އުޒްބެކިސްތާން އަތުން ޕޯޗުގަލް މޮޅުވި މެޗުގައި ރޮނާލްޑޯ އަށް ރެކޯޑެއް

ފީފާ ވޯލްޑް ކަޕްގެ ގުރޫޕު ކޭގައި އުޒްބެކިސްތާންއާ ދެކޮޅަށް ކުޅުނު މެޗުން ޕޯޗުގަލް ބޮޑު މޮޅެއް ހޯދައިފި އެވެ.

އަންގާރަ ދުވަހުގެ ރޭ ކުޅުނު މެޗު ޕޯޗުގަލް އިން ކާމިޔާބު ކުރީ 5-0 އިންނެވެ. މެޗުގެ ފުރަތަމަ ހާފުގައި ޕޯޗުގަލް އިން ތިން ލަނޑު ޖެހިއިރު، އަނެއް ދެ ލަނޑު އެ ޓީމުން ޖެހީ ދެ ވަނަ ހާފުގައި އެވެ.

މެޗު ފަށައިގެން ހަ ވަނަ މިނެޓުގައި ޕޯޗުގަލް އަށް ލީޑު ނަގައިދިނީ ކެޕްޓަން ކްރިސްޓިއާނޯ ރޮނާލްޑޯ އެވެ. އެ ލަނޑު ޖަހަން ރޮނާލްޑޯ އަށް ފުރުސަތު ތަނަވަސްކޮށްދިނީ ޔާއޯ ކަންސޭލޯ އެވެ. އޭގެ ފަހުން މެޗުގެ 17 ވަނަ މިނެޓުގައި ޔާއޯ ނެވެސް ވަނީ ޕޯޗުގަލްގެ ދެ ވަނަ ލަނޑު ޖަހައިފަ އެވެ.

ފުރަތަމަ ހާފުގެ ފަހު ވަގުތު ރޮނާލްޑޯ ވަނީ ޕޯޗުގަލްގެ ތިން ވަނަ ލަނޑު ޖަހައި އިތުރަށް ލީޑު ފުޅާ ކޮށްފަ އެވެ. އެއީ ބްރޫނޯ ފެނާންޑޭސް ތަނަވަސްކޮށްދިން ފުރުސަތެއްގައި ރޮނާލްޑޯ ޖެހި ލަނޑެކެވެ. މެޗުގެ ދެ ވަނަ ހާފުގެ 60 ވަނަ މިނެޓުގައި ޕޯޗުގަލްގެ ހަތަރު ވަނަ ލަނޑަކީ އުޒްބެކިސްތާންގެ އަބްދުލްވާހިދު ނެމަޓޯވް އަތުން ބައި ކޮޅަށް ވަތް ލަނޑެކެވެ. އަދި މެޗުގެ ފުރިހަމަ ވަގުތު ހަމަވާން ތިން މިނެޓަށް ވެފައި ވަނިކޮށް، ޕޯޗުގަލްގެ ފަހު ލަނޑު ޖެހީ ރަފައެލް ލިއާއޯ އެވެ.

މެޗުން މޮޅުވެ ޕޯޗުގަލް އިން މުބާރާތުގެ ފުރަތަމަ މޮޅު ހޯދިއިރު، މި މެޗުގައި ޖެހި ލަނޑާ އެކު ރޮނާލްޑޯ އަށް ވަނީ ދެ ރެކޯޑެއް ލިބިފައި އެވެ. އެއީ ވޯލްޑް ކަޕްގެ ހަ މުބާރާތެއްގައި ލަނޑު ޖެހި ހަމައެކަނި ކުޅުންތެރިޔާގެ ރެކޯޑާއި، ޕޯޗުގަލް ޤައުމީ ޓީމަށް އެންމެ ގިނަ ލަނޑު ޖަހައިދިން ކުޅުންތެރިޔާގެ ރެކޯޑެވެ.

ގުރޫޕު ސްޓޭޖުގެ ފަހު މެޗުގައި ޕޯޗުގަލް ނިކުންނާނީ ކޮލަމްބިއާއާ ދެކޮޅަށެވެ.