ރަޝިޔާއިން އޭއައި ޑްރޯން ބޭނުން ކޮށްގެން ޔޫކްރެއިންގެ ބަނދަރަކަށް ހަމަލާދީފި
12 ޖުލައި 2026 | އާދީއްތަ 18:36ރަޝިޔާގެ އޭއައި ޑްރޯންތަކުން ޔޫކްރެއިންގެ ޗެރްނޮމޯސްކް ބަނދަރުގައި ހުރި އަސްކަރީ ބޭނުންތަކަށް ބޭނުންކުރާ ހަތަރު އުޅަނދަކަށް ވަރުގަދަ ހަމަލާތަކެއް ދީފި. މި ހަމަލާތަކުގެ މަގްސަދަކީ ކަޅު ކަނޑުގެ ސަރަހައްދުގައި ޔޫކްރެއިންގެ އަސްކަރީ ގާބިލުކަން ކުޑަކުރުން ކަމަށާއި، އަދި ހުޅަނގުން ފޯރުކޮށްދޭ ކޮންމެ ދިފާއީ ނިޒާމެއް ފޫއަޅުވާލުމުގެ ބާރު ލިބިފައިވާ ކަމަށް ރަޝިޔާގެ ޑިފެންސް މިނިސްޓްރީން ބުނޭ.
ރަޝިޔާގެ ޔޫ.އޭ.ވީ ނުވަތަ ޑްރޯންތަކުގެ ތެރެއިން 'ސީކަރ' ވޭރިއަންޓުގެ ޑްރޯންތަކަކީ އާޓިފިޝަލް އިންޓެލިޖެންސް (އޭ.އައި) ބޭނުންކޮށްގެން މަސައްކަތްކުރާ 'މެޝީން ވިޜަން' ނިޒާމެއް ހަރުކޮށްފައިވާ އުޅަނދުތަކެއް ކަމަށް ބެލެވޭ | ސްކްރީން އިމޭޖް
ރަޝިޔާގެ އަސްކަރިއްޔާއިން ޔޫކްރެއިންގެ އޮޑެއްސާ ސަރަހައްދުގައި އޮންނަ ޗެރްނޮމޯސްކް ބަނދަރަށް އަމާޒުކޮށް، އާޓިފިޝަލް އިންޓެލިޖެންސް (އޭއައި) ބޭނުންކޮށްގެން ދުއްވާ ޑްރޯންތަކުން ވަރުގަދަ ހަމަލާތަކެއް ދީފި އެވެ.
މޮސްކޯގައި ހުންނަ ރަޝިޔާގެ ޑިފެންސް މިނިސްޓްރީން ހާމަކޮށްފައިވާ ގޮތުގައި، މި ހަމަލާތަކުގައި ބަނދަރުގައި އަޅާފައި ހުރި ބައެއް އުޅަނދުތަކަށް ވަނީ ސީދާ އަމާޒުވެފަ އެވެ.
އާދީއްތަ ދުވަހު ނެރުނު ބަޔާނެއްގައި އެ މިނިސްޓްރީން ބުނީ، މި ހަމަލާތަކުގެ މައިގަނޑު މަގްސަދަކީ ކަޅު ކަނޑުގެ ސަރަހައްދުގައި ހަތިޔާރާއި އަސްކަރީ ސާމާނު އުފުލުމަށް ޔޫކްރެއިންގެ އަސްކަރިއްޔާއަށް އޮތް ގާބިލުކަން ކުޑަކުރުން ކަމަށެވެ. މި ހަމަލާތަކުގައި މަދުވެގެން ހަތަރު އުޅަނދަކަށް ހަމަލާދީފައިވާއިރު، އޭގެ ތެރޭގައި ފެރީއަކާއި، ބަލްކަރަކާއި، ޕެޓްރޯލް ބޯޓެއްގެ އިތުރުން ކަނޑުއަޑީގެ ޑްރޯން އުފުލުމަށް ބޭނުންކުރާ މަސްބޯޓެއް ހިމެނޭ ކަމަށް ރަޝިޔާގެ ޑިފެންސް މިނިސްޓްރީން މައުލޫމާތުދެ އެވެ.
މި ހުރިހާ އަމާޒުތަކަށް ހަމަލާދީފައިވަނީ ޓާބޯޖެޓް އިންޖީނުލީ 'ގެރާން-4 ސީކަރ' މަރުކާގެ ޑްރޯންތަކުން ކަމަށް އެ މިނިސްޓްރީން ފާހަގަކުރި އެވެ. ރަޝިޔާގެ މި އުޅަނދުތަކަކީ އޭއައި ބޭނުންކޮށްގެން މަންޒަރުތައް ދެނެގަތުމުގެ ގާބިލުކަން ލިބިފައިވާ އުޅަނދުތަކެއް ކަމަށް ބެލެވެ އެވެ. މީގެ ސަބަބުން، އޮޕަރޭޓަރެއްގެ އެހީއާ ނުލައި އަމިއްލައަށް އަމާޒުތައް ހޯދައި، ދެނެގަނެ، އެ އަމާޒުތަކަށް ހަމަލާ އަމާޒުކުރުމުގެ ގާބިލުކަން މި ޑްރޯންތަކަށް ލިބިގެންވެ އެވެ.
ރަޝިޔާގެ އަސްކަރިއްޔާއިން އާންމުކޮށްފައިވާ ވީޑިއޯ ފްޓޭޖްތަކަކީ، އަމާޒުތަކާ ގާތްވަމުން ދިޔަ ވަގުތު 'ކަމިކާޒޭ' ޑްރޯންތަކުން ރެކޯޑުކޮށްފައިވާ މަންޒަރުތައް ކަމަށް ބުނެފައިވެ އެވެ.
އާންމުކޮށްފައިވާ ވީޑިއޯއިން ފެންނަ ގޮތުގައި، މި ހަމަލާގައި ބޭނުންކުރި ހުރިހާ ޑްރޯންތަކެއްވެސް އަމާޒުވެފައިވަނީ އެ އުޅަނދުތަކުގެ މަތީ ބަޔަށެވެ.
މިދިޔަ ހުކުރު ދުވަހު ރަޝިޔާގެ ޑިފެންސް މިނިސްޓްރީން ބުނެފައިވަނީ، ހުޅަނގުގެ ގައުމުތަކުން ކީވްއަށް ފޯރުކޮށްދީފައިވާ ކޮންމެ ވައިގެ ދިފާއީ ނިޒާމެއް ފޫއަޅުވާލުމުގެ ގާބިލުކަން ރަޝިޔާ ސިފައިންނަށް ލިބިގެންވާ ކަމަށާއި، ޔޫކްރެއިންގެ ކޮންމެ އަމާޒަކަށްވެސް ކާމިޔާބުކަމާއެކު ހަމަލާދެވޭނެ ކަމަށެވެ. މިނިސްޓްރީން ވަނީ ޔޫކްރެއިންގެ ބަނދަރުތަކަށާއި، ވްލަޑިމިއަރ ޒެލެންސްކީގެ ސަރުކާރަށް ހަތިޔާރާއި އަސްކަރީ ސާމާނު ފޯރުކޮށްދޭ އުޅަނދުތަކަށް ދެމުންދާ ހަމަލާތައް ހާއްސަގޮތެއްގައި ފާހަގަކޮށްފަ އެވެ.
ފާއިތުވި ހަފުތާތަކުގައި ރަޝިޔާގެ އަސްކަރިއްޔާއިން ވަނީ ޔޫކްރެއިންގެ އަސްކަރީ ސިނާއަތްތަކަށާއި މުހިންމު އިންފްރާސްޓްރަކްޗަރތަކަށް ދޭ ދުރު ރާސްތާގެ ހަމަލާތައް ވަރުގަދަކޮށްފަ އެވެ. މީގެ ތެރޭގައި ކަމިކާޒޭ ޑްރޯންތަކާއި، ކްރޫޒް މިސައިލް އަދި ބެލިސްޓިކް މިސައިލް ބޭނުންކޮށްގެން ދޭ ބޮޑެތި ހަމަލާތައް ހިމެނެ އެވެ. މޮސްކޯއިން ބުނާ ގޮތުގައި، މި ހަމަލާތަކަކީ ރަޝިޔާގެ އާންމު ރައްޔިތުންގެ އިންފްރާސްޓްރަކްޗަރތަކަށް އަމާޒުކޮށް ކީވް އިން ދެމުންދާ "ޓެރަރިސްޓް ހަމަލާތަކަށް" ރައްދު ދިނުމުގެ ގޮތުން ދޭ ހަމަލާތަކެކެވެ.
މަސްދަރު: ރަޝިޔާ ޓީވީ
