މެސީއާ ގުޅޭ ގޮތުން ސުވާލު ކުރުމުން ރޮނާލްޑޯ ހިތްހަމަ ނުޖެހިއްޖެ، ބުނީ އެމްބާޕޭ ވެސް ލަނޑު ޖަހާ ކަމަށް!

އާޖެންޓީނާގެ ކެޕްޓަން ލިއޮނަލް މެސީއާ ގުޅޭ ގޮތުން ސުވާލު ކުރުމުން، ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ ހިތްހަމަ ނުޖެހިއްޖެ އެވެ.

މިހާރު ކުރިއަށްދާ ފީފާ ވޯލްޑް ކަޕްގައި ޕޯޗުގަލް އިން އުޒްބަކިސްތާންއާ ދެކޮޅަށް ކުޅުނު މެޗަށް ފަހު، ރޮނާލްޑޯ ވަނީ ނޫސްވެރިންނާ ވާހަކަ ދައްކައިފަ އެވެ. އެގޮތުން ނޫސްވެރިން ކުރި އެކި އެކި ސުވާލު ތަކަށް ރޮނާލްޑޯ ޖަވާބު ދީފައިވެ އެވެ.

އެ ސުވާލު ތަކުގެ ތެރެއިން ނޫސްވެރިޔަކު ވަނީ މެސީއާ ގުޅޭ ގޮތުން ސުވާލު ކުރަން ފަށައިފަ އެވެ. މެސީއާ ގުޅޭ ގޮތުން ގިނަ ސުވާލު ތަކެއް ކުރަން ފެށުމުން ރޮނާލްޑޯ ވަނީ، އެހެން މީހުންގެ ވާހަކަ ދައްކަން ބޭނުން ނުވާ ކަމަށް ބުނެ އެ ސަރަހައްދު ދޫކޮށް ގޮސްފައި އެވެ. އެ ސަރަހައްދުން ދަމުން ނޫސްވެރިންނަށް އަތުން އިޝާރާތްކޮށް ރޮނާލްޑޯ ބުނެފައި ވަނީ، ފްރާންސްގެ ކެޕްޓަން ކީލިއަން އެމްބާޕޭ ވެސް ލަނޑު ޖަހާ ކަމަށެވެ. 

އުޒްބަކިސްތާންއާ ދެކޮޅަށް ޕޯޗުގަލް އިން ކުޅުނު މެޗުގައި ރޮނާލްޑޯ ވަނީ ދެ ލަނޑު ޖަހައިފަ އެވެ. އެއާ އެކު ރޮނާލްޑޯ ވެގެން ގޮސްފައި ވަނީ ޕޯޗުގަލްގެ ޤައުމީ ޓީމަށް އެންމެ ގިނަ ލަނޑު ޖަހައިދިން ކުޅުންތެރިޔާ އަށެވެ. އަދި މީގެ އިތުރުން ރޮނާލްޑޯ ވެގެން ގޮސްފައި ވަނީ، ހަ ވޯލްޑް ކަޕެއްގައި ލަނޑު ޖެހި ފުރަތަމަ ކުޅުންތެރިޔާ އަށެވެ. ރޮނާލްޑޯ ވަނީ 2006، 2010، 2014، 2018، 2022 އަދި 2026 ގެ ވޯލްޑް ކަޕްގައި ލަނޑު ޖަހައިފަ އެވެ. 

އާޖެންޓީނާ އިން އޮސްޓްރިއާއާ ދެކޮޅަށް ކުޅުނު މެޗުގައި މެސީ ވަނީ ދެ ލަނޑު ޖަހައިފަ އެވެ. އެ މެޗުގައި ޖެހި ފުރަތަމަ ލަނޑާ އެކު، މެސީ ވެގެން ގޮސްފައި ވަނީ ވޯލްޑް ކަޕްގެ ތާރީޚުގައި ވެސް އެންމެ ގިނަ ލަނޑު ޖެހި ކުޅުންތެރިޔާ އަށެވެ. އެގޮތުން މެސީ ވަނީ ވޯލްޑް ކަޕްގައި 18 ލަނޑު ޖަހައިފަ އެވެ. ދެ ވަނައިގައި އޮތީ 16 ލަނޑާ އެކު ޖަރުމަނުގެ މިރޮސްލާވް ކްލޯސާ އާއި، ފްރާންސްގެ އެމްބާޕޭ އެވެ.