އިސްރާއީލްގެ ހަނގުރާމައާ ގުޅިގެން މެދުކަނޑާލާފައިވާ ފަލަސްތީނުގެ ފުޓުބޯޅަ މުބާރާތްތައް ސެޕްޓެމްބަރުގައި އަލުން ފަށަނީ

އިސްރާއީލް އިން ފަލަސްތީނުގެ ޣައްޒާ އަށް ދެމުންދާ ލާއިންސާނީ ހަމަލާތަކާ ގުޅިގެން މެދުކަނޑާލާފައިވާ ފަލަސްތީނުގެ ފުޓުބޯޅަ މުބާރާތްތައް އަންނަ ސެޕްޓެމްބަރު މަހު އަލުން ފެށުމަށް ނިންމައިފި އެވެ.

ފަލަސްތީނުގެ ފުޓުބޯޅަ އެސޯސިއޭޝަންގެ ރައީސް ޖިބްރީލް ރަޖޫބް ރާމަﷲގައި ބޭއްވި ނޫސްވެރިންގެ ބައްދަލުވުމެއްގައި ވިދާޅުވީ، ގާތްގަނޑަކަށް ތިން އަހަރު ދުވަހުގެ މެދުކެނޑުމަކަށް ފަހު، އެ ޤައުމުގެ ފުޓުބޯޅަ ލީގާއި، ކުޅިވަރުގެ ހަރަކާތްތައް ސެޕްޓެމްބަރު މަހުގެ ހަތަރު ވަނަ ދުވަހު އަލުން ފަށާނެ ކަމަށެވެ. ފަލަސްތީނުގެ ޕްރޮފެޝަނަލް ފުޓުބޯޅަ ލީގު ހިމެނޭހެން، ހުރިހާ މުބާރާތްތަކެއް ހުއްޓާލާފައިވަނީ 2023 ވަނަ އަހަރުގެ އޮކްޓޫބަރު މަހުގެ ހަތް ވަނަ ދުވަހު އިސްރާއީލް އިން ފެށި ހަނގުރާމައާ ގުޅިގެންނެވެ.

އަލުން ފަށާ ފުރަތަމަ މުބާރާތަށް ދީފައިވާ ނަމަކީ "ތައުޒަންޑް މާޓިއާސް ކަޕް" ނުވަތަ "ހާސް ޝަހީދުންގެ މުބާރާތް" އެވެ. މިއީ ހަނގުރާމައިގެ ތެރޭގައި އިސްރާއީލް އިން ޝަހީދު ކޮށްލާފައިވާ ފަލަސްތީނުގެ 1،014 ކުޅިވަރު އެތުލީޓުންގެ ހަނދާނުގައި ދީފައިވާ ނަމެއް ކަމަށް އެ އެސޯސިއޭޝަނުން ބުނެ އެވެ. މި މުބާރާތުގައި ޖުމްލަ 200 އަށް ވުރެ ގިނަ ކުލަބުން ވާދަކުރާނެ އެވެ. އޭގެ ތެރޭގައި އިސްރާއީލް އިން ހިފާފައިވާ ހުޅަނގު އައްސޭރީގެ 146 ކުލަބަކާއި، ޣައްޒާގެ 44 ކުލަބެއްގެ އިތުރުން، ލުބުނާންގައި ތިބި ފަލަސްތީނުގެ ރެފިއުޖީ ކޭމްޕުތަކުގެ 36 ކުލަބެއް ހިމެނެ އެވެ. މި މުބާރާތް މި ތިން ސަރަހައްދުގައި ވެސް އެއްފަހަރާ ފެށުމަށް ވަނީ ހަމަޖެހިފައި އެވެ.

ޖިބްރީލް ރަޖޫބް ވިދާޅުވީ، ހަނގުރާމައިގެ ސަބަބުން ފަލަސްތީނުގެ ހުރިހާ ރައްޔިތުންނަށް ދަތި އުނދަގޫ ހާލަތްތަކެއް ކުރިމަތިވެ، މުބާރާތްތައް މެދުކަނޑާލަން ޖެހުނު ނަމަވެސް، ފަލަސްތީނުގެ ޤައުމީ އަޒުމަށް ބަދަލެއް ނާންނަ ކަމަށެވެ. އަދި ކުޅިވަރަކީ އުންމީދާއި ދިރިއުޅުމުގެ ރަމްޒެއްގެ ގޮތުގައި ދެމި އޮންނާނެ ކަމަށް ޤަބޫލު ކުރައްވާ ކަމަށް ވެސް އޭނާ ވިދާޅުވި އެވެ. މީގެ އިތުރުން، ހަނގުރާމައިގެ ސަބަބުން އެސޯސިއޭޝަން އާއި ކުލަބުތަކަށް މާލީ ގޮތުން ބޮޑެތި ގޮންޖެހުންތަކެއް ކުރިމަތިވެފައިވާކަން އޭނާ ފާހަގަ ކުރެއްވި އެވެ.

މި ނޫސްވެރިންގެ ބައްދަލުވުމުގައި ރަޖޫބް ވަނީ ދުނިޔޭގެ ފުޓުބޯޅައިގެ މައި އިދާރާ (ފީފާ) އާއި، އެހެނިހެން ފެޑެރޭޝަންތަކުން ފަލަސްތީނުގެ ކުޅިވަރާ އެކު ތިބުމަށް ގޮވާލައްވާފައި އެވެ. އަދި ކުޅުންތެރިންނާއި ކުލަބުތަކާއި ކުޑަކުދިންނަށް މިނިވަންކަމާއި އިއްޒަތާއެކު ކުޅިވަރުގެ އުފާ ހޯދުމުގެ ހައްގު ރައްކާތެރިކޮށްދިނުމަށް އޭނާ އެދިވަޑައިގެންފައިވެ އެވެ.

ފީފާގެ ރައީސް ޖިއާނީ އިންފަންޓީނޯ މުބާރާތްތައް އަމިއްލަ އިންވެސްޓަރުންނަށް ހުޅުވާލުމަށް ގެންގުޅުއްވި ޕްލޭން އަށް ފާޑު ވިދާޅުވަމުން ރަޖޫބް ވިދާޅުވީ، ފަލަސްތީނަށް އޮތް އެންމެ ބޮޑު ސުވާލަކީ ސިޔާސީ ނުފޫޒަށް ލެނބުމެއް ނެތް ގޮތެއްގައި، އެންމެންގެ މައްޗަށް ހަމަހަމަކަމާ އެކު ޤަވާއިދުތައް ތަންފީޒު ކުރުމުގެ ހިތްވަރު ފީފާގެ ކިބައިގައި ހުރިތޯ ކަމަށެވެ.

ފަލަސްތީނުގެ ފުޓުބޯޅަ އެސޯސިއޭޝަން އިން ވަނީ ބައިނަލްއަގުވާމީ ގާނޫނުތަކާ ޚިލާފަށް ހުޅަނގު އައްސޭރީގައި އިސްރާއީލް އިން ހަދާފައިވާ އާބާދީތަކުގައި ހަރަކާތްތެރިވާ އިސްރާއީލްގެ ކުލަބުތަކަށް ފިޔަވަޅު އެޅުމަށާއި، ޣައްޒާގައި އިސްރާއީލް އިން ހިންގަމުންދާ އަމަލުތަކާ ގުޅިގެން، އިސްރާއީލް ސަސްޕެންޑު ކުރުމަށް ވެސް ގޮވާލައިފަ އެވެ. ރަޖޫބް ވިދާޅުވީ ފަލަސްތީން އިން އެދެނީ އިތުރު އިނާޔަތްތަކަކަށް ނޫން ކަމަށާއި، އެދެނީ ބައިނަލްއަގުވާމީ ކުޅިވަރު ގާނޫނުތަކުން ކަށަވަރު ކޮށްދޭ ޤާނޫނީ ހައްގުތަކަށް ކަމަށެވެ.