ދުނިޔޭގެ ބާރުގަދަ އެމެރިކާގެ ރައީސަށް ބޮޑެތި ގޮންޖެހުންތަކާ ކުރިމަތިލައްވަން އީރާނުން ޖައްސުވައިފި

ރައީސް ޑޮނަލްޑް ޓްރަމްޕްގެ ރިޕަބްލިކަން ޕާޓީއަށް މިޑްޓާމް އިންތިޚާބުގައި ބޮޑެތި ގެއްލުންތަކެއް ވެދާނެ ކަމުގެ ބިރު ހީވެފައިވާއިރު، އެމަނިކުފާނުގެ ދެވަނަ ދައުރުގެ ލެގަސީ ކިލަނބުވެދާނެ ފަދަ ނުރައްކާތެރި ދެ ގޮންޖެހުމަކާ މިވަނީ ކުރިމަތިލާން ޖެހިފަ އެވެ.

އީރާނުގެ މައްސަލައިގައި، ޖިމީ ކާޓާގެ ވެރިކަމަށްފަހު އެމެރިކާގެ ރައީސަކު ނުވެއްޓޭ ފަދަ ނާޒުކު ފައްތަރަކަށް ޓްރަމްޕް މިވަނީ އަމިއްލައަށް ވެއްޓިވަޑައިގެންފަ އެވެ. 1979 އާއި 1980 ވަނަ އަހަރާ ދެމެދު ހިނގި ރަހީނުކުރުމުގެ ހާދިސާއެކޭ އެއްފަދައިން، ކުރިއަށް އޮތް ގައުމީ އިންތިޚާބާ ދިމާކޮށް އިސްލާމީ ޖުމްހޫރިއްޔާ (އީރާނުން) ދަނީ އެމެރިކާގެ ލީޑަރަށް ސިޔާސީ ގޮތުން ބޮޑެތި ފިއްތުންތަކެއް ކުރިމަތިކުރަމުންނެވެ. ހުރްމުޒް ކަނޑުއޮޅި އަލުން ހުޅުވާލުމުގެ އެއްބަސްވުމެއް ވަރަށް އަވަހަށް ގާއިމުކުރެވޭނެ ކަމަށް ޓްރަމްޕްގެ ޓީމުން މީގެ ހަފުތާއެއް ކުރިން ލަފާކުރި ނަމަވެސް، ދުނިޔޭގެ ބާރުގަދަ އެމެރިކާއަށް ޝަރުތުތައް ކުރިމަތިކުރަމުންދާ ތެހެރާނުން މިހާރު ވަނީ އައު އަދި ހަރުކަށި ޝަރުތުތަކެއް ކުރިމަތިކޮށްފަ އެވެ.

މީގެ އިތުރުން، ޓްރަމްޕަށް ވަނީ ގައުމުގެ އެތެރޭގައިވެސް މިއާ ގުޅުންހުރި އެހެން މައްސަލައަކާ ކުރިމަތިލައްވަން ޖެހިފަ އެވެ. ހަނގުރާމައިގެ ސަބަބުން ހަކަތައިގެ އަގުތަކަށް އަންނަ ބަދަލުތަކާ ހެދި، އިގްތިސާދާމެދު ވޯޓުލާ މީހުން ދެކޭ ގޮތް ދަނީ އިތުރަށް ގޯސްވަމުންނެވެ. ރައީސް އާއި ސަރުކާރުގެ އިސްވެރިން ތަފާސްހިސާބުތަކުން ކުޑަވެސް އުންމީދެއް ފެނޭތޯ ބަލަމުންދާއިރު، އާންމު ރައްޔިތުންނަށް ފެންނަނީ އެމީހުންގެ ހާލަތާމެދު ސަރުކާރުން އަޅާނުލާ ތަނެވެ. ނޮވެމްބަރު މަހުގެ އިންތިޚާބު ގާތްވަމުން އަންނައިރު، މިދިޔަ ހުކުރު ދުވަހު އާންމުކުރި ވަޒީފާގެ ބާޒާރުގެ ނާޢުއްމީދީ ރިޕޯޓަކީ ރިޕަބްލިކަން ޕާޓީއަށް އެންމެ ނޭދެވޭ ވަގުތު ކުރިމަތިވި ހިތްދަތި ޚަބަރެކެވެ.

ރިޕަބްލިކަން ޕާޓީގެ ސިޔާސީ މަސްރަހު ބަނަވަމުންދާއިރު، އެ ޕާޓީގެ ލީޑަރު ހުންނެވީ އެކަންކަމަށް ފަރުވާލެއް ނެތް ފަދަ ގޮތަކަށެވެ. މިދިޔަ ބަންދު ދުވަސްތަކުގައި ޓްރަމްޕް ސޯޝަލް މީޑިއާގައި ކުރެއްވި ގިނަ ޕޯސްޓްތަކަކީ، އެމަނިކުފާނަކީ ރައްޔިތުންގެ އިހުސާސްތަކާ ދުރު ބޭފުޅެއްކަން ދެއްކުމަށް ދުޝްމަނުން ތައްޔާރުކޮށްފައިވާ ފަދަ ޕޯސްޓްތަކެކެވެ. އޭގެ ތެރޭގައި ދެކުނު އެފްރިކާގެ ގޮލްފް ލެޖެންޑް ގެރީ ޕްލޭޔަރާއެކު ނަންގަވާފައިވާ ފޮޓޯއަކާއި، އެމަނިކުފާނުގެ ގޮލްފް ކޯސްއެއްގައި އަލަށް ހަދާ ތަނެއްގެ ފޮޓޯ ހިމެނެ އެވެ. އަދި ވައިޓް ހައުސްގެ ބޯލްރޫމް މަތީގައި ހަދަން ނިންމާފައިވާ ޒަމާނީ ޑްރޯން ޕޯޓަކާއި، ރިފްލެކްޓިންގ ޕޫލް މަރާމާތުކުރުމާއި، ވޮޝިންގޓަންގައި އަލަށް ބަހައްޓާ ރަންކުލަ ލާފައިވާ ދެ ބުދެއްގެ ވާހަކަވެސް ޕޯސްޓްކުރެއްވި އެވެ. އިންފްލޭޝަން ނުވަތަ ތަކެތީގެ އަގުބޮޑުވުން ހުއްޓުވި މީހަކީ ތިމަންމަނިކުފާނު ކަމަށް ދައުވާކުރެއްވި ނަމަވެސް، އެމަނިކުފާނު ފެނިގެންދަނީ ގައުމު އާރާސްތުކުރާނެ އައު ޚިޔާލުތަކެއް ހުރި ލީޑަރެއްގެ ގޮތުގައެއް ނޫނެވެ. އޭގެ ބަދަލުގައި ފެންނަނީ އަމިއްލަ ނަންފުޅު ރަމްޒުކޮށްދޭ ބިނާތަކެއް ބިނާކުރުމަށް މާބޮޑަށް އިސްކަންދޭ ރައީސެއްގެ ގޮތުގަ އެވެ.

ޓްރަމްޕާ ދެކޮޅަށް އީރާނުން ވަރުގަދައަށް ތެދުވަނީ

1980 ވަނަ އަހަރު ތެހެރާނުގައި އެމެރިކާގެ 52 މީހަކު 444 ދުވަހަށް ރަހީނުކޮށްގެން އީރާނުން ވަނީ އެމެރިކާގެ އިންތިޚާބަށް ނުފޫޒު ފޯރުވާފަ އެވެ. އޭގެ 46 އަހަރު ފަހުން، މިފަހަރު ރަހީނުކޮށްފައިވަނީ އިންސާނުންނެއް ނޫނެވެ. އޭގެ ބަދަލުގައި ރަހީނުކޮށްފައިވަނީ ތެޔޮ އެކްސްޕޯޓްކުރާ މުހިންމު މަގު ކަމަށްވާ ހުރްމުޒް ކަނޑުއޮޅި އެވެ. މީގެ މާނައަކީ، ކާޓާގެ ވެރިކަމުގައި ކަންތައް ވީ ފަދައިން، އިގްތިސާދީ ސަބަބުތަކާ ހެދި ވޯޓުލާ މީހުން ރައީސްއާ ދެކޮޅުވަމުންދާ ދަނޑިވަޅެއްގައި، އިންތިޚާބާ ދިމާކޮށް އީރާނަށް އިތުރު ފުރުސަތެއް ލިބުމެވެ.

ތަފާސްހިސާބުތަކުން ދައްކާ ގޮތުގައި އެމެރިކާގައި ޕެޓްރޯލް ލީޓަރެއްގެ އަގު މިހާރު ވަނީ އަލުން 4 ޑޮލަރަށްވުރެ މައްޗަށް އަރާފަ އެވެ. ތަކެތީގެ އަގުބޮޑުވުމުގެ ސަބަބުން ރައްޔިތުން ތިބީ ރުޅިއައިސްފަ އެވެ. އަދި ބޯހިޔާވަހިކަމާއި ސިއްހީ ޚިދުމަތްތަކުގެ އަގު އަތްނުފޯރާ ފަށަށް ދިއުމުގެ ސަބަބުން އާންމުން ދަނީ ބޮޑެތި ތަކްލީފުތަކެއް އުފުލަމުންނެވެ.

ޓްރަމްޕްގެ ސަރުކާރުގެ އިސްވެރިން ތަކުރާރުކޮށް ވިދާޅުވަމުން ގެންދަވަނީ ކަނޑުއޮޅި ހުޅުވާލުމާއެކު މި ދަތިތަކަށް އަވަސް ހައްލެއް ލިބޭނެ ކަމަށެވެ. ނަމަވެސް، މި ވާހަކަތަކުގެ ސަބަބުން އީރާނަށް މަޝްވަރާގެ މޭޒުމަތީގައި އިތުރު ބާރެއް ލިބިގެންދެ އެވެ. ތެހެރާނުން މިހާރު ވަނީ އެމެރިކާގެ ކަނޑުގެ ބްލޮކޭޑް ނުވަތަ ބަންދުކުރުން ހުއްޓާލުމަށާއި، އެ ސަރަހައްދުން އެމެރިކާގެ ސިފައިން ފޭބުމަށް ޝަރުތުކޮށްފަ އެވެ. މީގެ އިތުރުން ހަނގުރާމައިގެ ބަދަލު ހޯދުމަށާއި ދަތިކުރުމުގެ ފިޔަވަޅުތައް އުވާލުމަށްވެސް އީރާނުން ދަނީ ޑިމާންޑް ކުރަމުންނެވެ.

މިއީ ޓްރަމްޕަށް ގަބޫލުކުރެވޭނެ ޝަރުތުތަކެއް ނޫނެވެ. ޓްރަމްޕްގެ ނަޒަރުގައި އީރާނުން މިވަނީ މާ ބޮޑުވަރު ކޮށްފަ އެވެ. ނަމަވެސް، ޓްރަމްޕްގެ ކެތްތެރިކަން ކޮޅުންލައި އަލުން ހަނގުރާމައެއް ފަށައިފިނަމަ، އެމަނިކުފާނު ކުރިމަތިލައްވަން ޖެހޭނީ އާންމުންގެ ތާއީދު ނެތް ހަނގުރާމައަކާ އެވެ. އަދި އޭގެ ސަބަބުން އިގްތިސާދަށް މާ ބޮޑު ގެއްލުމެއް ލިބިގެންދާނެ އެވެ.

ރައީސް ޓްރަމްޕް މިހާރު މަސައްކަތް ކުރައްވަމުން ގެންދަވަނީ ކަންކަން ކޮންޓްރޯލް ކުރެއްވުމަށެވެ. އެމަނިކުފާނު އެކްސިއޯސްއަށް ވިދާޅުވި ގޮތުގައި، އެމެރިކާއިން ކުރި ބްލޮކޭޑްގެ ސަބަބުން އީރާނުގެ އިގްތިސާދަށް ކުރާ އަސަރު ފެންނަންދެން މިހާރު މަޑުކުރައްވަނީ އެވެ. "އަހަރެމެން މިކަން ކުރަނީ ވަރަށް މަޑުމައިތިރިކޮށް. އެމީހުންނާއެކު މިހާރު ކުރިއަށްދަނީ ހަމައެކަނި ކޮންމެވެސް ވަރެއްގެ މަޝްވަރާތަކެއް،" އާދިއްތަ ދުވަހު ޓްރަމްޕް ވިދާޅުވި އެވެ.

އެހެންކަމުން، މިދިޔަ އަހަރު ދިން ވައިގެ ހަމަލާތަކުގައި އީރާނުގެ އަސްކަރިއްޔާއަށް ބޮޑެތި ގެއްލުންތަކެއް ދީ، އެ ގައުމުގެ ނިއުކްލިއާ ޕްރޮގްރާމާއި ދިފާއީ ސިނާއަތް ބަލިކޮށްލުމަށްފަހު، ޓްރަމްޕް މިހާރު އުންމީދު ކުރައްވަނީ އެމެރިކާގެ އިގްތިސާދީ ވަރުގަދަކަމުގެ އެހީގައި މި ދަތި ހާލަތުން އަރައިގަނެވޭނެ ކަމަށެވެ.

ނަމަވެސް ގިނަ ދިރާސާވެރިން ގަބޫލުކުރާ ގޮތުގައި، އީރާނުގެ ހަރުކަށި ލީޑަރުން އެމެރިކާއާ ދެކޮޅަށް ކުރާ މި ހަނގުރާމައިގައި، އެ ގައުމުގެ ރައްޔިތުންނަށް ކިތަންމެ ބޮޑު ތަކްލީފެއް އުފުލަން ޖެހުނަސް އެކަމަށް ފަރުވާލެއް ނުބަހައްޓާނެ އެވެ. ފަހަރުގައި އީރާނުގެ ސަރުކާރު ވެއްޓިދާނެ އެވެ. ނަމަވެސް ޓްރަމްޕަށް އިންތިޚާބާ ހަމައަށް އޮތް ކުރު މުއްދަތުގެ ތެރޭގައި އެފަދަ ކަމެއް ހިނގާތަން ފެނިވަޑައިގަތުމަކީ ނާދިރު ކަމެކެވެ.

ވައިޓް ހައުސްއިން ބުނަނީ އިގްތިސާދު އޮތީ ވަރަށް ރަނގަޅަށް ކަމަށް 

ހަނގުރާމައިގެ ސަބަބުން ގައުމުގެ އެތެރޭގެ ހާލަތު ރަނގަޅުވާނެ ދުވަހަކަށް މަޑުކޮށްލައިގެން ތިބެވޭކަށް ރިޕަބްލިކަން ޕާޓީއަކަށް ނެތެވެ. ޖުލައި މަހު އެމެރިކާގެ އިގްތިސާދުން 23،000 ވަޒީފާ މަދުވިކަން މިދިޔަ ހުކުރު ދުވަހުގެ ރަސްމީ ތަފާސްހިސާބުތަކުން ދެއްކުމަކީ ވައިޓް ހައުސްއަށާއި ރިޕަބްލިކަން ޕާޓީގެ ކެމްޕޭނަށް ލިބުނު ބޮޑު ހީނަރުކަމެކެވެ. އަދި މިއީ ވަޒީފާ ނެތް އެތައް މިލިއަން އެމެރިކާ ރައްޔިތުންނަށް ލިބުނު ދެރައެކެވެ. ކާބޯތަކެއްޗާއި ބޯހިޔާވަހިކަމުގެ އަގު އިންތިހާއަށް ބޮޑުވެ، އާމްދަނީއާ ނުބައްދަލުވުމުގެ ސަބަބުން، ޓްރަމްޕް އެ ވިދާޅުވާ އިގްތިސާދީ "ރަންޒަމާން" ގިނަ ރައްޔިތުންނަކަށް އިހުސާސެއް ނުކުރެވެ އެވެ.

އިގްތިސާދާ މެދު ވައިޓް ހައުސްއަށް ފެންނަ މަންޒަރާއި އާންމު ރައްޔިތުން ތަޖުރިބާކުރާ ހަގީގަތާ ދެމެދު އޮތް މި ބޮޑު ފަރަގަކީ ސިޔާސީ ގޮތުން މަޅިއެކެވެ. މިއީ ގިނަ ފަހަރަށް ހަގީގަތާ ނުބައްދަލު ވާހަކަތަކުގެ ސަބަބުން ކުރިމަތިވާ ކަމެކެވެ.

އަނެއްކޮޅުން، އިގްތިސާދީ މެސެޖުތައް ރައްޔިތުންނަށް ފޯރުކޮށްދިނުމަކީ ސިޔާސީ ގޮތުން އެންމެ އުނދަގޫ އެއް މަސައްކަތެވެ. 2008 ވަނަ އަހަރު ޖޯން މެކޭންގެ ރިޕަބްލިކަން ކެމްޕޭނާއި، 2010 ވަނަ އަހަރު ރައީސް ބަރަކް އޮބާމާގެ ދަށުން ޑިމޮކްރެޓުން ކުރި މިޑްޓާމް ކެމްޕޭނާއި، އަދި 2024 ވަނަ އަހަރު ބައިޑަން އާއި ހެރިސްގެ ކެމްޕޭން ނާކާމިޔާބުވީވެސް މި ސަބަބާ ހުރެ އެވެ.

އަދި އިގްތިސާދަކީ ޓްރަމްޕަށް ކުރިމަތިވެފައިވާ ހަމައެކަނި މައްސަލައެއް ނޫނެވެ.

އެމަނިކުފާނު އެކްސިއޯސްއަށް ވިދާޅުވީ ހަނގުރާމައިގެ ކަންތައްތައް "ރަނގަޅުވާނެ" ކަމަށެވެ. "އަބަދުވެސް ކަންކަން ރަނގަޅުވޭ. މިއީ ހަމަ ރާޒުވާކުޅުން ކަހަލަ ކަމެއް،" ޓްރަމްޕް ވިދާޅުވި އެވެ. ނަމަވެސް އީރާނުގެ މައްސަލައިގައާއި ސިޔާސީ މަސްރަހުގައި އެމަނިކުފާނު ކުޅިބައި އަތުރާލާފައިވާ ގޮތުން، މި ކުޅިވަރު ނިމިގެންދާނެ ގޮތެއް އެއްވެސް މީހަކަށް އަންދާޒާކުރާކަށް ނޭނގެ އެވެ. އެނގޭހާވެސް އެއްޗަކީ ދުނިޔޭގެ އެންމެ ބާރުގަދަ ގައުމުގެ ރައީސްއަށް އީރާނުގެ މައްސަލަ ބޮޑު ބޮލުގެ ރިހުމަކަށް ވެފައިވާ ކަމެވެ.