އީރާންއާ ދެކޮޅަށް ކުރާ ހަނގުރާމައަކީ ރާޒުވާ ކުޅުން ކަހަލަ ކަމެއް ކަމަށާއި، މިވަގުތު އެމެރިކާ އިން އަމަލު ކުރަނީ މަޑުމައިތިރި ސިޔާސަތެއްގެ ދަށުން ކަމަށް ޓްރަމްޕް ވިދާޅުވެއްޖެ

އީރާން އަށް ކުރިމަތި ކުރަމުންގެންދާ އިގްތިސާދީ ފިއްތުންތައް އިތުރު ކުރުމަށް ތައްޔާރަށް ހުންނެވި ނަމަވެސް، މިވަގުތު އެމެރިކާ އިން އަމަލުކުރަމުން ދަނީ މަޑުމައިތިރި ސިޔާސަތެއްގެ ދަށުން ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

އީރާން އިން ހަރުކަށި ޝަރުތުތަކެއް ކުރިމަތި ކުރަމުންދާ ދަނޑިވަޅެއްގައި، ޓްރަމްޕް މިހާރު ވަނީ އިތުރު އަސްކަރީ ހަމަލާތަކެއް ދިނުމުގެ ވިސްނުންފުޅާ ދުރަށް ޖެހިވަޑައިގެންފައިވާކަން ހާމަކުރައްވާފައި އެވެ.

އޮންލައިން ނޫސް އެޖެންސީއެއް ކަމަށްވާ "އެކްސިއޯސް" އަށް ފޯނުން ދެއްވި ކުރު އިންޓަވިއުއެއްގައި އާދީއްތަ ދުވަހު ޓްރަމްޕް ވިދާޅުވީ، އީރާންގެ މައްސަލައިގައި އެމެރިކާ އިން މިހާރު އަމަލު ކުރަމުން ދަނީ ވަރަށް ބޮޑަށް "ލޯ-ކީ" ކޮށް ނުވަތަ މަޑުމައިތިރިކޮށް ކަމަށެވެ.

މީގެ ހަފުތާއެއް ކުރިން އީރާން އަށް ވަރުގަދަ ހަމަލާތަކެއް ދޭނެ ކަމުގެ އިންޒާރު ޓްރަމްޕް ދެއްވި ނަމަވެސް، ފެބްރުއަރީ 28 ވަނަ ދުވަހު އިސްރާއީލްއާ ގުޅިގެން ފެށި ހަނގުރާމަ ނިމުމަކަށް ގެނައުމުގެ އެއްބަސްވުމަކަށް ބާރުއެޅުމުގެ ގޮތުން އޭނާ ވަނީ އެ ނިންމެވުން ފަސްކުރައްވާފައި އެވެ.

ހުރްމުޒް ކަނޑުއޮޅި ހުޅުވާލުމަށް ވެވޭ އެއްބަސްވުން ލަސްވަމުން ދާތީ، އެކަމާ މެދު ކަންބޮޑުވުމެއް ނެތްކަން ޓްރަމްޕް ވަނީ ހާމަކުރައްވާފައި އެވެ. އީރާން އިން ބުނަމުން ދަނީ އެއްބަސްވުމަކަށް އައުމުގެ ކުރިން، ޖޫން މަހު ދެ ޤައުމުގެ ދެމެދުގައި ސޮއި ކުރެވުނު ފަހުމުނާމާއާ އެއްގޮތަށް، އެމެރިކާ އިން އީރާންގެ ބަނދަރުތައް ބަންދު ކޮށްފައި އޮތް އޮތުން ނިމުމަކަށް ގެނެސް، ތެލުގެ ދަތި ކުރުމުގެ ފިޔަވަޅުތައް އުވާލަން ޖެހޭނެ ކަމަށެވެ.

ހަނގުރާމަ ފެށުނީއްސުރެ، އީރާން އިން ހުރްމުޒް ކަނޑުއޮޅި ބަންދުކުރުމާ ގުޅިގެން ދުނިޔޭގެ ބާޒާރުގައި ތެލުގެ އަގު އިންތިހާ އަށް އުފުލި، ދުނިޔޭގެ އިގްތިސާދަށް ވަނީ ބޮޑެތި ލޮޅުންތަކެއް އަރާފައި އެވެ. މިއީ އަންނަ ނޮވެމްބަރު މަހު ބޭއްވުމަށް ހަމަޖެހިފައިވާ މިޑްޓާމް އިންތިޚާބާ ކުރިމަތިލާއިރު ޓްރަމްޕްގެ ސަރުކާރަށް އޮތް ބޮޑު ގޮންޖެހުމަކަށް ވަނީ ވެފައި އެވެ.

ނަމަވެސް ޓްރަމްޕް ވިދާޅުވީ އިރާން އާއެކު ކުރިއަށްދަނީ "ސެމީ-ނެގޯޝިއޭޝަން" ނުވަތަ ފުރިހަމަ ނޫން މަޝްވަރާތަކެއް ކަމަށާއި އެމެރިކާ އިން ބަލަމުންދަނީ އީރާންގެ އިންފްލޭޝަން މަތިވެ، އެ ޤައުމުގެ ފައިސާ ހުސްވަމުންދާ މަންޒަރު ކަމަށެވެ.

މީގެ އިތުރުން ޓްރަމްޕް ފާހަގަ ކުރެއްވި ގޮތުގައި، މިހާރު ތެލުގެ އަގުތައް ދަށަށް ދަމުންދާތީ، ހަނގުރާމައިގެ ސަބަބުން އެމެރިކާގެ ކޮންސިއުމަރުންނަށް ކުރިމަތިވި ތަކުލީފުތައް ވަނީ ކުޑަވާން ފަށާފައި އެވެ. އީރާން އާއެކު އޮތް ގުޅުމާ ބެހޭ ގޮތުން ވާހަކަ ދައްކަވަމުން ޓްރަމްޕް ވިދާޅުވީ، މިއީ "ޗެސް ގޭމެއް" ފަދަ ކުޅިވަރެއް ކަމަށާއި ހުރިހާ ކަމެއް ވެސް އެންމެ ފަހުން ރަނގަޅު ވާނެ ކަމަށެވެ.