 އޯގަސްޓު 2026 | ބުދަ 09:58ޕޯޗުގަލްގެ ކަސްކައިސްގައި ބޭއްވި އަމިއްލަ ރަސްމިއްޔާތެއްގައި ރޮނާލްޑޯ އާއި ޖޯޖީނާ ކައިވެނިކޮށް، އެކަމުގެ އުފާވެރި ޚަބަރު ސޯޝަލް މީޑިއާގައި ވަނީ ހިއްސާކޮށްފައި. ދިހަ އަހަރުވީ މި ގުޅުން ރަސްމީކޮށްފައި މިވަނީ، ސައުދީ ލީގުގެ އާ ސީޒަނަށް ރޮނާލްޑޯ ތައްޔާރުވަމުން އަންނަ ދަނޑިވަޅެއްގައި
ކްރިސްޓިއާނޯ ރޮނާލްޑޯ އާއި އޭނާގެ އަންހެނުން ޖޯޖީނާ ރޮޑްރިގޭޒް | ގެޓީ އިމޭޖަސް
ޕޯޗުގަލްގެ މަޝްހޫރު ފުޓްބޯޅަ ތަރި ކްރިސްޓިއާނޯ ރޮނާލްޑޯ އާއި އޭނާގެ ބައިވެރިޔާ ޖޯޖީނާ ރޮޑްރިގޭޒް މިދިޔަ އަންގާރަ ދުވަހު ކައިވެނިކޮށްފި އެވެ. ރޮނާލްޑޯގެ ޕަބްލިކް ރިލޭޝަންސް ޓީމުން މި ކައިވެނި ސިފަކޮށްފައިވަނީ، އެ ދެމަފިރިންގެ ފަސް ދަރިންނާއެކު ބޭއްވުނު ވަރަށް އަމިއްލަ އަދި ގާތް ރަސްމިއްޔާތެއްގެ ގޮތުގަ އެވެ.
ބްރަންސްވިކް ގްރޫޕުން ނެރުނު ބަޔާނެއްގައި ބުނެފައިވާ ގޮތުގައި، މި ކައިވެނީގެ ރަސްމިއްޔާތު ބާއްވާފައިވަނީ ޕޯޗުގަލްގެ ވެރިރަށް ލިޒްބަންއާ ކައިރީގައި އޮންނަ ހުޅަނގު އައްސޭރިފަށުގެ ރަށެއް ކަމަށްވާ ކަސްކައިސްގަ އެވެ.
ކައިވެނީގެ އުފާވެރި ޚަބަރު ހިއްސާކުރަމުން، މި ދެމަފިރިން ވަނީ އެމީހުންގެ ކައިވެނީގެ އަނގޮޓި ފެންނަ ފޮޓޯއެއް އިންސްޓަގްރާމްގައި އާންމުކޮށްފަ އެވެ.
ސްޕެއިންގެ މެޑްރިޑުން ފުރަތަމަ ބައްދަލުވި މި ދެމަފިރިން އެކުގައި އުޅޭތާ މިހާރު ވަނީ ދިހަ އަހަރު ވެފަ އެވެ.
ދުނިޔޭގެ އެންމެ މޮޅު ކުޅުންތެރިޔާގެ މަގާމު ފަސް ފަހަރު ހޯދާފައިވާ، އަދި ކުޅިވަރުގެ ދުނިޔޭގައި އެންމެ ނުފޫޒުގަދަ އެއް ތަރި ކަމަށްވާ އުމުރުން 41 އަހަރުގެ ރޮނާލްޑޯ ވަނީ، އެންމެ ފަހުން ބޭއްވި ވޯލްޑް ކަޕްގައި ވާދަކޮށް، ހަ ވޯލްޑް ކަޕްގައި ކުޅުމުގެ ރެކޯޑާ އަރާ ހަމަކޮށްފަ އެވެ.
ސައުދީ އަރަބިއްޔާގެ އަލް ނަސްރު ކްލަބަށް ކުޅެމުން އަންނަ ރޮނާލްޑޯ، އަންނަ ހޮނިހިރު ދުވަހު އެ ގައުމުގެ ލީގުގެ އާ ސީޒަންގެ މެޗުތައް ފަށާނެ އެވެ.
