ޣައްޒާގެ ފުނޑުވެފައިވާ އިމާރާތްތަކުގެ ދަށުން 112 މީހެއްގެ ހަށިގަނޑު ފެނިއްޖެ

ޣައްޒާގެ ކަމާބެހޭ އިދާރާތަކުން ހޮނިހިރު ދުވަހު ހާމަކުރި ގޮތުގައި، އިސްރާއީލުން ދެ އަހަރަށްވުރެ ގިނަ ދުވަސް ވަންދެން ދެމުންގެންދާ ހަމަލާތަކުގައި ސުންނާފަތިވެފައިވާ އިމާރާތްތަކުގެ ކުނިތަކުގެ ދަށުން އިތުރު 112 މީހެއްގެ ހަށިގަނޑު މިހާރު ވަނީ ފެނިފަ އެވެ. މިއީ ބޮޑެތި ގޮންޖެހުންތަކަކާއެކު ކުރިއަށްގެންދާ މަސައްކަތްތަކުގެ ތެރެއިން ފެނުނު ހަށިގަނޑުތަކެކެވެ.

ޣައްޒާ ސިޓީގެ ދެކުނުގައި އޮންނަ ސަބްރާ އަވަށުގައި، ގާތްގަނޑަކަށް 136 ގަޑިއިރު ވަންދެން، ގިނަ ފަހަރަށް ހުސްއަތާ ކޮނެގެން ކުރި މަސައްކަތުން މަރުވެފައިވާ މީހުންގެ ހަށިގަނޑުތަކާއި ހަށިގަނޑުގެ ބައިތައް ފެނިފައިވާ ކަމަށް ޣައްޒާގެ ސިވިލް ޑިފެންސް އެޖެންސީން ބުނެފައިވެ އެވެ.

ހަމާސްގެ ދަށުން ހިންގާ ރެސްކިއު ސާވިސްއެއް ކަމަށްވާ ސިވިލް ޑިފެންސް އެޖެންސީން ބުނި ގޮތުގައި، ފެނުނު ހަށިގަނޑުތަކުގެ ތެރޭގައި 40 ކުޑަކުދިންނާއި، 38 އަންހެނުންގެ އިތުރުން ޖިސްމާނީ ނުކުޅެދުންތެރިކަން ހުރި ހަތް މީހަކު ހިމެނެ އެވެ.

އިންޓަނޭޝަނަލް ކޮމިޓީ އޮފް ދަ ރެޑް ކްރޮސް (އައި.ސީ.އާރް.ސީ) އިން ބުނި ގޮތުގައި، ގާތްގަނޑަކަށް ދެ ހަފުތާގެ މުއްދަތަށް ކުރިއަށްދިޔަ މި އޮޕަރޭޝަނަށް އެ ޖަމިއްޔާއިން ވަނީ އެހީތެރިކަން ފޯރުކޮށްދީފަ އެވެ.

ޣައްޒާގައި ހުންނަވާ އައި.ސީ.އާރް.ސީގެ ތަރުޖަމާނު އަމާނީ އަލް-ނައޫޤް ވިދާޅުވީ، ދެ އަހަރާއި ބައިގެ މުއްދަތަށް ޣައްޒާގެ އެތައް ހާސް އާއިލާއަކުން ދިރިއުޅެމުންދަނީ ނުތަނަވަސްކަމާއި ވޭނުގައި ކަމަށެވެ. އަދި އެ އާއިލާތަކުން އިންތިޒާރު ކުރަމުންދަނީ އެމީހުންގެ ލޯބިވާ މީހުންގެ ހަށިގަނޑުތައް ފެނި، އިސްލާމީ އުސޫލުތަކާ އެއްގޮތަށް ކަރާމާތްތެރިކަމާއެކު ވަޅުލުމުގެ ފުރުސަތަކަށް ކަމަށް އޭނާ ވިދާޅުވި އެވެ.

ގެއްލިފައިވާ މީހުން ހޯދުމާއި މަރުވެފައިވާ މީހުންގެ ހަށިގަނޑުތައް ނެގުމަކީ އިންސާނީ ގޮތުން ނުހަނު މުހިންމު ކަމެއް ކަމަށް އޭނާ އޭ.އެފް.ޕީ ނިއުސް އެޖެންސީއަށް މައުލޫމާތު ދެއްވަމުން ވިދާޅުވި އެވެ.

ސިވިލް ޑިފެންސް އެޖެންސީގެ ފަރާތުން އެ ސަރަހައްދުގެ މަސައްކަތްތަކާ ހަވާލުވެ ހުންނެވި ކާނަލް މުހައްމަދު އަބޫ ދާން ވިދާޅުވީ، އެ ސަރަހައްދުގެ ކުނިތަކުގެ ދަށުގައިވާނެ ކަމަށް ބެލެވޭ އިތުރު 157 މީހެއްގެ ހަށިގަނޑު އަދިވެސް ނުފެންނަ ކަމަށެވެ.

އޭނާ ސިފަކުރެއްވި ގޮތުގައި މި މަސައްކަތަކީ ނުހަނު ބުރަ މަސައްކަތެކެވެ. ސަބަބަކީ ޓީމުތަކުން ހަލާކުވެފައިވާ ކޮންކްރީޓްތަކާއި ބަނޑިވެފައިވާ ދަގަނޑުތަކުގެ ތެރެއިން ހަށިގަނޑުތައް ހޯދަމުންދަނީ ހުސް އަތާ ކަމަށްވާތީ އެވެ.

ޣައްޒާގައި އަދިވެސް އެތައް ހާސް ބައެއްގެ ހަށިގަނޑު ނުފެނި އެބަހުއްޓެވެ. ބެލެވޭ ގޮތުގައި މީގެ ތެރެއިން ގިނަ މީހުން ވަޅުލެވިފައިވަނީ އިސްރާއީލުން ދިން ވަރުގަދަ ވައިގެ ހަމަލާތަކުގައި ސުންނާފަތިވި އިމާރާތްތަކުގެ ކުނިތަކުގެ ދަށުގަ އެވެ.

މީޑިއާތަކަށް ކުރިމަތިކޮށްފައިވާ ހުރަސްތަކާއި ޣައްޒާއަށް ވަނުމަށް އޮތް ދަތިތަކުގެ ސަބަބުން، މަރުވި މީހުންގެ އަދަދުތައް މިނިވަންކަމާއެކު ކަށަވަރުކުރުމަށް ނުވަތަ ހިނގަމުންދާ އަނިޔާވެރި އަމަލުތައް މިނިވަންކަމާއެކު ރިޕޯޓްކުރުމަށް ވަނީ ހުރަސްތަކެއް ކުރިމަތިވެފަ އެވެ.

ޣައްޒާގެ ސިއްހީ ވުޒާރާއިން ކަށަވަރުކޮށްދޭ ގޮތުގައި މި ހަނގުރާމައިގައި މިހާތަނަށް 73,300 އަށްވުރެ ގިނަ މީހުން ވަނީ މަރުވެފަ އެވެ. މިއީ އދ. އިން ވެސް އިތުބާރުކުރާ ހިސާބުތަކެކެވެ.