2026 ވަނަ އަހަރުގެ ފީފާ ވޯލްޑް ކަޕްގެ ގޯލްޑަން ބޫޓް އެވޯޑް ހޯދުމުގެ ރޭހުގައި ކުރީގައި އުޅެނީ ކޮން ކުޅުންތެރިންނެއް؟

 މުބާރާތުގެ ނޮކްއައުޓް ބުރުގެ މެޗުތައް ފެށިގެން ކުރިއަށްދާއިރު، އެންމެ ގިނަ ލަނޑު ޖަހާ ކުޅުންތެރިޔާގެ ޝަރަފު ހޯދުމަށް ކުރާ މަސައްކަތް މިހާރު ވަނީ ވަރަށް ބޮޑަށް ވަރުގަދަވެފައެވެ.

މި ރޭހުގެ ތާވަލުގެ ކުރީގައި އުޅެނީ އާޖެންޓީނާގެ ކާމިޔާބު ކުޅުންތެރިޔާ ލިއޮނަލް މެސީ އާއި ފްރާންސްގެ ސުޕަސްޓާ ކީލިއަން އެމްބާޕޭ އެވެ. މީގެ އިތުރުން ނޯވޭގެ އާލިން ހާލަންޑާއި ބްރެޒިލްގެ ވިނީޝިއަސް ޖޫނިއާ ވެސް އަންނަނީ މި ދެ ކުޅުންތެރިންނާ ގާތުން ވާދަކުރަމުންނެވެ.

ފީފާ ގޯލްޑަން ބޫޓް އެވޯޑަކީ ކޮބާ؟ އަދި މި އެވޯޑް ދޭނެ ކުޅުންތެރިއަކު ކަނޑައަޅަނީ ކިހިނެއް؟

ފީފާ ގޯލްޑަން ބޫޓަކީ މުބާރާތް ނިމޭއިރު އެންމެ ގިނަ ލަނޑު ޖަހާ ކުޅުންތެރިޔާއަށް ދޭ އެވޯޑެކެވެ.

މި އެވޯޑް މިހާރު އޮތީ ފްރާންސްގެ އެމްބާޕޭގެ އަތުގަ އެވެ. އޭނާ މި އެވޯޑް ހޯދީ 2022 ވަނަ އަހަރު ގަތަރުގައި ބޭއްވި ވޯލްޑް ކަޕްގައި 8 ލަނޑު ޖަހައިގެންނެވެ.

މުބާރާތް ނިމޭއިރު ދެ ކުޅުންތެރިއަކު ޖެހި ލަނޑުގެ އަދަދު އެއްވަރުވެއްޖެނަމަ، އެވޯޑް ލިބޭނީ އެންމެ ގިނަ އެސިސްޓް (ލަނޑު ޖެހުމަށް އެހީތެރިވެދިނުން) ހެދި ކުޅުންތެރިޔާއަށެވެ.

އެސިސްޓްގެ އަދަދުން ވެސް ދެ ކުޅުންތެރިން ވަކިނުކުރެވިއްޖެ ހާލަތެއްގައި، ގޯލްޑަން ބޫޓް ހަވާލުކުރާނީ އެންމެ މަދު މިނެޓްކޮޅެއްގެ ތެރޭގައި އެ ލަނޑުތަކާއި އެސިސްޓްތައް ހަމަކުރި ކުޅުންތެރިޔާއަށެވެ.

2026 ވަނަ އަހަރުގެ ވޯލްޑް ކަޕްގައި މިހާތަނަށް އެންމެ ގިނަ ލަނޑު ޖެހި ކުޅުންތެރިންނަކީ ކޮބާ؟

ކީލިއަން އެމްބާޕޭ (ފްރާންސް) – 6 ލަނޑު، 2 އެސިސްޓް

ލިއޮނަލް މެސީ (އާޖެންޓީނާ) – 6 ލަނޑު، 0 އެސިސްޓް

އާލިން ހާލަންޑް (ނޯވޭ) – 5 ލަނޑު، 0 އެސިސްޓް

އޮސްމާން ޑެމްބެލޭ (ފްރާންސް) – 4 ލަނޑު، 2 އެސިސްޓް

ވިނީޝިއަސް ޖޫނިއާ (ބްރެޒިލް) – 4 ލަނޑު، 1 އެސިސްޓް

މިހާރު ވޯލްޑް ކަޕްގައި ކުޅެމުންދާ ކުޅުންތެރިންގެ ތެރެއިން ކިތައް ކުޅުންތެރިން ގޯލްޑަން ބޫޓް އެވޯޑް ހާސިލްކޮށްފައިވޭތަ؟

އެމްބާޕޭ އާއި ހެރީ ކޭންގެ އިތުރުން ހޭމްސް ރޮޑްރިގޭޒް އަންނަނީ ދެވަނަ ފަހަރަށް މި އެވޯޑް ހޯދުމަށް މަސައްކަތް ކުރަމުންނެވެ.

އިނގިރޭސިވިލާތުގެ ކޭން މި އެވޯޑް ހޯދީ 2018 ވަނަ އަހަރު ރަޝިއާގައި ބޭއްވި މުބާރާތުގަ އެވެ. އަދި ކޮލަމްބިއާގެ ރޮޑްރިގޭޒް އެންމެ ގިނަ ލަނޑު ޖެހި ކުޅުންތެރިޔާގެ މަގާމު ހޯދީ 2014 ވަނަ އަހަރު ބްރެޒިލްގައި ބޭއްވި މުބާރާތުގަ އެވެ.

މިހާތަނަށް އެއްވެސް ކުޅުންތެރިއަކަށް އެއް ފަހަރަށްވުރެ ގިނައިން މި އެވޯޑް ލިބިފައެއް ނުވެއެވެ.

މި އަހަރުގެ ގޯލްޑަން ބޫޓް ކްރިސްޓިއާނޯ ރޮނާލްޑޯއަށް ކާމިޔާބު ކުރެވިދާނެތަ؟

އޭނާއަށް މި އެވޯޑް ކާމިޔާބު ކުރުމުގެ ފުރުސަތު އެބައޮތެވެ. ނަމަވެސް އެކަން ކުރެވޭނީ ވަރަށް އަވަހަށް އިތުރު ލަނޑުތަކެއް ޖަހައިގެންނެވެ.

ޕޯޗުގަލްގެ ތަޖުރިބާކާރު ކުޅުންތެރިޔާ ރޮނާލްޑޯ މި މުބާރާތުގައި މިހާތަނަށް ޖަހާފައިވަނީ ދެ ލަނޑެވެ. މި ދެ ލަނޑުވެސް އޭނާ ޖެހީ ގްރޫޕް ސްޓޭޖުގައި އުޒްބެކިސްތާން އަތުން 5-0 އިން ޕޯޗުގަލް މޮޅުވި މެޗުގަ އެވެ.

ޕޯޗުގަލް އިން މުބާރާތުގެ ފަހު މަރުހަލާތަކަށް ދިއުމަށް އަމާޒު ހިފާފައިވާއިރު، އެ ޓީމުގެ ކެޕްޓަން ރޮނާލްޑޯ ޖަހާ ލަނޑުތަކުގެ އަދަދު އިތުރުކުރުމަށް އެ ޓީމުން ބޭނުންވާނެ އެވެ.

އެއް ވޯލްޑް ކަޕެއްގައި އެންމެ ގިނަ ލަނޑު ޖެހުމުގެ ރެކޯޑް އޮތީ ކޮން ކުޅުންތެރިއަކަށް؟

މި ރެކޯޑް އޮތީ ފްރާންސްގެ ފޯވާޑް ޖަސްޓް ފޮންޓެއިން އަތުގައެވެ. އޭނާ ވަނީ 1958 ވަނަ އަހަރު ސްވިޑަންގައި ބޭއްވި މުބާރާތުގައި ހައިރާންކުރުވަނިވި 13 ލަނޑު ޖަހާފަ އެވެ.

މީގެ އިތުރުން ސެންޑޯ ކޮޗިސް ވަނީ 1954 ވަނަ އަހަރު ސްވިޒަލޭންޑްގައި ބޭއްވި މުބާރާތުގައި 11 ލަނޑު ޖަހާފަ އެވެ. އަދި ހުޅަނގު ޖަރުމަނުގެ ގާޑް މުލާ ވަނީ 1970 ވަނަ އަހަރު މެކްސިކޯގައި ބޭއްވި ވޯލްޑް ކަޕްގައި 10 ލަނޑު ޖަހާފަ އެވެ.

ފީފާ ވޯލްޑް ކަޕްގެ ތާރީޚުގައި އެންމެ ގިނަ ލަނޑު ޖަހާފައިވަނީ ކޮން ކުޅުންތެރިންނެއް؟

ލިއޮނަލް މެސީ (އާޖެންޓީނާ) – 19 ލަނޑު

ކީލިއަން އެމްބާޕޭ (ފްރާންސް) – 18 ލަނޑު

މިރޮސްލާވް ކްލޯސާ (ޖަރުމަނު) – 16 ލަނޑު

ރޮނާލްޑޯ (ބްރެޒިލް) – 15 ލަނޑު

ގާޑް މުލާ (ހުޅަނގު ޖަރުމަނު) – 14 ލަނޑު