ހަމާސް އިން ހަތިޔާރު ދޫކޮށްލިކަން ޔަޤީން ނުވަނީސް، އިސްރާއީލްގެ ސިފައިން އެ ސަރަހައްދުން ފޭބުމަށް ބޯޑު އޮފް ޕީސް އިން ބޭނުމެއް ނުވޭ!
10 އޯގަސްޓު 2026 | ހޯމަ 06:47މިލަޑެނޯވް ވިދާޅުވީ ހަމާސްގެ ހަތިޔާރު ނައްތާލުމާއި އެކަން ސެޓިފައި ކުރުމުގެ މަސައްކަތް ކުރިއަށް ދާނީ އެކި މަރުހަލާތަކަށް ބެހިގެން ކަމަށް. އަދި އިސްރާއީލްގެ ސިފައިން ޣައްޒާ އިން ފޭބުމަށް ލާޒިމު ވާނީ ކޮންމެ މަރުހަލާއެއްގެ ކަންކަން ފުރިހަމަވަމުންދާ މިންވަރަކުން ކަމަށް ވެސް އޭނާ ފާހަގަ ކުރެއްވި
ބޯޑު އޮފް ޕީސްގެ މަންދޫބު ނިކޮލާއި މިލަޑެނޯވް | ގެޓީ އިމޭޖަސް
ޣައްޒާގައި ހަރަކާތްތެރި ވަމުން އަންނަ ހަމާސް ޖަމާއަތުން ހަތިޔާރު ދޫކޮށްލިކަން ކަށަވަރު ނުކުރެވެނީސް، އިސްރާއީލްގެ ސިފައިން އެ ސަރަހައްދުން ފޭބުމަށް ބޯޑު އޮފް ޕީސް އިން އުންމީދު ނުކުރާ ކަމަށް، އެ ޖަމާއަތުގެ އިސް މަންދޫބު ނިކޮލާއި މިލަޑެނޯވް ވިދާޅުވެއްޖެ އެވެ.
އިސްރާއީލްގެ ބްރޯޑްކާސްޓަރެއް ކަމަށްވާ ޗެނަލް 12 އަށް ދެއްވި އިންޓަވިއުއެއްގައި މިލަޑެނޯވް މިހެން ވިދާޅުވީ، އެމެރިކާގެ ރައީސް ޑޮނަލްޑް ޓްރަމްޕް ހުށަހެޅުއްވި 15 ނުކުތާގެ ސުލްހައިގެ ރޭވުމަށް އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ އިންކާރު ކުރައްވާފައިވާ ދަނޑިވަޅެއްގައި އެވެ.
މިލަޑެނޯވް ވިދާޅުވީ ހަމާސްގެ ހަތިޔާރު ނައްތާލުމާއި، އެކަން ސެޓިފައި ކުރުމުގެ މަސައްކަތް ކުރިއަށް ދާނީ އެކި މަރުހަލާތަކަށް ބެހިގެން ކަމަށެވެ. އަދި އިސްރާއީލްގެ ސިފައިން ޣައްޒާ އިން ފޭބުމަށް ލާޒިމު ވާނީ ކޮންމެ މަރުހަލާއެއްގެ ކަންކަން ފުރިހަމަވަމުންދާ މިންވަރަކުން ކަމަށް ވެސް އޭނާ ފާހަގަ ކުރެއްވި އެވެ.
މި ވަގުތު އިސްރާއީލްގެ ކިބައިން އެންމެ ބޮޑަށް އެދެނީ ޣައްޒާގެ އެތެރެއަށް އިތުރަށް ވަދެގަތުން ހުއްޓާލުން ކަމަށް މަންދޫބު ވިދާޅުވި އެވެ. ވަކިން ޚާއްސަކޮށް، 'ޔެލޯ ލައިން' އިން އެތެރެ އަށް އިސްރާއީލްގެ ސިފައިން ނުވަނުމަށާއި، އާންމު ރައްޔިތުން މެރުން ހުއްޓާލުމަށް އޭނާ ވަނީ ގޮވާލައްވާފައި އެވެ.
މީގެ އިތުރުން މިލަޑެނޯވް ވިދާޅުވީ، އިސްރާއީލްގެ ސިފައިން މިހާރު ތިބި މަޤާމުތަކުގައި މަޑުކުރުމަށް ބޯޑް އޮފް ޕީސް އިން ބޭނުންވާ ކަމަށެވެ. އަދި އިސްރާއީލްގެ ސިފައިންގެ ފުރާނަ އަށް ނުރައްކާވާ ފަދަ ހަގީގީ ބިރެއް ކުރިމަތިވެގެން މެނުވީ، އާންމު ރައްޔިތުންގެ ގަޔަށް ބަޑި ނުޖެހުމުގެ ޔަގީންކަން ދޭން ޖެހޭ ކަމަށް ވެސް އޭނާ ވިދާޅުވި އެވެ.
ޣައްޒާގެ މައްސަލައިގައި ބައިނަލްއަގުވާމީ މުޖުތަމައުން ސުލްހައިގެ އެކި ހުށަހެޅުންތައް ކުރިމަތިކުރަމުންދާއިރު، އިސްރާއީލް އިން ދަނީ އެ ޤައުމުގެ ސަލާމަތީ ކަންކަން ކަށަވަރު ނުވަނީސް، ދޫދޭން ބޭނުން ނުވާކަން ހާމަކުރަމުންނެވެ. މިލަޑެނޯވްގެ ވާހަކަތަކުން ދޭހަވަނީ، ޣައްޒާ އިން އިސްރާއީލް ސިފައިން ބޭލުމުގެ ކުރިން ހަމާސްގެ އަސްކަރީ ބާރު ކަނޑުވާލުމަކީ ބޯޑް އޮފް ޕީސް އިން ވެސް ޤަބޫލުކުރާ މުހިންމު ޝަރުތެއް ކަމެވެ.
މަސްދަރު: އަލް ޖަޒީރާ
