ޣައްޒާގައި އިސްރާއީލުން ސުންނާފަތިކޮށްލާފައިވާ އިމާރާތެއްގެ ދަށުން 19 ހަށިގަނޑު ނަގައިފި
9 އޯގަސްޓު 2026 | އާދީއްތަ 07:12ޣައްޒާގެ އިމާރާތްތަކުގެ ދަށުން މީހުން ހޯދުމަށް ކުރާ ބުރަ މަސައްކަތުގެ ތެރެއިން، ބަރު މެޝިނަރީ ނެތުމުން އަތުން ކޮނެގެން ހަށިގަނޑުތައް ނެގުމުގެ އޮޕަރޭޝަންތައް ސިވިލް ޑިފެންސް އިން ދަނީ ކުރިއަށް ގެންދަމުން. އިސްރާއީލުގެ ހަމަލާތަކުގައި ވެއްޓިފައިވާ އިމާރާތްތަކުގެ ދަށުގައި އަދިވެސް 8,000 އަށްވުރެ ގިނަ މީހުން ތިިބި ކަމަށް ބެލެވޭއިރު، މި ހަނގުރާމައިގައި ޝަހީދުވި މީހުންގެ ޖުމްލަ އަދަދު މިހާރު ވަނީ 73,300 އަށްވުރެ މައްޗަށް އަރާފައި
އޮގަސްޓް 2025 ގައި އިސްރާއީލުން ޣައްޒާ ސިޓީގެ އެކި ސަރަހައްދުތަކަށް އަމާޒުކޮށް ދިން ވައިގެ ހަމަލާތަކުގައި ޝަހީދުވި ފަލަސްތީނުގެ ރައްޔިތުންގެ ހަށިތަކުގެ ކައިރީގައި އާއިލާތަކުގެ މީހުން ހިތާމަކުރަނީ | އަނަޑޯލޫ
ޣައްޒާ ސިޓީގައި އިސްރާއީލުން ސުންނާފަތިކޮށްލާފައިވާ އިމާރާތެއްގެ ދަށުން 19 މީހެއްގެ ހަށިގަނޑު ނަގައިފި ކަމަށް ޣައްޒާގެ ސިވިލް ޑިފެންސް އިން ބުނެފި އެވެ. ސިވިލް ޑިފެންސް އިން ނެރުނު ބަޔާނެއްގައި ބުނެފައިވަނީ، މި ހާދިސާގައި މަރުވި މީހުންގެ ތެރޭގައި ގިނައީ އަންހެނުންނާއި ކުޑަކުދިން ކަމަށެވެ.
ހޮނިހިރު ދުވަހު ނިންމާލި މި މަސައްކަތަކީ، ޣައްޒާގެ ސުންނާފަތިވެފައިވާ އިމާރާތްތަކުގެ ދަށުން މަރުވެފައިވާ މީހުންގެ ހަށިގަނޑުތައް ހޯދުމަށް ކުރަމުންދާ ވަރަށް ލަސް އަދި ބުރަ މަސައްކަތްތަކުގެ ތެރެއިން ހިންގުނު އޮޕަރޭޝަނެކެވެ. ކޮންކްރީޓް ގައުތައް ނެގުމަށް ބޭނުންވާ ބަރު މެޝިނަރީޒް ނެތުމުގެ ސަބަބުން، މި ހަށިގަނޑުތައް ނެގުމުގެ މަސައްކަތް ކުރަން ޖެހިފައިވަނީ އަތުންނެވެ.
މި މަސައްކަތްތައް ބަލަހައްޓަވާ މުޙައްމަދު އަބޫ ދާން ވިދާޅުވީ، ޣައްޒާގެ ހުޅަނގު ސަރަހައްދުގައި ހުރި "ކަރަމް" އިމާރާތުގެ ދަށުން މީހުން ހޯދުމުގެ މަސައްކަތް ހަތަރު ދުވަސް ވަންދެން މެދުނުކެނޑި ކުރުމަށްފަހު މިހާރު ނިމިފައިވާ ކަމަށެވެ.
އޭނާ އިތުރަށް ވިދާޅުވީ، ޚާއްޞަ މެޑިކަލް ޓީމުތަކާއި ސިވިލް ޑިފެންސްގެ ކުރޫން މިހާރު ޣައްޒާ ސިޓީގެ އެހެން ސަރަހައްދަކަށް ގޮސް، އެ ތަނުގައި މީހުން ހޯދުމުގެ އައު އޮޕަރޭޝަނެއް ފަށާނެ ކަމަށެވެ.
އިސްރާއީލުގެ ހަމަލާތަކުގައި ވެއްޓިފައިވާ ބޮޑެތި ކޮންކްރީޓް ފޮޅިތައް ނެގޭނެ ފަދަ ވަސީލަތްތައް ނެތުމުގެ ސަބަބުން، ސިވިލް ޑިފެންސްގެ ޓީމުތަކުން ބޭނުންކުރަމުންދަނީ އާދައިގެ އާލާތްތަކެއް ކަމަށާއި، މިއީ އިންތިހާއަށް ވަރުބަލިކުރުވާ ފަދަ ބުރަ މަސައްކަތެއް ކަމަށް އެ އިދާރާގެ އޮފިޝަލުން ތަކުރާރުކޮށް ވިދާޅުވަމުންދެއެވެ.
ޣައްޒާގެ ހެލްތު މިނިސްޓްރީން ހާމަކޮށްފައިވާ ގޮތުގައި، މުޅި ޣައްޒާގެ އެކި ސަރަހައްދުތަކުގައި ވެއްޓިފައިވާ އިމާރާތްތަކުގެ ދަށުގައި އަދިވެސް 8,000 އަށްވުރެ ގިނަ މީހުން ވީނުވީއެއް ނޭނގި ގެއްލިފައެވެ.
މިދިޔަ އަހަރުގެ އޮކްޓޯބަރު 11 ވަނަ ދުވަހު ހަނގުރާމަ ހުއްޓާލުމުގެ އެއްބަސްވުން އައި ފަހުން، މިހާތަނަށް މަދުވެގެން 1,254 މީހުން މަރުވެ، 4,121 މީހުން ޒަޚަމްވެފައިވާ ކަމަށް ހެލްތު މިނިސްޓްރީގެ އެންމެ ފަހުގެ ތަފާސްހިސާބުތަކުން ދައްކަ އެވެ. އަދި މި މުއްދަތުގެ ތެރޭގައި އިމާރާތްތަކުގެ ދަށުން 804 މީހެއްގެ ހަށިގަނޑު ވަނީ ނެރެފަ އެވެ.
2023 ވަނަ އަހަރުގެ އޮކްޓޯބަރު މަހުން ފެށިގެން މިހާތަނަށް ޣައްޒާގައި ޝަހީދުވި މީހުންގެ ޖުމްލަ އަދަދު ވަނީ 73,300 އަށްވުރެ މައްޗަށް އަރާފަ އެވެ. އަދި 174,000 އަށްވުރެ ގިނަ މީހުން ވަނީ ޒަޚަމްވެފަ އެވެ.
މި ހަށިގަނޑުތައް ނެގުމުގެ މަސައްކަތް ކުރިއަށް މިދަނީ، މިދިޔަ އަންގާރަ ދުވަހު ޣައްޒާ ސިޓީގައި ބޭއްވި ބޮޑު ޖަނާޒާއަކަށް ފަހުގަ އެވެ. އެ ޖަނާޒާގައި ވަޅުލާފައިވަނީ އަބޫ ޝާރިއާ އަދި އަލް-ޙަސައިނާ އާއިލާގެ 112 މީހުންނެވެ. އެ މީހުންގެ ހަށިގަނޑުތައް ނެރެފައިވަނީ 2023 ވަނަ އަހަރުގެ ނޮވެމްބަރު މަހު އިސްރާއީލުން ދިން ހަމަލާއެއްގައި ސުންނާފަތިކޮށްލި ޣައްޒާގެ ސަބްރާ އަވަށުގެ އިމާރާތެއްގެ ދަށުންނެވެ.
