އިސްރާއީލް އިން ޣައްޒާ އަށް ދިން ހަމަލާ، ޤަތަރާއި މިޞްރު އަދި ތުރުކީ އިން ހަރުކަށި އިބާރާތުން ކުށްވެރިކޮށްފި

ޣައްޒާގައި ޤާއިމުކޮށްފައިވާ ހަނގުރާމަ ހުއްޓާލުމުގެ އެއްބަސްވުމާ އިސްރާއީލް އިން ތަކުރާރުކޮށް ޚިލާފުވަމުންދާ ދިޔުމާއި، ވަކިން ޚާއްސަކޮށް ސިއްހީ ޚިދުމަތްދޭ މަރުކަޒުތަކަށް ދެމުންދާ ހަމަލާތައް ޤަތަރާއި، މިޞްރު އަދި ތުރުކީ އިން ހަރުކަށި އިބާރާތުން ކުށްވެރިކޮށްފި އެވެ.

މި ތިން ޤައުމުން ގުޅިގެން ނެރުނު ބަޔާނެއްގައި ވަނީ އިސްރާއީލްގެ އަމަލުތަކާމެދު ނުރުހުން ފާޅުކޮށް، ބައިނަލްއަޤުވާމީ ގާނޫނުތަކަށް އިސްރާއީލް އިން ބޯލަނބަން ޖެހޭނެ ކަމަށް ބުނެފައި އެވެ.

ހަނގުރާމަ ހުއްޓާލުމުގެ މަޝްވަރާތަކުގައި މެދުވެރިންގެ ދައުރު އަދާކުރާ މި ތިން ޤައުމުން ފާހަގަކުރި ގޮތުގައި، އިސްރާއީލް އިން އެއްބަސްވުމާ ޚިލާފުވުމުގެ ސަބަބުން ހަނގުރާމަ ހުއްޓާލުމުގެ ދެ ވަނަ މަރުހަލާ ތަންފީޒު ކުރުމަށް ކުރަމުންދާ މަސައްކަތްތަކަށް ވަނީ ހުރަސް އެޅިފައި އެވެ.

މިއީ ހަމާސް އާއި ފަލަސްތީނުގެ އެހެނިހެން ޖަމާއަތްތަކުން ހުށަހަޅާފައިވާ މަގު ޗާޓު ޤަބޫލު ކޮށްފައިވާ ދަނޑިވަޅެއްގައި، އިސްރާއީލް އިން ގަސްދުގައި ކުރަމުންދާ ކަމެއްގެ ގޮތުގައި ބަޔާނުގައި ސިފަ ކޮށްފައިވެ އެވެ.

މި ބަޔާނުގައި އިތުރަށް ބުނެފައި ވަނީ، އިސްރާއީލްގެ މި އަމަލުތަކުގެ ސަބަބުން މަސްރަހު ފިނި ކުރުމަށް ކުރާ މަސައްކަތްތަކަށް ނުރައްކާވެ، ޣައްޒާގެ އާންމު ރައްޔިތުން އުފުލަމުންދާ ތަކުލީފުތައް އިންތިހާ އަށް އިތުރު ވަމުންދާ ކަމަށެވެ. އެހެންކަމުން، އާންމު ރައްޔިތުންނާއި، ސިއްހީ މަރުކަޒުތަކާއި، އިންސާނީ އެހީތެރިކަން ފޯރުކޮށްދޭ ފަރާތްތަކަށް ފުރިހަމަ ރައްކާތެރިކަން ކަށަވަރު ކޮށްދިނުމަށް މެދުވެރިން ވަނީ އަނެއްކާ ވެސް ގޮވާލާފައި އެވެ.

މީގެ އިތުރުން، ޣައްޒާގެ ހުރިހާ ސަރަހައްދަކަށް އެއްވެސް ހުރަހެއް ނެތި އިންސާނީ އެހީ އާއި ބޭސް ފަރުވާގެ ސާމާނު ފޯރުކޮށްދެވޭނެ މަގު ތަނަވަސްކޮށްދިނުމަށް ވެސް މި ބަޔާނުގައި ބާރު އަޅާފައިވެ އެވެ. ޤަތަރާއި، މިޞްރު އަދި ތުރުކީ އިން ވަނީ ބައިނަލްއަޤުވާމީ ގާނޫނުތަކާއި، ހަނގުރާމަ ހުއްޓާލުމުގެ އެއްބަސްވުމަށް އިސްރާއީލް އިން ބޯލެނބުމަށްޓަކައި، ބައިނަލްއަޤުވާމީ މުޖުތަމައުން އިސްރާއީލް އިން ފިއްތުންތައް ކުރިމަތި ކުރުމަށް ވެސް ގޮވާލައިފަ އެވެ. 

މިދިޔަ އަހަރު ޤާއިމުކުރި ހަނގުރާމަ ހުއްޓާލުމުގެ އެއްބަސްވުމުގެ ދަށުން ޣައްޒާގެ ރައްޔިތުންނަށް ލުއިތަކެއް ލިބޭނެ ކަމަށް އުންމީދު ކުރެވުނު ނަމަވެސް، އިސްރާއީލް އިން މެދުނުކެނޑި ދެމުންދާ ހަމަލާތަކުގެ ސަބަބުން އެ ސަރަހައްދުގެ އިންސާނީ ހާލަތު ވަނީ ވަރަށް ބޮޑަށް ގޯސްވެފައި އެވެ. މި ތިން ޤައުމުން ދަނީ މަސްރަހު ހަމައަކަށް އެޅުވުމަށްޓަކައި ޑިޕްލޮމެޓިކް ފެންވަރުގައި ގިނަ މަސައްކަތްތަކެއް ކުރަމުންނެވެ.